antanov-an-12-about-to-land

පිපිඤ්ඤා සැන්විච්, යහතින් ගොඩ බෑම සහ ඇන්ටනොව් ගැරේජ් !

නියමු කුටියෙන් පිටතට පැමිණි ඉංජිනේරුවරයා අප දෙස බලා මහ හඬින් සිනහ වුයේ අපගේ හිත හදන්නට විය යුතුය …

නමුත් එය කණ්ඩාට දැනුණේ හිත හදනා සිනහවකට වඩා මේකත් මහ ලොකු කජ්ජක්දැයි ඔලොක්කුවට අසන්නා මෙන් “බැට්මෑන්” චිත්‍රපටයේ  “ජෝකරයා” විසින් දැමූ වියරු සිනහවක් ලෙසටය.

නමුත් රංජිත් සිටිනා තත්වය දුටු නිසාදෝ මේ හාදයාගේ හිත මදක් මොළොක් උනා සේය.

තේරුණා හෝ නැතා හෝ රුසියානු බසින් සහ කැඩිච්ච ඉංගිරීසියෙන් මොන මොනවදෝ දෙඩවූවත් අපට තේරුණේ අන්තිමට “තම්බ්ස් අප්”(Thumbs Up !) හෙවත් අත මිට මොළවා මහපටැඟිලි දෙකම උඩු අතට හැරවීමෙන් අනතුරුව

“වී ලෑන්ඩ් , වී ඕල් ගූඩ්” යන්න පමණි !

අපිත් පෙරලා ඔහුට සන් කළ පසු සිනහ මුසු මුහුණින්ම මගී කුටියේ කුඩා මේසය අසල වූ බිත්තියටම සවි කල ඇකිලිය හැකි ඇලුමිනියම් පුටුව දිග හැර ගෙන ඉඳ ගත්තේය.

ඉන් අනතුරුව ඔහු කල කී දෑ කණ්ඩාට සිහි ගැන්වූයේ “රෝමය ගිනි ගනිද්දී නීරෝ වීණා වැයීම” වැන්නකටය 🙂

අසල රාක්කයකින් අඩක් හිස් වූ පාන් බෑගයක්, ප්ලාස්ටික් පිඟානක් සහ කුඩා බටර් පැකට්ටුවක් එළියට ගත් ඉංජිනේරුවා ලොව ඇති අන් සියලු දේ මොහොතකට අමතක කරමින් භාරදූර කර්තව්‍යයකට මුල පිරුවේය …

බෑගයෙන් සීරුවට පාන් පෙති කිහිපයක් ඉවතට ගෙන පිඟාන මත තබා කිසිඳු කලබලයකින් තොරව සීරුවෙන් ඒ මත බටර් තවරුවේ පාන් පෙත්තට අබ මල් රේණුවක් තරමින්වත් නොරිදෙන ගානටය.

ඉන් පසු මදක් කල්පනාවේ නිමග්න වීමෙන් අනතුරුව කුමක්දෝ විදුරු බෝතලයකින් පිපාසය නිවා ගන්නට මෙන් කට තියා උගුරු කිහිපයක් කරමින් ගිල දැම්මේය …

අනතුරුව ඉංජිනේරුවා කට ඇඹුල් කර පිටි අත්ලෙන් මුව පිසදා ගත් විදිහෙන් කණ්ඩා සිතුවේ ඒ මත්පැන් වර්ගයක් කියාය.

නමුත් අවසානයේ එම බෝතලයෙන්ම අවපැහැ ගැන්වුණු පිපිඤ්ඤා ගෙඩියක් ඉවතට ගනිද්දී ඒ විනාකිරි සහ ලුණු වල බහා කල් තබා ගැනීමට පිළියෙළ කල පිපිඤ්ඤා බෝතලයක් බව කණ්ඩාට වැටහුණි. **

** කණ්ඩා පසුව රුසියානු මිතුරෙකුගෙන් දැන ගත්තේ රුසියානුවන් මෙලෙස කල් තැබූ පිපිඤ්ඤා, සලාද සහ සැන්විච් වෙනුවෙන් මෙන්ම වොඩ්කා පානයේදී කට ගැස්මක් ලෙසද නොමදව භාවිතා කරනා බවයි.

