කණ්ඩා හැදුනේ වැඩුනේ හෝමාගමට කිට්ටුව පාත පිහිටා ඇති වැලිපිල්ලෑවෙ කියන ගමේය, ගමක් කිව්වත් තියෙන්නේ කොළඹ දිස්තිරික්කයේ නිසා කැමති උනත් නැතත් කණ්ඩාද කොළඹ කාක්කෙකි !
එය එසේ උවද කණ්ඩලෑ තාත්තාගේ උපන් ගම පිහිටලා තියෙන්නෙ මාතර අකුරැස්ස පළාතේය, කොටින් කියනවා නම් බෙන්තර ගඟෙන් එහාය ! මේ හුඟ දෙනෙකු වැඩිය අසා නැති බංගම නම් බොහොම සුන්දර කුඩා ගමකි.බංගමට ලඟා වීම සඳහා අකුරැස්සේ සිට කැටන්විල පාරේ දියලපේ පසුකරගෙන කිලෝමීටර 11 ක් පමණ ඇහැලපේ-දෙදියගල දිහාවට එන්න උවමනාය… අද මෙන් අධිවේගී මාර්ග නොතිබුන ඒ අවදියේ කොළඹ සිට පරණ ගාලු පාර හරහා යන මේ ගමන වරුවකටත් වඩා ගතවෙන වෙහෙසකර කාරියකි !
අකුරැස්සේ සිට නම් පෞද්ගලික වාහනයක් ඇරෙන්න කණ්ඩලාට ගමට එන්න තිබුන එකම ප්රවාහන ක්රමය පරණ කෑලි හැලෙන හොම්බ දිග ලොරි බස් එකක් හෝ හාවා හඳ දකින්නා සේ කලාතුරකින් හමු වන ලංගම බස් ලඩියකි.
අතපය දිග හැර පහසුවෙන් ගමන් කල හැකි ලංගම බස් එක හමුවූනෝතින් ඒ පෙර කල පිනකට ලොතරැයියක් ඇදුනා හා සමානය. එවන් දිනකදී පහසුවෙන් ඉඳගෙන යාමට හැකි ආසනයක් හමු වීමට ඉඩ කඩ බොහෝ වැඩිය. … කොළඹ සිට අකුරැස්ස දක්වා හෙම්බත්ව එන කණ්ඩලාට එයත් ලොකු නිදහසකි !
අකුරැස්සේ සිට එන බස් රථය නවත්වන්නේ බංගම තුන්මං හන්දියේය, කැටන්විල-බංගම මාර්ගය උඩුගම හා දෙඩියගල දිසාවන්ට බෙදෙන මෙතැන කඩ නොහොත් ලඩ දෙක තුනකින් සැදි කුඩා කඩමණ්ඩියක් ඇත්තේය, බංගම පළාතටම හදිසියට බඩු මුට්ටුවක් ගන්න ඇති එකම තැන මේ හන්දියය.
(බංගම හන්දිය)
කණ්ඩා ඇතුළු නඩය බංගම හන්දියට ගොඩ බැස්සත් ගමන අහවර නැත, තාත්තාගේ මහ ගෙදරට එතැන සිටත් කිලෝමීටරයක් පමණ පා ගමනින් දෙදියගල දෙසට යා යුතුය. (වර්තමානයේ නම් දෙදියගල දිහාවටම බස් පහසුකම් ඇත)
නමුත් බංගම හන්දියෙන් බැස පයින් ඇවිද යන මේ කෙටි දුර, ගමනේ කණ්ඩාගේ වැඩිමනක්ම සිත් ගත් කොටසය. දීර්ඝ ගමනකින් පසු ඇති ගත සිත වෙහෙස සැනෙකින් දමනය කල හැකි ගම්බද සිරියාව වචනයෙන් විස්තර කල නොහෙන තරම්ය. කියනවාත් වාගේ ඇවිද්ද පය හැබවින්ම දහස් වටින්නේ මෙවන් සුන්දර පරිසරයක් රස විඳීමින් පයින් ගාටද්දීය.
බංගම හන්දිය පසු කර මද දුරක් යද්දී මාවත දකුණු පස නිල්වන් වෙල් යායකට මායිම්ව උස් බිමක පිහිටා තිබෙන කුඩා පාසැල ඉතාමත් සුන්දරය. එය දකින කවර අයෙකුට හෝ, අනේ අපිටත් එහෙම පාසලක් තිබුනා නම් කෙතරම් අගනේද … ? යන්න සිතට නොනැගුනොත් එය පුරුමයට කාරණාවකි !
කණ්ඩාට එවන් පිනක් නොතිබුනත් කණ්ඩාගේ පියා නම් වාසනාවන්තයෙකි, මන්ද මේ කණ්ඩාගේ පියා මුලින්ම අයනු ආයනු කියූ පාසලයි … නමින් ඇහැලපේ විද්යාරාජ මහා විද්යාලයය. (අද දවස බංගම පළාතේ දියුණුතම පාසල උවත් මේ කියන සන්දියේ එය ගොඩනැගිලි දෙකකින් සැදී කුඩා ගම්බද පාසලකි)
කෙතරම් අඩු පාඩු තිබුනත් තමා සිප් සතර හැදෑරූ පාසලට තාත්තා දැඩි ගෞරවයකින් සැලකූ බව කණ්ඩාගේ අම්මා නොයෙක් වර පවසා ඇත්තේය… එමෙන්ම විදෙස් රැකියාවක් කරනා අවදියේ හැකි අයුරින් පාසලට කෘතගුණ දක්වන්නටද තාත්තා පැකිලීමක් දක්වා නැත !
(ඇහැලපේ විද්යාලය)
ගම මැදින් වැටුන දිය කඩිති වලින් පිරි කැඩුණ තාර පාරේ යන්තමට ගොන් බානක් දැක්කීමට තරම් ඉඩ ඇත. එහෙයින් වෙහෙස කෙසේ වෙතත් මේ පාරේ වාහනයක ගමන් කිරීමට වඩා පයින් ගාටන එක ශරීර සෞඛයයට හිතකරය.
