Late Night Party in Kabul

කාබුල් ස්පෙෂල් නේපාලි අරිෂ්ඨ !

ඇෆ්ගනිස්ථානයට පය තබා පැය කිහිපයක් ඉක්ම යාමෙන් අනතුරුවත් පණ පිටින් සිටීමට හැකිවීම සහ සතර අත පැතිර ගිය පාළු නිහැඬියාව කණ්ඩාගේ සිතට අමතර දිරියක් එක් කල බව කිව යුතුය. අතරමගදී කුමන ඇබැද්දියකට මුහුණ දුන්නත් උපද්‍රවයකින් තොරව කඳවුර ළඟා වීම නිසා සිත නොසිතූ තරමට සන්සුන්ය.

බටහිර මාජ්ජ සංදර්ශකයන්ගේ නිවේදක නළුවන් හුවා දක්වන පරිදි නිරන්තරයෙන් සිදුවන්නේ යයි පවසන මොහොතකින් ජිවිතයෙන් වන්දි ගෙවීමට සිදුවන මරාගෙන මැරෙන බෝම්බ ප්‍රහාර, මග ඇටවූ බිම් බෝම්බ, රොකට් ප්‍රහාර හෝ වෙඩි හුවමාරු කිසිවක සේයාවක්වත් තවම නැත.

අපහසුවෙන් ඉවසාගෙන සිටි බඩේ ගින්දරද නිවී ගොසින්ය, බොහෝ වේලාවකට පසුව කඩිමුඩියේ ගිල දමන්නට යෙදුණු රාත්‍රී අහාර වේල එතෙක් ගත පෙළූ කුසගින්න සුන්නදූලි කර දැමූ නිසා පිරී ගිය බඩ ඇදුණු බෙර පළුවක තරම ගත්තේය.

එක ගැටලුවක් නිරාකරණය කරන කල තවත් එකක් එහි තැන ගැනීම ස්වභාවිකය, එනිසා දැන් දැන් හිතේ ගින්න සහ බඩේ ගින්න පැලපදියම්ව තිබුණු තැන නිදිමත සහ ගත විඩාව විසින් ආක්‍රමණය කරන බව පැහැදිලිය. දින කිහිපයක් තිස්සේ නිදි වැරීමත් එකක් හැරෙන්නට එකක් වශයෙන් අඩුවක් නැතිව මුහුණ පාන්නට සිදු වූ අනපේක්ෂිත සිදුවීම් සියල්ලත් ගමන් තෙහෙට්ටුව සහ නිදිමත දෙගුණ තෙගුණ කරන්නේය.

මහන්සියේ තරමට කණ්ඩාගේ දෙනෙත් ඉදිරිපිට ඇඳක් මැවී පෙනෙන නොපෙනෙන ගානය, මේ විඩාවෙන් මිදෙන්නට පැය කිහිපයක සුව නින්දක් ඇරෙන්නට වෙනත් කිසිඳු විසඳුමක් නැත. හැකි ඉක්මනින් නිදන කුටිය සොයා ගැනීම වැදගත් මුත් කණ්ඩා හට මග පෙන්වන්නට කිසිවෙක් ඒ වන විට නොමැති බව වැටහෙන විට ප්‍රමාද වැඩිය.

මා කාමරය වෙත කැටුව යාමට රංජිත් පොරොන්දු වූවත්, එය අමතකව රාත්‍රී අහාරයෙන් පසු ඔහු කලින්ම සමුගත්තෙන් ඒ ගැන විමසන්නට හෝ උදව් ගන්නට කෙනෙක් ළඟ පාතක නැත. හදිසියකදී ප්‍රයෝජනයට ගැනීමට රංජිත්ගේ කාමරයේ නොම්මරයවත් අසා දැන ගැනීමට සිහියක් නොතිබුණේ කණ්ඩාගේ කරුමයටය.

කඳවුර තුළ සැරිසරද්දී සුපිරි කොම්පැනිය මගින් කඳවුරු වැසියන් වෙත නිකුත් කරන හැඳිනුම්පත රැගෙන යාම සියලුම සේවකයන් සහ පිටින් පැමිණෙන අමුත්තන් සඳහා අනිවාර්යය. කඳවුරේ ආරක්ෂාව සහතික කරනු වස් පිටස්තරයින් හඳුනා ගැනීමට සිදු කරන මේ ක්‍රියාවලියේ වරදක් දකිනු නොහැකිය.