“ගර්කින්” ලෙස හැඳින්වෙන්නේද මේ විනාකිරි/ලුණු වල බහාලූ පිපිඤ්ඤාමය.

තවද මේ ඉතිරි වන ලුණු විනාකිරි මිශ්‍රණය ඉවත නොදමන රුසියානුවන්, රිසි සේ විනෝද වන බේබදු රැයකින් අනතුරුව පසුවදාට ඇතිවන ඉසේ ඇම්ම හෙවත් “හැන්ග් ඕවර්” (Hangover) සුවකරනා ප්‍රත්‍යක්ෂ අත් බෙහෙතක් ලෙස පානය කරන්නෝය.

එබැවින් මේ ඉංජිනේරුවාද මේ ඇත බෙහෙත පානය කරන්නට ඇත්තේ තම වොඩ්කා මතය සුව කර ගැනීමට බව කණ්ඩාට හොඳටම විශ්වාසය  🙂  **

ඉංජිනේරුවාගේ වැඩ කටයුතු තවමත් අවසන් නැත, තම ඉනේ ගසාගෙන් සිටි යතුරු කැරැල්ලකින් කුඩා දුණු පිහියක් ඉවත් කර ගත් ඔහු පිපිඤ්ඤා ගෙඩිය සිහින් ලෙස පෙති ගසමින් පාන්පෙති මත අතුරා සැන්විච් කිහිපයක් පිළියෙළ කළේය.pickled-cucumber

අනතුරුව පාන් පිළියෙළ කල ආකාරයටම සීරු මාරුවෙන් භාවිත කල සියල්ල නිසි තැන තැබූ ඔහු, සැන්විච් පෙත්තක් අවශ්‍යයි අපගෙන්ද රුසියානු බසින් හා හස්ත මුද්‍රාවෙන් විමසුවේය ?

අප උදේ පාන්දර හදිසියට ගුවන් තොටුපොළේදී උඩින් පල්ලෙන් ගිල දැමූ “බර්ගරයක්” (Burger) ඇරෙන්නට වෙන ආහාරයක් කුසට නොවැටුණත් බඩගින්නක් තිබුනේ නැත.

අප තිදෙනාම එය කාරුණිකව එය ප්‍රතික්ශේප කල බැවින්, නියමු කුටිය වෙත ගිය ඔහු තම සගයන් සමග සතුටු සාමිචියේ යෙදෙමින් සැන්විච් අනුභව කරන්නට විය.

මේ සමයං දෙස බලා සිටි කණ්ඩාටද දකුණු පස එන්ජිමකින් පැන නැගෙනා අධික ඝෝෂාව මෙන්ම අප මුහුණ දී සිටි දී සිටි තත්වයේ බරපතලකමද මොහොතකට අමතක වීය.

අම්මපා මේ රුසියානුවන් හට එක්කෝ පිස්සුය … නැතහොත් මේ ගුවන් යානාව එන්ජින් නැතිව හෝ පියාසර කල හැකි බවට දැඩි අධි තක්සේරුවකින් සහ විශ්වාසයකින් යුත්තෝය …

ඒ කෙසේ නමුත් අන්තිමේදී කණ්ඩාට සිතුනේ … සැබෑ පිස්සන් යනු මේ මළකඩ කෑ පියාඹන දහිරි වාට්ටු වල මගීන් ලෙස ගමන් ගන්නා උදවියට බවයි **

** පසු කලෙක කණ්ඩා ඇෆ්ගනිස්තානයට කිහිප වතාවක්ම සංචාරය කල බව ඇසූ උදවිය බොහෝ දෙනා මේ බව සැකයකින් තොරව තහවුරු කල බව කියන්නට සතුටුය 🙂 **