කොහොමටත් මේ අබලන් පාරේ ඉඳ හිට හෝ වාහනයකට කියා ගමන් ගත්තේ ඈතින් ඇසෙන කුරුළු කොබෙයින්ගේ හඬ බිඳිමින් දුවන අත් ට්රැක්ටරයක් හෝ ලොරි බාගයක් පමණි.
පාර පසෙකින් ගලා බසිනා සීතල දිය පිරි දොළ පහරේ නම කියන්නට නොදන්නා නොයෙක් මසුන් රංචු ගසන්නේය … දෙපස අතරින් පතර දක්නට ඇති කුඩා නිවෙස් වල මිනිස්සු බීමට හැරුන විට අනෙත් සියලු දේ සඳහා වතුර අර ගත්තේ මේ දොළ පාරෙනි. කලාතුරකින් ගමේ ගිය විටදී කණ්ඩාගේ මද්දුම නැන්දනියගේ දියණිය වූ තොප්පි නංගී සමග ජල සන්නිය හැදෙන තෙක් ඉණක් වතුර පිරි දොළට පැන නැටූ හැටි දැන් කණ්ඩාට ඉතා දුරස්තර මතකයකි !
පාර දෙපස බැලූ හැම අතම නිලට දිලිසෙන සාරවත් වෙල් යායවල්ය. කණ්ඩාගේ පියාගේ මහ ගෙදර හමු වීමට පෙර අතුව කණ්ඩාගේ තවත් මිත්තණියක් වන සීයාගේ වැඩිමල් සොයුරියගේ නිවස හමුවන්නේය, කණ්ඩාගේ මතකය නිවැරදි නම් ගමේ උදවිය මේ ගෙදර හැඳීන්නුවේ පොල්ගස්වත්ත කියාය.
තුන් පසකින් වෙල් යායකට මැදිව සරු පොල් සහ තේ වගාවකින් යුතු මේ වත්ත මැද පැරණි තාලේ ලස්සන ගෙයකි. කණ්ඩාට යන්තමට මෙන් සීයාගේ වැඩිමල් සහෝදරියවද කණ්ඩාට නෑකමින් නැන්දනියන් වූ ඇගේ දුවනියන් මෙන්ම මිනිබිරියද මතකයේ රැඳී ඇත්තේය.
තාත්තාගේ මහ ගෙදරට මහගෙදර කිව්වත් ඇත්තටම එය පාර අද්දරට වෙන්න ගොඩ නැගූ කුඩා නිවසකි. තාත්තා ඇතුළුව සහෝදර සහෝදරියෝ පස් දෙනෙක් හැදී වැඩී උස් මහත් වී ඇත්තේ මේ නිවසේමය. කා හට උවත් තමන්ගේ ගෙදර රජ මැදුරක්මය, තාත්තාගේ පවුලට කියා එහි වෙනසක් නොතිබුණේය.
(මහ ගෙදර)
මහ ගෙදරට පයින් යන දුරින් නිල්වලා ගඟට එකතු වන්නාවූ අත්තක් ගලා බසින්නේය, සිංහරාජයේ දෙදියගල වනාන්තරයෙන් පැන නගින මේ ගඟේ තාත්තා පිහිනන්න ඉගෙන ගත් ආකාරය ගැන වයිවාරණ රස කතා කණ්ඩා කොතෙකුත් අසා ඇත්තේය. වරක් දෙකක් තාත්තාත් සමග ගඟට නාන්න ගිය හැටි අතරින් පතර සිහියට නැගෙනමුත් කණ්ඩාගේ මතකයේ හිස් තැන් බොහෝමය …
පිහිනන්න බැරි මුත් දිය කෙළියට රහ වැටුණු කණ්ඩා වරින් වර ගඟට බසින්නට දැරූ දැඟලිල්ල සහ ඇවිටිල්ලෙන් බේරුමක් නැති තැනදෝ ගඟේ කිඹුල්ලු ඉන්නවා යයි කියමින් කණ්ඩා බිය ගැන්වීම අවසානයේ පල දැරුවේ ගඟේ කෙසේ වෙතත් කණ්ඩාගේ ඔලුවෙන් කිඹුලන් ඉවත් කරන්නට බැරි වූ නිසාය !
(මාතර ගඟේ මෙන්ම සිංහරාජය කිට්ටුවද කිඹුලන් සිටීමට ඉඩකඩ ඇත 🙂 )
තාත්තා පිහිනන්න උපන් හපනෙක් උවද කණ්ඩාට නම් ඒ දස්කම් පිහිට නැත්තේය. දෙයියන්ගේ පිහිටෙන් කොහේ ගියත්, මොනවා කලත් ගැලවිජ්ජාව දන්නා හෙයින් ගිලෙන්නේ නැතිව බේරෙන්නට කණ්ඩාට හැකිමුත් ඉන් එහාට දෙයක් නම් බැරිය, බාගවිට ඒ කණ්ඩා බෙන්තර ගඟට මෙහායින් ඉපදුන පවට විය හැක 🙂
(ගඟ)
මේ ගම පළාතේ ප්රධාන ආදායම් මාර්ගය ගොවිතැනය, නිශ්චිතවම පවසනවා නම් වී සහ කුඩා තේ වගාවන්ය (පහතරට තේ).
එයිට අමතරව බංගමට අල්ලපු ගම වන දෙදියගල දෙසට වීමට කිතුල් හකුරු කර්මාන්තයත් යහමින් පැවති බව කණ්ඩාගේ ආත්තම්මා සහ සීයා පවසනු දොඩවනු (දකුණේ උදවිය දොඩනු මිස අන් උදවිය මෙන් කතා කරන්නේ නැත 😀) කණ්ඩා අසා ඇත්තේය.