පොඩි පරහකට ඇත්තේ තවමත් කණ්ඩා සතුව හැඳිනුම්පතක් නොමැති වීම පමණි, හැඳිනුම්පත ලබා ගන්නට නම් පසුදා උදෑසන තෙක් සිටිය යුතුය. මෙවන් අවස්ථා වලදී සාමාන්‍යයෙන් සිදු වන්නේ කඳවුරට පැමිණෙන අමුත්තන් කැටුව හැඳිනුම්පතක් සහිත සේවකයෙක් සමග ගමන් කිරීමයි. එහෙත් තනිවම කාමරය සොයා යාම මිස වෙනත් විකල්පයක් දැන් කණ්ඩාට නැත.

අධි දීප්ත විදුලි පහනින් ආලෝකමත් කඳවුරු භුමිය පුරා රාත්‍රිය සමගම තරමක අද්භූත නිස්කලංක බවක් පැතිර ගොසින්ය. කිසිවෙක් අවධානය යොමු නොකරනා ත්‍රාසජනක චිත්‍රපටයක පසුබිම් සංගීතයක් මෙන් නොනැවතී ඈතින් ඇසෙන කඳවුරට විදුලිය සපයන විදුලි ජනක යන්ත්‍රයේ හඬ ඇරුණුකොට වෙනත් කිසිවක් සවනට වදින්නේ නැත.

සිත රවටන සුළු ඒ නිස්කලංක බවට යටින් යම් කුකුසක් සිතට වද දෙන්නේ ඇයිද යයි සිතන්නට කරදර නොවී කණ්ඩා ගමන් මල්ලත් ඔසවාගෙන නිදන කාමරය සොයා යන හුදෙකලා ගමන ඇරඹුවේය. සැහැල්ලුවට අසුරා ගත් ගමන් මල්ලට මගකදී කවුදෝ තඩි කළු ගලක් එබූ ගානය, තබන අඩියක් ගානේ මල්ලේ බර වැඩි වෙන්නේ ගත පෙළන විඩාවට පින් සිද්ධ වන්නට විය යුතුය.

මා හට ලබා දුන් නිදන කුටියේ නොම්මරය සොයමින් පේළි කිහිපයකට ඉදි කර ඇති කන්ටේනර් කාමර කාණ්ඩ කිහිපයක්ම පසු කළමුත් කාමරය සොයා ගන්නට නැත. මග අසා ගන්නට කිසිවෙක් ළඟ පාතක නොසිටි හෙයින් කතරගම ගියත් අතරමග හිටියත් වෙන දෙයක් වෙන්නට කාමර වල නොම්මර කියවමින් ඉදිරියටම ගමන් ගතිමි.

පසුගිය දින කිහිපය මුළුල්ලේම පැවති සේම ඒ කාලකණ්ණි වාසනාව නැවතත් මා සමග බවට සැකයක් නැත. එනිසා මේ අල්ල පනල්ලේම කඳවුර තුළ ආරක්ෂක මුර ගමන්හි යෙදෙන නේපාලි ජාතික ආරක්ෂක භටයෙකුගේ නෙතට මා අසු වීම පුදුම වන්නට කාරණයක් නොවේ.

බෑග් මල්ලකුත් ඔසවාගෙන හතර අත බලමින් කාමරයෙන් කාමරයට ඇදෙන කණ්ඩා අනිවාර්යයෙන් අතරමං වූ කෝඩුකාරයෙක් ලෙස පෙනෙන්නට ඇත. නැතහොත් කඳවුර හුරුපුරුදු සේවකයන් මෙලෙස රෑ දෙගොඩහරි ජාමයේ ඉබාගාතේ ඇවිදින්නේ කලාතුරකිනි.

බකමූණෙකු මෙන් තියුණු නිශාචර ඇස් ඇති මේ ආරක්ෂක භටයා සෑහෙන දුරක සිට අඩ අඳුර තුළින් පවා මා ගෙල වටා හැඳුනුම්පතක් නොමැති බව දුටුවෙන් මා හට නවතින ලෙස සන් කර කඩිසරව මා දෙසට පිය මැන්නේය. බලාපොරොත්තු වූ පරිදිම හින්දි බසින් සහ කැඩුණු ඉංග්‍රීසියෙන් ඉදිරිපත් වූ පළමුවෙනි පැනය වූයේ මා හැඳුනුම්පතක් පැළඳ නොසිටින්නේ මන්ද යන්නයි.