නූර් දැඩි විමසිල්ලෙන් සිටියත් කිසිඳු කලබලයක් නැතිය …

මතුපිටින් කලබලයක් නොපෙන්නුවත් කණ්ඩා හිතේ දැඩි දෙගිඩියාවක් සහ කැලඹීමකින් යුක්තය , අවිනිශ්චිත බව තරම් හේතුවකින් තොරව කණ්ඩාගේ සිත පෙලන තවත් දෙයක් නැත්තේය  … රංජිත් තවමත් දෙවියන් යදින ගමන්මය …

මේ අතරේ කණ්ඩාගෙන් නූර් බලාපොරොත්තු නොවූ ආකාරයේ පැනයක් නැගීය :

නූර් : හයියෝ … මගේ කුඩේ ගෙනහල්ල නැහැනේ … වැඩිපුර කුඩයක් තියනවද ?

කණ්ඩා : නැහැ,  ඒ මොකටද ඒ ?

නූර් : නෑ හදිස්සියක් උනොත් අරගෙන පනින්න !

කණ්ඩා : එහෙම කලොත් හරි යයිද ?

නූර් : ඇයි එයිට වඩා හොඳ විදිහක් තියෙනවා නම් කියන්න, මම අහගෙන ඉන්නෙ !

මේ විහිලුවෙන් අපගේ හිත තරමකට සැහැල්ලු වුයේය, අඳුරු වී පවතී රංජිත්ගේ මුහුණේ පවා මද සිනහවක් ඇඳුනේය …

තවමත් ලවක් දෙවක් නැතිව හතර අත දුවනා හිත මීළඟට නැවතුනේ අප යන ගමනේ ප්‍රධාන අරමුණ වන ස්වයිප් කාඩ් ව්‍යාපෘතිය ලඟය …

දැන් පවතිනා තත්වය මත කොච්චර මහන්සි වී ගමනට සුදානම් උවත් අද දිනයේ කාබුල් වෙත ලඟා වීමට ඇති ඉඩකඩ අවමය …

නූර් වෙත හැරුණු කණ්ඩා අපගේ ව්‍යාපෘති කාලසටහනේ අවුල ලිහා ගන්නේ කෙසේදැයි කතාබහකට මුල පිරුවේ නොයෙක් භයංකාර පැතිවලට අයාලේ දුවන හිත එකලාසයක් කර ගැනීමටය.

අපගේ වැඩ කටයුතු තවත් දිනකින් පමා කළහොත් උපකරණ පරික්ෂා කිරීමට කාලයක් ඉතිරි වන්නේ නැත … මේ ගමන මෙන්ම අනෙක් උපකරණ ප්‍රවාහනයටද යම් බාදාවක් එල්ල උවහොත් අපගේ උත්සාහයන් සියල්ල වතුරේය …

හමුදාවෙන් ලැබෙන නියමිත කාලසීමාවන් වෙනස් කිරීම ලෙහෙසි පහසු කාරියක් නොවේ, ඇෆ්ගනිස්තානය කියා එහි ඇති වෙනසක්ද නැත … නියමිත දිනට කලයුතු කාරිය නිම නොකර ව්‍යාපෘති කාලය දිගුකිරීමක් ඉල්ලීම බීරි අලින්ට විණා වැයීමකි …

නිතර මෙවැනි පමාවන් සිදු වන්නට උවහොත් ඒ නිසැකවම තම ටෙන්ඩර සහ ව්‍යාපෘති අවලංගු වීමට මග පෙන්වන්නකි …එබැවින් අපට ප්‍රමාදය හෝ අසාර්ථක වීම විකල්පයක් නොවේ !

අප තීරණය කලේ කාබුල් වෙත් ලඟා වූ පසු නවාතැන වෙත නොයා කෙළින්ම සියළු වැඩ කටයුතු ඇරඹීමට සුදානම් කර ඇති කාබුල් ගුවන් තොටු පොළේ ප්‍රධාන ආපන ශාලාව හෙවත් “කයා ඩී-ෆැක්” (KAIA DFAC)* වෙත යාමටය …

** (KAIA DFAC – KAbul International Airport Dining FACility)

“ඩී ෆැක්” – DFAC යනු මිලිටරි භාෂාවෙන් ආහාර ගන්නා ආපන ශාලාවන් හැඳින්වීමට යොදා ගන්නේ නාමයකි, ලංකාවේ නම් කණ්ඩා අසා ඇති ආකාරයට “මෙස්” එක (Mess / Mess Hall) යනුවෙන් හඳුන්වන්නේද මෙයයි.