කණ්ඩා කිතුල් මැදීම ගැනවත් හකුරු සෑදීම ගැනවත් දන්නා ලබු ගෙඩියක් නොමැත්තේය, නමුත් බංගමට ගිය හැම දොහකම මදියි නොකියන්න කිතුල් හකුරු සහ පැණි වලට වග කීම සඳහා කණ්ඩා හට එය කිසිම ආකාරයක බාදාවක් වුයේ නැත.
වර්තමානයේ අප පුරුදු වී තිබෙන සුපිරි වෙළඳ සැල් වලින් මිලදී ගන්නා පැණි බෝතල් මෙන් නොව එකල සීයා කිතුල් පැණි රැගෙන ආවේ පැණි මුල් වලය … පැණි මුල් සාදන්නේ වේළා පදම් කල පුවක් පට්ට වලිනි, මෙලෙස සෑදූ පැණි මුල් දුමේ එල්ලූ කල අවුරුදු කිහිපයක් උව කල් තබා ගත හැකිය.
දුමේ දැමු පැණි මුල් වීදුරු බෝතල් වල මෙන් නොව කල් ගත වන විට කෙමෙන් තෙතමනය වාෂ්ප වී යාමෙන් තව තවත් උකු වන්නේය. මෙලෙස උකු වීමෙන් මුල පතුලේ පැණි කැටි ගැසීම නිසාවෙන් සෑදෙන හකුරු බොර හඳුන්වන්නේ වැලි හකුරු කියාය, පැණි තැවරු කුඩා සුකිරි කැට මෙන් රසට හැපෙන වැලි හකුරු කණ්ඩා බොහෝ ප්රිය කල දෙයකි.
අවුරුද්දට කැවුම්, පැණි වළලු සහ වැලි තලප ආදී කැවිලි පෙවිලි සාදන අවස්ථා වලදී එතෙක් කල් දුමේ සැඟවී තිබුණු පැණි මුල් හෙමින් කල එළි බසින්නේය. ගෙවල් වල සිටින පොඩි උන් හට අවුරුද්දටත් කලින් අවුරුදු ලබන්නේ අම්මලා කැවිලි පිළියෙළ කරන අතරතුරදී වැලි හකුරු රස බලන්න ලැබෙන නිසාය.
මේ සියල්ලටම වඩා කණ්ඩාගේ ප්රියකර දේ වුයේ එකල සීනි වෙනුවට තේ කහට පානය සඳහාම පිළියෙළ කල කුඩා හකුරු කැටය. කෙසෙල් කොළ වලින් ඔතා හීනි කෙසෙල් පට්ටයකින් වෙලූ මෙම හකුරු කැට, සීනි මෙන් නොව තේ කහට කොප්ප්පයක් සමග පංකාදුය !
(කිතුල් පැණි මුල්, හකුරු මුල්, වැලි හකුරු සහ හකුරු කැට)
සීයාගේ නම් ප්රියතම ආහාරය වූයේ කිතුල් පැණි හෝ මුදවපු කිරි සමග රතු කැකුළු බත්ය. සීයා තේ බොන උස වීදුරුවට දහවල් ඉතිරි වෙන කැකුළු බත් දමා වීදුරුවෙන් කාලක් විතර පිරෙන්න කිතුල් පැණි හෝ කිරි දාගෙන කන හැටි කණ්ඩාට අදටත් මතකය.
පුංචි සන්දියේ කණ්ඩාත් මේ රස බලා ඇතත් වඩා කැමැත්ත තිබුනේ මුදවපු කිරිත් සමග පැණි කෑමටය, මේ සියල්ල මතකයට එන කල අදටත් කණ්ඩාගේ කටට කෙල උනන්නේ නිතැතින්මය !
බංගමට අල්ලපු ගම දෙදියගල පිහිටලා තියෙන්නේ සිංහරාජ වනාන්තරයේ එක කොටසක් වන දෙදියගල වනාන්තරයට මායිම්වය. සීයා වරක් කණ්ඩාවත් කැටුව පා ගමනින්ම වනාන්තරය කෙලවරේ තිබුණ දෙදියගල ආරණ්ය සේනාසනය වෙත ගියේය.
ඒ කාලයේ අරණ්යය සේනාසනය අවට අඩි පාරේ වලසුන් ගැවසෙන නිසා ගැමියන් දවල් වරුවේ මිස හැන්දෑකරයේ මේ පළාතට නොයන බව සීයා පවසනවා කණ්ඩාට මතකය, අරණ්යය සිංහරාජය මායිමේම පිහිටා ඇති හෙයින් එය පුදුමය දනවන කාරණයක් නොවන්නේය.
ගිය ගමන මතක ඇති මුත් ආරණ්ය අවට පරිසරයේ තිබුණු අලංකාර පරිසරය ගැන සේම අනෙක් කල කී බොහෝමයක් දෑද මතකයෙන් ගිලිහී ගොස්ය. යන්තමට හෝ මතකයේ ඇත්තේ ගමේ කෙත්වතු සඳහා දියවර හරවනු වස් ගඟ හරහා බැඳි දෙදියගල වේල්ලත් එන ගමනේදී සීයාගේ පරම්පරාවෙන් ලද කුඩා තේ ඉඩමට ගොඩවැදුන හැටිත් පමණි.
(දෙඩියගල වනාන්තරය)
දළ බෑවුමක පිහිටි අතරින් පතර ගල් මතුවූ මේ ඉඩමේ ඒ දවස් වල අලුතින් පැල සිටවූ ළපටි තේ වගාවක් තිබුන අතර ආච්චි අම්මා හෙවත් තාත්තාගේ මව සමගද කණ්ඩා වරක් දොහක් එහි ගොඩ වැදුණා මතකය.
පරම්පරාවෙන් ආපු මේ ඉඩම කවදා හරි යන්න ඕනෑ පුතාගේ දරුවෙකුට තමයි දුවේ … යනුවෙන් සීයා වරින් වර කණ්ඩාගේ මව සමග පවසනු අසා ඇතත් ඒ සියල්ල තිබුනේ සීයාගේ සිතේය … තාත්තාගේ පවුලේ ඇතැම් උදවිය එයට හාත්පසින්ම වෙනස් අදහස් දැරූ නිසා සීයාගේ පැතුම කවමදාවත් ඉටු වුයේ නැත.
කොටින්ම තාත්තා මිලදී ගත් ඉඩමක් වත් කණ්ඩලාට නොලැබුණේ ඇයිද දන්නේ දෙවියෝ සහ ලොකු නැන්දා පමණි 🙂
ගමේ උදවියට මැල්ලුමක් හෝ කැඳ වෙනුවෙන් අවැසි කිසිම කොළ ජාතියක් කඩ පොලෙන් මිලදී ගැනීමට අවශ්යතාවයක් හෝ පුරුද්දක් තිබුනේම නැත. ඔවුන් සොබා දහම සමග සහජීවනයෙන් ජීවත් වන බැවින් සොබා දහම ගැමියන්ට හට අවැසි සියල්ල නොඅඩුව සැපයුවේය.
බංගම ආහාර පානයෙන් අතිශය ස්වයංපෝෂිතය, පිටින් ගෙන ආ දෙයක් ඇතොත් ඒ මසකට සැරයක් පොළකින් ගෙන ආ කරවල කූරියෙක් දෙන්නෙක් පමණි.
එබැවින් තේ ඉඩමට ගිය දවසකදී වත්තේ ඇති එළවලු-පළතුරක්, එතෙක් කණ්ඩා නොදැන සිටි තෙබු, මීවන, අඟුණ කොළ ආදී කොළඹ රටේ වැඩි භාවිතයක් නැති නොයෙක් මැල්ලුම් කොළ මෙන්ම ඉරමුසු, හාතවාරිය, වැල් පෙනෙල වැනි කැඳ සැදීමට ගන්නා පළාද නෙළාගෙන යාම ආච්චි අම්මාගේ එක රාජකාරියකි.
ඉතින් උදෑසනම ආච්චි අම්මා විසින් රතු කැකුළු බත්ද දමා පිලියෙළ කරන්නට යෙදුන ලොකු කොළ කැඳ වීදුරුවක් කිතුල් හකුරු කැටයක් සමග තාත්තාගේ මහ ගෙදරදී වැරදුනේ නැත ! කොළ කැඳ වලට වැඩි ආසාවක් නොතිබුන කණ්ඩා පවා කසාය බොන්නා මෙන් කැඳ ටික එක උගුරට ගිල දමා වීදුරුව අග ඉතිරි වන රතු කැකුළු බත් හකුරු සමග අහාරයට කෑදර කමක් දැක්වීය.
(දෙදියගල වේල්ල)
ආච්චි අම්මා කණ්ඩාගේ පියාගේ මෙන්ම පවුලේ අන් සැමගේත් අධ්යාපනය ගැන බෙහෙවින් සැලකිලිමත් වූ බව කණ්ඩා අසා ඇත. කණ්ඩාගේ තාත්තා කොළඹ විත් ඉගෙනීමට මෙන්ම රට රැකියාවක් යාම කරාද ආච්චි අම්මාගේ හෙවනැල්ල බල පෑවාට සැකයක් නැත.
නමුත් මේ සියලු දේට යටින් කණ්ඩාගේ කතාව සමග ඛේදාන්ත කිහිපයක් දිවෙන්නේය, ඉන් බංගමට අදාලව මුල් තැන ගන්නා කාරණා දෙකකි.
පළමුවැන්න කණ්ඩා මෙතෙක් වේලා විස්තර කල ගම්බද සුන්දරත්වය පන් විසි වසකට පෙරඅතුව බංගම නෙත ගැටුන ආකාරයයි, වර්තමාන තත්වය මීට හාත්පසින්ම වෙනස්ය. (***ඇතැම්හු මෙය සංවර්ධනය කියා හදුන්වති !)
අද වෙන කොට මේ පළාත නොසෑහෙන්න එළිපෙහෙළි වී ඇති බව Google Maps වැනි සිතියමකින් බැලූ කල මොනවට පෙනෙන්නේය. දෙදියගල වනාන්තරය ඇතුළු මුළුමහත් සිංහරාජයම ඇකිළිලා ගොසින්ය.
එදවස ඉණක් උසට වතුර තිබුණ මහ ගෙදර දොරකඩින් ගැලූ දොළ පහර ඒ මතකය මෙන්ම සිඳී යාමට ආසන්නය. එදා මෙන් වස විසෙන් තොර වගාවන්ගෙන් ඈත් වීම සනිටුහන් කරමින් කිසිවෙක් දොළ පහරේ වතුර තව දුරටත් ප්රයෝජනයට ගනු ඇතැයි සිතිය නොහැක.
අද පවතින බංගමත් එදා පැවති ගමත් සැසඳීමේදී කණ්ඩා දකින එකම හොඳ දේ දෙදියගල දක්වා වැටුන බස් ගමන් කරන අලුත් තාර පාර පමණි !
කණ්ඩාගේ හිතට දුක දෙන අනෙක් කාරණය නම් කණ්ඩලාගේ පවුල බංගමින් මුළුමනින්ම පාහේ ඈත් වීමයි. මෙයට හේතු දෙකක් කණ්ඩා දකින්නේය.
බෙන්තර ගඟෙන් එහා අදහස් මෙහා අදහස් හා පෑහීමේ හොරය මින් එකකි. කණ්ඩලාගේ පවුලට බෙන්තර ගඟේ දෙඉවුර යා කල එකම පාරුව කණ්ඩාගේ පියා සහ සීයාය.