එදවස කාබුල් ගුවන් තොටුපොළේ මෙවන් විශාල ආපන ශාලා ද්විත්වයක්ද අහල පහල වෙනත් ස්ථානයන්හි තවත් කුඩා ශාලා කිහිපයක්ද විසිර පැවතුණි. **

ඩුබාහිදී සිදු කළා මෙන්ම වැඩය අවසාන වන තෙක් දවසක් දෙකක් නිදි වැරීමද අනිවාර්යය … තවමත් නිදිමතේ සිටිනා කණ්ඩා මේ සිතුවිල්ලත් සමගම ප්‍රීතියෙන් පිනා ගියේය.

වැඩ රාජකාරි සම්බන්ධයෙන් උවත් කතා බහ කරන්නට ඇති දේ සීමිතය … වැඩිදුර තීරණ තීන්දු ගත හැක්කේ “කයා ඩී-ෆැක්” වෙත ගොස් සියළු දේ නිරීක්ෂණයෙන් පසු පමණි.

මේ කතා බහෙන් පසුව කොපමණ උත්සාහ ගත්තත් හිත එකඟ කර ගැනීමට හැකියාවක් කණ්ඩාට ලැබුණේ නැත … වතුර යට දැමූ රබර් බෝලයක් මෙන් ඇන්ටනොව් අනතුරු ගැන පුවත් නැවතත් හිත මතුපිටට එන්නේය …

තාක්ෂණික අඩුපාඩු, ත්‍රස්තවාදී ප්‍රහාර ආදී විවිධ හේතූන් මත අවාසනාවන්ත ලෙස සිරි ලංකාවේදී කඩා වැටුණු ඇන්ටනොව් යානා ගැන සේම ඉන් මියගිය සියයකට ආසන්න මගීන් සහ කාර්ය මණ්ඩලය ගැනත් මතකයන් තවමත් වරින් වර සිතෙහි රජ කරන්නේය.

අප ගමන් කරනා වේගයද පෙරට වඩා බෙහෙවින් අඩු ගතියක් දැනුනද, එය සැබැවින්ම එසේද නැතිනම් එන්ජිමේ ගෝරනාඩුවත් සමග හිතේ ඇඳුනක්ද යන්න විශ්වාස නැත … එය දන්නේ නියමුවන්ම පමණි !

ඉංජිනේරුවා පුටුවට බර දී නිදි කිරන්නේ මද ගෙරවිල්ලකුත් සමගය … වොඩ්කා මත පිපිඤ්ඤා වතුර පරයා ජය ගෙන ඇත්තා සේය …මේ උන්දලාට පණ අදින එන්ජිම ගැන කිසිම වග විභාගයක් නැති ගානය …

වාසනාවට අප ගමන් ගත් AN-12 ගුවන් යානාව එන්ජින් හතරකින් යුක්තය, හදිසියේ හෝ එය එන්ජින් දෙකක් පමණක් ඇති ඇන්ටනොව් AN-24 හෝ AN-32 යානාවක් වූයේ නම් ඉරණම මෙයට බොහෝ සෙයින් වෙනස් වීමට ඉඩ තිබුනේය.

ඉවසාගෙන සිටිය නොහැකි තැන කණ්ඩා නැවතත් නියමු කුටියට එබුණේය, නියමු කුටියේ කිසිඳු කලබලයක් නැත්තේය … උප නියමුවා මොකද්දෝ පොතක් කියවන්නේය .. එය තාක්ෂණික උපදෙස් මාලාවක්ද යන්න හරියට පැහැදිලි නැත …

රේඩියෝ ඔපරේටර්වරයා රුසියානු පුවත්පතක් කියවන ගමන්ය … බලාගෙන යනකොට කලබල වෙලා තියෙන්නේ අප පමණය … එනිසා සැනසුම් සුසුමක් හෙලූ කණ්ඩා නැවතත් බංකුව වෙත පැමිණ අසුන් ගත්තේය.