කණ්ඩා නව යොවුන් වියේ පසු වෙද්දී සීයා පවුලේ සැම අතැර නොඑනා ගමන් ගියේය … දෛවයේ සරදමකටදෝ ඉන් දෑවුරුද්දකට පසු කණ්ඩාගේ පියාද සීයා ගිය මගම ගියේ කණ්ඩාගේ පවුල කොල්ලෑව නැති ඔරුවක තත්වයට පත් කරමිනි.
පවුලේ වැඩිමහල් පිරිමි දරුවා වූ කණ්ඩාගේ පියා පවුලට ආලෝකයක් වී දිය හැකි හැම දේම දුන්නා සේම, තාත්තාගෙන් හාත්පසින්ම වෙනස් චරිතයක් වූ පවුලේ වැඩිමහල් ගැහැණු දරුවා වන ලොකු නැන්දා ගිල ගත හැකි හැමදේ බදාගෙන ගිල ගන්නා මකර කටක් වැනිය.
මේ කියනා වකවානුවේ කණ්ඩලා උන්නාද මළාද කියා සොයන්නට වැඩිමනක් පිරිස සිටියේ නැත එසේ සිටි පිරිස අදටත් සවියක්ම වෙමින් කණ්ඩාගේ පවුල වටා සිටින්නේය !
මේ හේතු කාරණා නිසා කණ්ඩාට වයස අවුරුදු දහ තුනක විතර කාලයේ සීයාගේ මළගමට ගියාට පසු දශක දෙකකට අධික කාලයක් ගත වීත් කණ්ඩා බංගමට පා තබා නැත. ඇතැම් විට ඉදිරියේදී නැවතත් මේ ඉසව්වේ කරක් ගැසීමට ඉඩ ඇත, නමුත් ඒ කණ්ඩා දුටු බංගමට නම් නොවේ !
තාත්තාගේ නෑදෑ පිරිසගේ නම් ගම් ආදිය කණ්ඩාට දැන් හරි හමන් නිච්චියකුත් නැතිමුත් දන්නා කියන ආකාරයට දුර නෑදෑයෝ හැරුන කල පවුලේ උදවිය කවුරුවත්ම බංගම නැත්තේය.
ලොකු නැන්දා අනෙත් සැමදේ සේම මහ ගෙදරත් ගිල දමා අහවරය, අත හැර දැමූ මහ ගෙදර අම්බලමක් සේ පාලුවට ගොසිනි … සීයාත් තාත්තාත් කණ්ඩා අතැර ගිය පසු බංගම කිසිවෙක් කණ්ඩා නොහඳුනන්නාක් මෙන්ම කණ්ඩාගේ පුරාණ මතකයන්ගෙන් තොරව බංගමට වෙන බැදීමක්ද නැත්තේය ….
(බංගම සහ දෙදියගල සිතියම)
කණ්ඩා ආපසු ගමට ගියත් මොනවා කරන්නද යනුවෙන් ඉලක්කයක් නැත ? ඇතැම් විට දෙදියගල ආරණ්යය පැත්තේ ගිහින් එන ගමන් ගඟට පැන වතුර ඩිංගක් ඇඟට දාගත්තොත් පැරණි දේ ආවර්ජනයට ඉන් ගැම්මක් ලැබෙනු ඇත …
එලෙසම අනෙක් අතට ආපහු සීයාවයි තාත්තාවයි මතක් වී පරණ තුවාල පෑරෙන්නටත් ඉඩ ඇත්තේය, අදටත් තාත්තාගේ පවුලේ සමහර උදවිය ගැන මතක් වනවිට හිතට පොඩි කහටක් සමග කටට දැනෙන අපුල රසයේ වෙනසක් වීද නැත්තේය !
සැලකිය යුතුයි : මෙහි අඩංගු දෙදියගල වනාන්තරයේ පින්තුර ලබා ගත්තේ Hikers Haven වෙතින් , එම ඡායා රූප වල අයිතිය ඔවුන් සතු බව කරුණාවෙන් සලකන්න !
~ මතු සම්බන්ධයි !
නොවැම්බර් 20, 2016 at 5:07 පෙ.ව.
දෙදියගල
කැමතියිLiked by 1 person
නොවැම්බර් 20, 2016 at 9:23 පෙ.ව.
අපිට හුරු දෙඩියගල කියලා, කොළොම්පුරේ කපුටො නොවැ 😁
කැමතියිකැමතියි
නොවැම්බර් 20, 2016 at 6:36 ප.ව.
කුසුම්සිරිට බොහොම ස්තුතියි වැරැද්ද පෙන්නලා දුන්නට … ඔන්න ඔක්කොම හැදුව 🙂
කැමතියිකැමතියි
නොවැම්බර් 20, 2016 at 5:18 පෙ.ව.
මේකේ හැම අකුරක්ම අසීමිත රහයි. මම මෑතක කියවපු හොඳම බ්ලොග් පෝස්ට් එක.
කැමතියිLiked by 1 person
නොවැම්බර් 20, 2016 at 10:29 පෙ.ව.
බොහොම ස්තුතියි කොච්චියෝ …
කැමතියිකැමතියි
නොවැම්බර් 20, 2016 at 7:56 පෙ.ව.
මේ කතාව කියවනකකොට මගෙත් පොඩි කාලෙ මතක් උනා. ගහට නැගලා කජු පුහුලන් කාපු හැටි. දැන් ළමයිට මෙ වගේ අවස්ථාවක් නෑ මොකද දියුණුවත් එක්ක ඹක්කොම වෙනස් වෙලා …
කැමතියිLiked by 1 person
නොවැම්බර් 20, 2016 at 11:05 පෙ.ව.
ඒක හැබෑව, ඇත්තටම දුක හිතෙනවා මතක් වෙන කොට 😦
කජු පුහුලං කහට ගෑවුනාම ඇඳුම් ඉවරයි, වැඩියෙන් පුහුලං කෑවොත් උගුර බල්ලෝ කනවා 🙂
ඒ වගේම තමයි කජු පුච්චනකොට පරිස්සම් නොවුනෝතිං කජු කිරි ගෑවිච්ච තැන් පලු දාල වන වෙනවා අනිවාර්යෙන්ම !
අද අපි ජීවත් වෙන විදිහ, දකින වන විනාසය ඇතුළු වචන දෙකකින් කියන්න පුළුවන් “පාරාදීසයක අවසානය” (Paradise Lost)
අපිට පස්සේ එන පරම්පරා අපිට සාප කරාවි !
කැමතියිකැමතියි
නොවැම්බර් 20, 2016 at 9:54 පෙ.ව.
කණ්ඩයියේ,
දොඩනවා විනා දෙඩවීම හොඳ සිහියෙන් ඉන්න එවුන්ගේ වැඩක් නොවන බැවින් සීයා දොඩවන්නට හේතුවක් නැත. කළ යුත්තේ ඒ ගමේ ඇති සීයා සහ තාත්තාගේ මුල් බැසගත් ගේ දොර ඉඩකඩම් සල්ලි වලට ගැනීමය. මටත් ආතාගේ අන්තිම කැමැත්ත පරිදි ලැබෙන්න තිබූ මහගෙදර නොලැබුනේ ඔය වගේම දේපළ තන්හාකාරයො නිසාය. නමුත් මම ඒ සියල්ල සල්ලිවලට ගන්නෙමි. උඹත් බංගම ගනිං අයියෙ සල්ලි වලට. සීයයි තාත්තයි එලොව ඉඳං සන්තෝස වෙයි.
කැමතියිLiked by 1 person
නොවැම්බර් 20, 2016 at 11:15 පෙ.ව.
බොලාගෙ අදහස නම් නං නරක නැහැ සුරංග මල්ලියේ, නමුත් අපි අමාරුවෙන් හිටපු උදව් ඕනම කාලේ පහු කලාට පස්සේ කෝටි ගණන් දුන්නත් වැඩක් නැහැ බං … තම තමන් කරපුව ඒ උදවියම ගෙනියයිනේ … !
අපේ මුල් බංගමින් ගැලවිලා බොහොම කල් … දුක උනත් ඒක තමයි ඇත්ත, අනික දරුමල්ලෙක්වත් නැති අපි දෙන්න කාට පොදි ගහන්නද ? 🙂
කැමතියිකැමතියි
නොවැම්බර් 20, 2016 at 4:09 ප.ව.
බංගමට යාබද ගමක් තියනවා මලිදුව, මලිදුවත් පහල මලිදුව…
මම ඉපදුනේ හැදුනේ වැඩුනේ ඒ ගමේ… දැන්නම් ඉන්නේ කොළඹ..
එත් මගේ මතකයත් එක්ක මමත් අතීතෙට ගියා ලිපිය කියවද්දී..
අදනම් බංගම අතීත සිරිය මැකිලා ගිහිල්ල. සංවර්ධනයේ නමෙන්ද මන්ද…? ඒ අතීත ලස්සන මිහිරියාව අද නැති තරම්ම වගේ…
දෙදියගල ආරණ්යයට යන පාරත් දැන් මිනිස්සු ගොඩක් පදිංචිවෙලා… ආරණ්යයත් පැරණි හුදකලාව නැතිවෙලා නවීකරණය වෙලා.. එත් තාමත් ඒ පරිසරයේ ලස්සන නම් ඉතිරිව තියෙනවා.. එත් කොච්චර කාලේකටද මන්ද..?
කැමතියිLiked by 1 person
නොවැම්බර් 20, 2016 at 5:52 ප.ව.
මම දන්නා විදිහට නම් බංගමට එන බස් එකේම තමයි මලිදුවට එන්න තියෙන්නේ, බංගම හන්දියට ඩිංගක් මෙහා නේද ඔය කියන හරිය තියෙන්නේ ?
මේ වගේ පරිසරයක් හැදී වැඩෙන්න කුෂාන් බොහොම පින් කරලා තියනවා. පාරාදීසයෙන් ගෙන්දගම් පොළොවට පය තිබ්බහම ආයෙත් යන්න වෙන්නේ නැත්තේ අපිට විතරක් නෙමෙයි එහෙමනං 🙂
ලිපිය කියවපු උදවියව ආපහු අතීතයට එක්කගෙන යන්න පුළුවන් උනා නම් මගේ වෑයම සාර්ථකයි 🙂
බොහොම ස්තුතියි ගොඩ වැදුනට !
කැමතියිකැමතියි
නොවැම්බර් 21, 2016 at 5:26 පෙ.ව.
මටත් උනේ මේ වගේ දේවල්ය. සීයාගෙන් උරුම වන්නට තිබූ බොහෝ දේ නැන්දලා භුක්තියට සරිකරගෙන ඇත. උන්ට බම්බු ගහගනිල්ලා කියා ගමෙන් පිටවූ මා අද වනවිට මගේ කියා ගමනක් පැමිණ ඇත. ගමේ හිටියා නම් මම අදත් නැන්දලාගේ පුතාලා මෙන් හරක් බලමින් කුඹුරු වැඩ කරමින් කසියා ගහමින් සිටිනා එකෙකි.
මේ කණ්ඩො හබරකඩ සමූපකාර මාවත පැත්ත එහෙම දන්වද ? ඒ පැත්තේ මගේ කෙල්ලෙක් හිටියා පොඩි කාලේ. දැන් නම් කොහේද දන්නේ නෑ.
කැමතියිLiked by 1 person
නොවැම්බර් 21, 2016 at 6:34 පෙ.ව.