ඉන් මද වෙලාවකට පසු යානය පහත බැසීම ආරම්භ විය …

වෙලාව බැලූ කණ්ඩා හට තේරුම් ගියේ මෙතරම් අලකලංචියක් සිදු වීමෙන් අනතුරුවත් ගතව ඇත්තේ විනාඩි 15ක තරම් සුළු වෙලාවක් පමණක් බවයි …

නමුත් එම කාලය කණ්ඩාට දැනුනේ පැය ගණනාවකටත් වඩා දීර්ඝ කාල පරිච්චේදයක් ආකාරයටය …

මදක් හිත සන්සුන් බවට පත් වී එන විටම නියමු කුටියෙන් එලියට එබුණු සහය නියමුවා ගුවන් යානාව ගොඩ බෑම සඳහා සූදානම් වන ලෙස අපට දැනුම් දුන් බැවින් නැවතත් හදවත ගැහෙනා වේගය වැඩි වන්නට වුයේ අවිනිශ්චිත බව නිසාමය …

මෙසේ ගුවන් තොටුපොළ වටා ගුවනේ වටයක් ගැසීමෙන් අනතුරුව යානය ක්‍රම ක්‍රමයෙන් පහත බසින්නට විය … මේ ගතවෙන හැම තප්පරයක් පාසාම රංජිත්ගේ දේව කන්නලව්වද නොකඩවා ඇදී යන්නේය …

ඉතා සිරු මාරුවට ගුවන් පථය වෙත යානය යොමු කල නියමුවන් අවසාන නිවේදනයද  ලබා දුන්නේය …

ඉන් මදවෙලාවකට පසු (මෙය අපට දැනුනේ කල්පයක් මෙනි) ගුවන් යානයේ රෝද ගුවන් පථය මත ගැටෙනවා අපට දැනුණි.

ගුවන් පථයේ කෙළවරටම යන තෙක් යානය රැගෙන ගිය නියමුවන් එය යාත්රාංගනය දෙසට යොමු කල මොහොතේ තරම් හිතට සැනසිල්ලක් ලැබුණු අවස්ථා තවත් වේ නම් අතේ ඇඟිලි ගානටත් අඩුය.

මෙලෙස කිසිඳු අකරතැබ්බයකින් තොරව යානාව ගොඩ බැස්සවීමට නියමුවන් දේපල සමත් වූයෙන් එතෙක් පපුවේ බිත්තර තම්බමින් වඳින්න ඕන හැම දෙයියන්ටම වැන්ඳ රංජිත්ගේ මුහුණටද අවසානයේ සිනහවක් ආරූඩ විය 🙂

කණ්ඩාගේ ප්‍රථම ඇෆ්ගනිස්තාන සංචාරය සඳහා වූ ප්‍රථම වෑයම ගුවන් ගත වී පැයක් යන්නටත් මත්තෙන් අවසන් වුයේ මෙලෙසය … !!!

නමුත් කතාව ඉවරයි කීවාට ඉවරම නැත … කතාන්දරය තවත් ඉදිරියට ගලාගෙන යන්නේය …

ඒ වන විටත් ප.ව. 3:30 පමණ හෙයින් නියමු කුටියෙන් පිටතට පැමිණි ප්‍රධාන ගුවන් නියමුවාගෙන් අප විමසුවේ ගුවන් ගමන අවලංගුද යන්නයි …  ???

wrapped-food-pallets-inside-an-antanov-cargo-bay

නමුත් වාසනාවේ දෙව්දුව තවමත් අප දෙස බලා සිටිනවා විය යුතුය …

තවත් පැයක් ඇතුළත තවත් ගුවන් යානයක් ලැබෙන බවට පොරොන්දුවක් තමන් වෙත ගුවන් යානය හිමි සමාගමෙන් ලැබුණු බව නියමුවා අප හට දැනුම් දුන්නේය …

එමෙන්ම භාණ්ඩ රඳවා ඇති කොටස වෙත අත දිගු කල ඔහු මේ අතර මස් මාංශ සහ නැවුම් එළවලු/පළතුරු කිලෝ දහස් ගණනක් ඇති බවත් එනිසා කෙසේ හෝ ඉදිරි පැය කිහිපය ඇතුළත අප කාබුල් වෙත ලඟා වියයුතු බවත් එසේ නොවුහොත් මේ අහාර සියල්ලම අපතේ යන බවත් පැහැදිලි කර දුන්නේය.**

** ඇෆ්ගනිස්තානය වෙත ගුවන් මගින් ප්‍රවාහනය කරනා මස් මාංශ , එළවලු, පළතුරු සහ බීම වර්ග සඳහා ශීතකරණ පහසුකම් මේ ගුවන් යානා තුල නොමැත.

එනිසා ආහාර ප්‍රවාහනයේ යෙදෙනා කාලය අතර තුළ නරක් නොවී තබා ගැනීමට වෙනත් විකල්ප ක්‍රම යොදා ගනු ලබන්නේය … මෙයින් ප්‍රධාන වන්නේ ස්ථර කිහිපයකින් සැදි කාඩ්බෝඩ් පෙට්ටි (Corrugated Cardboard Boxes),  විනිවිද පෙනෙනා ප්ලාස්ටික් එතුම් (Clear Plastic Wraps) සහ ශීත කළ ඝන කාබන් ඩයොක්සයිඩ් හෙවත් වියළි අයිස්  (Dry Ice) භාවිතයයි.

අහාර කාඩ් බෝඩ් පෙට්ටි වලට වියළි අයිස් සමග අසුරා ලී හෝ ප්ලාස්ටික් තට්ටුවක එනම් පැලට් එකක තබා විනිවිද පෙනෙනා  ප්ලාස්ටික් එතුම් වලින් ආවරණය කරනු ලබන්නේය.

මෙමගින් කරදරයකින් තොරව පැය 24 – 48 ක් තිස්සේ උෂ්ණත්වය වැඩි වන්නට නොදී පාලනය කල හැකිය (මෙම කාල පරාසය භාවිත කරනා අයිස් ප්‍රමාණය, අසුරුම්කාරක  සහ පරිසරය මත තීරණය වන්නේය … ) **

ගුවන් යානය නැවත ගමන් ආරම්භ කර තැනටම පැමිණ නතර කරනා තෙක් අප සිටියේ උදක්ම නොඉවසිල්ලෙනි … ඒ ඉවතට බැස යළිත කකුල් දෙක පොලවේ තැබීමට මෙන්ම අත පය හිරි ඇර ගැනීමටය.

අප ගුවන් යානයට පසෙකින් එම වර්ගයේම තවත් ගුවන් යානයක් ඉන්ධන පුරවමින් නවතා තිබුණු අතර ඒ අප වෙනුවෙන් වෙන් කර ඇති නව ගුවන් යානය බව ඉංජිනේරුවා දැනුම් දුන්නේය …

අප ගොඩ බැස විනාඩි කිහිපයක් ඇතුළත භාණ්ඩ අළුත් ගුවන් යානය වෙත මාරු කිරීම ආරම්භ විය … පැලට් 10-12 කින් යුතු වූ මේ බඩු තොගය ඇදීම සඳහා පැය බාගයකට වඩා ගත නොවීය …

නමුත් ඉන්ධන පිරවීම අවසන් කර නැවත ගුවන් ගත වීමට ගුවන් යානා පාලන කුටියෙන් අවසර ලැබෙන තෙක් තවත් පැයක පමණ කාලයක් බලා සිටීමට අප හට සිදු විය.