මේ ලිපියට ලැබෙන ප්රතිචාර අනුව කණ්ඩා අත් විඳ ඇති දේම අත්විඳි අය බොහොම සිටින බව පෙනේනේය 🙂
මේ සිරි ලංකාවේ … ධර්මද්වීපයේ … ලෝකෙන් උතුම් රටේ ඉපදුන පිනට/පවට හිනාවෙන්නද අඬනන්ද කියා හිතා ගැනීමට අමාරුය 🙂
මල් මලයාත් බලාගෙන යනකොට ජාති බඩුවක් වගේය … හබරකඩ ඔය කියන ඉසව්ව කණ්ඩාද සෑහෙන හොඳින් දන්නේය .. කණ්ඩාගේ මිතුරන් කිහිප පොලක් විසූ නිසාත් … පාසල් සමයේ දිනපතා පසුකරන පෙදෙසක් නිසාත් අටුවා ටීකා අනවශ්යය 🙂
ඔය කියන උදවිය බොහෝ විට කණ්ඩාට අක්කණ්ඩියක් විය යුතුය …මේ ඉසව්වේ ඇහැට කනට පෙනෙන අක්කලා කිහිප පොළක්ම හිටිය බව හොඳින් මතකය … ඉතින් ඔය කියන අක්කණ්ඩිය කණ්ඩාත් දැක ඇති බව නම් සිකුරුය !
කැමතියිකැමතියි
නොවැම්බර් 29, 2016 at 4:58 පෙ.ව.
මේ ළමයාගේ නම තුෂාරි අනුෂා හේරත්. උපන් ගම අනුරාධපුර, පදවිය පැත්ත. නැන්දලාගේ ගෙදර හිටියේ. ඇස් දෙක පුංචි සුදු ලස්සන කෙල්ලක්. විස්තර දන්නවා නම් පොඩ්ඩක් හොයලා දීපන්කෝ කණ්ඩො. පිං
කැමතියිකැමතියි
නොවැම්බර් 29, 2016 at 5:58 පෙ.ව.
හෝදිසි කරලා බලන්නම්, මතකද මොන ඉස්කෝලෙටද ගියේ කියල ?
කැමතියිකැමතියි
නොවැම්බර් 21, 2016 at 11:06 පෙ.ව.
මමනම් අදටත් ගමේ ගිහින් ඒ සුන්දරත්වය විඳලා එනවා…
වෙනස්කම් සෑහෙන වෙලා තියෙනවා උනත් තාමත් හොඳ වතුර තියෙන ඇළක් දොළක්, දඩ මස් ටිකක්, කිතුල් රා ටිකක් ඒ අවටින් හොයා ගන්න බැරි කමක් නැහැ…
කැමතියිLiked by 1 person
නොවැම්බර් 21, 2016 at 11:36 පෙ.ව.
හපෝයි ලොකු ළමයෝ රා කට්ටක් කාරිය කට ගෑවට කාරී නෑ බොලා මස් වැද්දෙක් වෙන්ට එපා 😦
මට මේ දෙසැම්බර් මාසේ ඔය පළාතේ ගොහින් එන්න අදහසක් තියෙනවා … 🙂
කැමතියිකැමතියි
නොවැම්බර් 22, 2016 at 8:11 පෙ.ව.
එලයැ! එක පින්තූරයක් ඩෙස්ක්ටොපයට දමාගතිමි.
කැමතියිLiked by 1 person
නොවැම්බර් 22, 2016 at 8:47 පෙ.ව.
බොහොම ස්තුතියි ගොඩ වැදුනාට ! කතාවේ කියා තියනවා සේම විසි අවුරුද්දකින් එහා බංගම ගොහින් නැත්තේය. පින්තුර ගත්තේ ගූගල් ස්ට්රීට් විව් සහ තවත් බ්ලොග් එකකිනි එහි නම දැමීමට අමතක උනා එය පසුව දමමි !
කැමතියිකැමතියි
නොවැම්බර් 22, 2016 at 9:27 පෙ.ව.
පින්තුරත් ගත්තු එකේ මේකටත් ගොඩවැදිලා ලයික් එකක දාල එන්න 🙂
https://hikershavensl.wordpress.com/2014/09/07/dediyagala-forest-reserve/
කැමතියිකැමතියි
අගෝස්තු 21, 2017 at 5:13 ප.ව.
ලස්සන ගමක්. පහු කතාව ටිකක් දුක්බරයි. අපි හැමෝටමත් ඔයවගේ කතාවක් තියනවා. අපේ කිරි අම්මගේ ගෙදර (මහා ගෙදර )තිබෙන තැන ගත්ත නෑදෑය අලුත් ගෙයක් හදල ඒක කලා. ගෙදර පහලින් දොලකුත් යනවා. . ඒ වත්තට මම ගියා දවසක් ළමයි දෙන්නට පෙන්වන්න කියල. සීය අත්ත ඉපදුනු ගෙදර. ටික වෙලාවකින් කවුදෝ කට්ටියක් පිරුන. අපි එතනින් ගියාට පස්සේ ආරංචි වුනේ ඒ ගෙදර හිටි ලොකු කිරි අම්ම කෙනෙක් එයාගේ කට්ටියට කතා කරලා “ඉඩම ගන්නද දන්නේ නැහැ ආවේ” කියල බය වෙලා. අපට හිනා. නමුත් ඊට පස්සේ ගියේ නැහැ. නිකන් හාට් ප්රශ්න දෙන්නේ මොකටද හේ හේ
කැමතියිLiked by 1 person
අගෝස්තු 21, 2017 at 9:07 ප.ව.
මට හිතේ කැකෑරි තිබුණු මේ දේවල් කියල දාපු නිසා දැන් තරහවකටත් වඩා ලොකු කලකිරීමක් ඉතිරි වෙලා තියෙන්නෙ !
කැමතියිකැමතියි
අගෝස්තු 21, 2017 at 10:04 ප.ව.
මුලින්ම ස්තුතියි ඊයක් එව්වාට..