කණ්ඩා හට ඇන්ටනොව් එපා කරවන සිදුවීම වුයේ ඔය කියනා අතර තුරේදීය …

අප හට වෙන් වූ නව යානයට තරමක් එහාට තවත් ඇන්ටනොව් යානා කිහිපයක්ම ගාල් කර තිබූ අතර ඉන් එකක එන්ජින් කවරයක් ඉවත් කර තිබු බව කණ්ඩා නිරීක්ෂණය කළේය.

එන්ජිම වෙත ලඟා වීමට ඒ අසලම රැඳවූ උස ඉණිමගක්ද වූ අතර, රුසියානු ඉංජිනේරුවන් දෙපළක් යම් කිසි නඩත්තු කටයුත්තක නිරතව සිටියෝය.

කණ්ඩා ඉමහත් උනන්දුවෙන් ඒ දෙස දෑස් නොහෙළා බලා සිටියේ නිරාවරණය කළ ගුවන් යානා එන්ජිමක් නඩත්තු කරනු එදිනෙදා දකින්නට නොලැබෙන විරළ වාසනාවක් නිසාවෙනි.

antanov-aiarcraft-maintenance

(ඇන්ටනොව් එන්ජිමක නඩත්තු කටයුතු)

මද වෙලාවක් මොනවාදෝ ගැජමැටික් කිහිපයක් අඬුවකින් තද කිරීමෙන් අනතුරුව, පහළට බැස ඉණිමග ඉවත් කළ මේ දෙදෙනා ඉදිරිපස දොරටුව තුලින් නියමු කුටියේ සිටි අයෙකුට රුසියානු බසින් බෙරිහන් දුන් අතර … එයට පිළිතුරු බිරුසමක්ද ඇතුලෙන් ලැබුනේය …

ඒ එන්ජිම පණ ගන්වන්නට දුන් ඕඩරයක් බව කණ්ඩා තේරුම් ගත්තේ ඉන් මද වෙලාවකට පසු කක්කල් කැස්සෙන් පෙළෙන රෝගියෙකු මෙන් දෙතුන් පාරක් කැස්ස එන්ජිම පණ අදින්නා සේ කිහිප වරක් කරකැවී නතර වීම නිසාය.

කිහිප වරක්ම උත්සාහ කළත් නාකි එන්ජිම තම මුරණ්ඩුකම තවම අත හරින්නට සුදානම් නැති නිසා ඉංජිනේරුවන් දෙපළ නැවතත් ඉණිමග දිගේ විත් එන්ජිම ළඟ නතර වූයේ සතුටකින් නම් නොවනා බව පැහැදිලිය.

එන්ජිම මට්ටු කරන්නට දඟලන මේ ඉංජිනේරුවන් දෙපළ කිහිපවරක්ම දන්නා කස්තිරම් සියල්ල දැම්මත් පෙර සේම ඉන් අත් වූ ප්‍රතිඵලයක් නොමැත.

අමාරුවෙන් ඇඹරෙමින් වට කිහිපයක් කැරකෙන තල බමරය ඔල්ලොක්කුවට මෙන් නැවතත් ඇන හිටින්නේය.

අන්තිමේදී ඉවසීමේ රතු කට්ට පැනපු නිසාදෝ නාකි එන්ජිමට පාඩමක් ඉගැන්වීමට ඉටා ගත් ඉංජිනේරු දෙපළගෙන් එක් අයෙක් අඩි තුනක් පමණ දිග තඩි යකඩ පොල්ලක් උස්සාගෙනවිත් අනෙකාට දුන්නේය.

පරණ ඇරියස් සියල්ල කවර් කිරීමට මෙන් මාරුවෙන් මාරුවට එන්ජිමේ බඳට දෑත බදා තඩි බෑ මේ හාදයන් නැවතත් නියමු කුටියේ සිටි සගයාට කෑ කොස්සන් ගැසුවේ නැවතත් එන්ජිම පණ ගන්වන්නටය.

ඉන් අනතුරුව සිද්ද වූ දේ ආශ්චර්‍යක්මය, පෙර සේම දෙතුන් විඩක් හොර කැස්සකට පසු කැරකෙන්නට ගත් තල බමරය පෙර වැරදි සියල්ලම අමතක කර හැල්මේ දුවන්නට පටන් ගත්තේය …

අන්තිමේදී තම සියුම් උත්සාහයන් නිසාම ලද ප්‍රතිඵලයෙන් තෘප්තිමත් වූ ඉංජිනේරුවන් දේපළ තම නියමු සගයාටද මොනවාදෝ කියා යන්නට ගියේය.

මේ සියලු අල කලංචි මැද්දේ පෙරදී කුස ගින්නක් නොදැනුනත්, දැන් දැන් කුසගින්නත් හිස ඔසවන්නේය.

කෙතරම් බඩේ ගින්දර දැනුණත් කෑම බීම ගන්නට තැනක් මේ අහල පහළ නොමැත … තියෙනා බඩ ගින්නට රුසියානුවාගේ පිපිඤ්ඤා සැන්විච් එක උවද කම් නැත 🙂

ගුවන් තොටුපොළ මගී පර්යන්තය වෙත ගොස් කෑම ගන්නට විදිහක් නැතිදැයි විමසු කල නියමුවා පිළිතුරු දුන්නේ තවත් විනාඩි කිහිපය ඇතුළත අපට නැවත ගුවන් ගත වීම සඳහා අවසර ලැබීමට බොහෝ ඉඩකඩ ඇති බැවින් ඒ සඳහා වෙලාව මද බවයි.

කණ්ඩා මේ ගැන නූර් හට පැවසු විට, අපායට යන්න උනත් සුදානම් ශරිරෙන් සිටිනා ඔහු තම ගමන් මල්ලෙන් අල පෙති පැකට් (Potato Chips) කිහිපයක් එළියට ගත්තෙන් අපගේ ක්ෂුධාගින්න තාවකාලිකව සන්සිඳුනේය.

බලාපොරොත්තු වූ සේම එයට පැය බාගයකට පමණ පසු අප දෙවන වතාවටත් සාජා සිට කාබුල් බලා ගුවන් ගත වීමු.

මහන්සිය, කුස ගින්න සමග සිත් පෙලන නොයෙක් දේ වලින්ද ගැලවීමට ඇති හොඳම විදිහ සුව නින්දකි, පෙර දින කිහිපයකම හරි හැටි නින්දක් නොවුයෙන් නිදිමතද දරා ගත නොහැකි තරමට ඇත්තේය.

පළපුරුදුකාරයෙකු වූ නූර් කණ්ඩා හට පැවසුවේ එක බංකුවක් මත දමා ඇති මෙට්ටය මගී කුටියේ පසෙක බිම දමාගෙන නිදා ගන්නා ලෙසයි.

මුලින් මෙය විහිළුවක් ලෙස සැලකුවද එය එසේ නොවන බව නූර්  සපථ කර කියා සිටි බැවින් ඒ අසලම සිටි ඉන්ජිනේරුවාගෙන්ද අවසර ගත් කණ්ඩා එක මෙට්ටයක් බිමට දමාගෙන ඉන් ඇලවිය.

මෙදා පොටේ නම් එන්ජිමක් නොව අහස කඩන් වැටුනද අවදි වෙන අදහසක් කණ්ඩා වෙත නොවුණේය !

එනිසා අප කාබුල් වෙත ළඟා වන තෙක් ආපසු කරදර නොකරන ලෙස ඉල්ලූ කණ්ඩා නියමු කුටිය පසෙකට පිටදී  සුව නින්දකට වැටුණේය.

just-before-my-beauty-sleep

(සුව නින්දට පෙර ඇතුව …)

මා දුටු ඇෆ්ගනිස්ථානය ~ V ~ කොටස කාබුල් ගුවන්තොටුපොළ පාගා මරුවෝ !

~ මතු සම්බන්ධයි !

මා දුටු ඇෆ්ගනිස්ථානය ~III කොටස ~ උඩ යන ඇන්ටනොව් සහ බිම යන ඇන්ටනොව් !

Advertisements