දියලපේ කියන්නේ අපේ ගම අවුරුදු විසිදෙකක් වෙනකංම හිටියේ ඒ ගමේ.. බංගම, දෙදියගල වැඩිපුරම යන්න පටන්ගත්තේ අවුරුදු දහතුනේ දාහතරේ කාලේ ඉඳං වැඩිපුරම ගියේ අර වේල්ලට එතැන ඉඳන් කොල්ලො කුරුට්ටොත් එක්ක උඩහ පහල පීනන එකයි, වතුරේ ඔට්ටු තියන එකයි, ගස්වල අතු වලට නැගලා ගඟට පනින එකයි තමයි වැඩේ.. දවසක් අපේ එකෙක් ගහකින් පැනලා මිනිහගේ කරේ දාල තිබ්බ මාලේ නැතිඋනා.. උගේ ගෙදරින් මිනිහාට නොසෑහෙන්න තඩි බෑලා.. ටික දවසක් යනකං මිනිහා අපි එක්ක නාන්න ආවේ නෑ (කියන්න අමතක උනා ඔය ඔතනින් ගලන්නේ දිගිලි ගඟ – ඒක නිල්වලා ගඟට වැටෙන්නේ අකුරැස්සේ පෝරඹ හරියෙන්). තවත් දවසක් (කරුමෙට එදා මට යන්න උන් නෑ… ) අපි එක්කම හිටපු එකෙක් පීනන්න හිතං ගඟට පැනලා… මිනිහා වතුරෙන් උඩට මතු උනේ නෑ.. පැය ගානකට පස්සේ හොයාගෙන තියෙන්නේ.. අපිට මල ගෙදරදි අඬන්න බෑ.. උන්ගේ නෑයෝ අපිව එලෝගන්නවා …ඉතිං අපි මහපාරේ ඉඳන් පැය ගානක් ඉකිගගහා ඇඬුවා…
(බ්ලොග් එකේම ලියන්නං)
කැමතියිLiked by 1 person
අගෝස්තු 21, 2017 at 11:10 ප.ව.
ගොඩ වැදුනට ස්තුතියි විදානෙ මහත්තයෝ ! ලිපිය ලියන කම් බලාගෙන ඉන්නවා 🙂
කැමතියිකැමතියි
සැප්තැම්බර් 5, 2017 at 9:04 ප.ව.
විදානෙගේ බ්ලොග් එකේ කමෙන්ට් එකකින් මේ බ්ලොග් එකට ආවේ.. කණ්ඩා අයියා (අයියා කියලා කිව්වම ගැලපෙනවා කියලා මම හිතනවා.. වැරදි නම් මාව නිවැරදි කරන්න බ්රෝ) ලියලා තියෙන්නේ අපේ ගම ගැන. බංගම හන්දියෙන් වමට හැරිලා යන පාරේ තමයි අපේ ගෙදර තියෙන්නේ.මමත් දැන් නම් ගමෙන් පිටවෙලා අවුරුදු 10ක් විතර වෙනවා.ඒත් මාස දෙකකට වාරයක් හරි ගෙදර ගිහින් එනවා.මොකද මම තුමා තවම තනිකඩේ කරන් යන්නේ.අපි පොඩි කාලේ තිබ්බ ගමට වඩා දැන් තියෙන ගම ගොඩාක් වෙනස් වෙලා.මොනව නොතිබුනත් ඉස්සර තිබ්බ ගමට තවමත් ආසයි
කැමතියිLiked by 1 person
සැප්තැම්බර් 5, 2017 at 10:12 ප.ව.
බංගම හන්දියෙන් වමට හැරෙන පාර කියන්නෙ උඩුගම පැත්තටද? බංගමින් අපේ මුල් ඉදිරිල බොහොම කල් මම අවුරුදු විසිපහකින් ගමට පය ගහල නෑ මල්ලි, නමුත් ඉස්සර තිබුණු පිටිසර ගම අඳුනාගන්න බැරි තරමට වෙනස් වෙලා, දුක හිතෙනව දැක්කහම !
කැමතියිකැමතියි
ඔක්තෝබර් 14, 2018 at 7:22 ප.ව.
කියවන්න ලැබුනේ අද. මට අතීතය සිහිපත් කළා මේ ලිපිය. ජිවිතයේ මුල් දශක දෙකේ කරක් ගහපු පැත්තක් තමා මේ. තවමත් ඉඳල හිටලා ඒ පැත්තේ යනවා. දැන් බංගම ඉඳල උඩුගමට යන්න පුළුවන්. (බසුත් තියෙනවා මගේ හිතේ) එදා තිබුණු ගම නොවෙයි දැන්. එදා දොළ පාරවල් වල හිටපු බුලත් හපය වගේ වයිවාරන මාලු ජාති දැන් නැහැ. කඳුත් හෝද පාළු වෙලා. නිර්නාමික මහත්තයාගේ ගමේ මාත් අවුරුදු අටක් විතර හිටියා. ඒ කාලේ අවුරුද්දකට දෙපාරක් විතර ගං වතුර ගලනවා. අද වාහන තියෙනවා වගේ ඒ කාලේ ගෙවල්වල ඔරු තිබුනා. මමත් ඔරු පදින්න ඉගෙන ගත්තේ එහේදී. එදා දිගිලි ඇලේ කරපු සෙල්ලම් අද කරන්න බැහැ. වතුරත් මඩ පාටයි. දැන් ඇත්තටම කිඹුල්ලුත් ඉන්න පුළුවන්.
කැමතියිLiked by 1 person
ඔක්තෝබර් 14, 2018 at 8:17 ප.ව.
ඔබ මට වඩා වාසනාවන්තයි ඒ අතින් මම මේ පළාතට අවුරැදු 25 කින් මෙහා ගොඩ වෙලා නැහැ පුද්ගලික හේතු මත 🙂
නමුත් මම ගූගල් මැප්ස් වලින් දැක්ක විනාශයේ තරම 😕
කැමතියිLiked by 1 person
ජනවාරි 20, 2022 at 10:06 ප.ව.
හරිම ලස්සන පළාත.සති අන්ත නිවාඩුවට ගෙදර අය එක්ක ගමේ යන්නේ බංගම හරහා…
කැමතියිකැමතියි