කණ්ඩා හින්දි චිත්‍රපටි මෙන්ම හින්දි භාෂාව වෙත දැඩි අසාත්මිකතාවයක් දැක්වූවත් බෝඩිමේ සහ කන්තෝරුවේ ඉන්දියානුවන් සමග ගැවසීමෙන් ලද කුඩා හෝ හින්දි දැනුම මෙහිදී පිහිටට ආවේ නොසිතූ ලෙසය, නොදන්නා හින්දිය දන්නා සේ ඇද බෑමෙන් ජාම බේරා ගන්නට මා සමත් වූ බව කියන්නට සතුටුය 😀

මා ඩුබායි සිට පැමිණ කඳවුර වෙත ඇතුළු වුයේ රාත්‍රියේ බවත් කඳවුරු හැඳුනුම්පතක් නොමැති බවත් හින්දි බසින්

මේ ඩුබායි සේ ආජ් රාත් ආයා හූන්, මෙරේ පාස් Camp ID නහි හේ !

යයි නේපාලි ජාතිකයාට කියූ මා ඒ සමගම ඩුබායිහි භාවිත කරන සේවක හැඳිනුම්පත සහ නිදන කුටියේ විස්තර සහිත ලිපියද ලබා දුනිමි.

මාගේ ව්‍යක්ත හින්දි හැසිරවීම සහ විස්තරයෙන් ඔහු සෑහීමකට පත් වූ බව පෙන්නුම් කළත් කණ්ඩා හට හින්දි පිළිවන් යයි වරදවා වටහා ගත් ඔහු රැජිනව අමතක කර දිගට හරහට හින්දියෙන් දෙසන්නට පටන් ගත්තේය … 😉

අච්චා … ^^&^$^^%##^ &^$#& ^%#%#  

^^&^$^^%##^ &^$#& ^%#%#  ^^&^$^^%##^ &^$#& ^%#%# !!!

පෙරළා පැවසු දේ අතරින් පතර තේරුණත් නොදන්නා හින්දියෙන් වනන්නට ගොස් වරිගේ නහ ගන්නවාට වඩා දන්නා සුද්දාගේ භාෂාවට පහු බහින එක නම්බුය, එනිසා අපගේ ඉතිරි කතා බහ ඉංග්‍රීසියෙන් කරන්නට මා වග බලා ගතිමි.

ලියකියවිලි පරික්ෂා කරන අතරතුර ආරක්ෂක භටයාගේ ඉණ බැඳී වක් හැඩයකින් යුතු අමුතු පිහියක් වෙත නිතැතින්ම කණ්ඩාගේ නෙත් ඇදී ගියේය. ඒ නේපාලි ජාතිකයන් භාවිත කරන “කුකුරි” (Kukuri) නමින් හඳුන්වන ඉතා සුප්‍රසිද්ධ ආයුධය මා දුටු පළමු අවස්ථාවයි. මෙවන් දේ ගැන නොසන්සිඳෙන කුතුහලයක් ඇති මා ඒ ගැන ඔහුගෙන් විමසා සිටින්නට පසු බට වූයේ නැත.

ඔහු කණ්ඩා හට දැක බලා ගත හැකි අයුරින් පිහිය කොපුවෙන් ඉවතට ඇද පෙන්වා ඒ ගැන කෙටි විස්තරයක් කළේ මහත් ආඩම්බරයෙනි. ඔහුගෙන් පිහිය ඉල්ලාගෙන බලන්නට කොපමණ උවමනාවක් තිබුණද මින් පෙර දැන හඳුනාගෙන නොමැති ආරක්ෂක භටයෙකුගෙන් රෑ දෙගොඩහරි ජාමයේ ඔහුගේම ආරක්ෂාවට ඇති පිහිය ඉල්ලීම සීමාව ඉක්මවා යාමක් නිසා ඒ අදහස ඇත හැර දැමූවෙමි.

වර්තමානයේ “කුකුරි” පිහි එදිනෙදා ආම්පන්නයක් ලෙසත් විවිධ නේපාලි චාරිත්‍ර සඳහාත් විශේෂයෙන් ගුර්කා භටයන් විසින් ආත්මාරක්ෂක සටන් වලට යොදා ගන්නා ආයුධයක් ලෙසත් භාවිත වන්නේය.

මේ සිදුවීමෙන් අනතුරුව නොයෙක් වර “කුකුරි” පිහි කොතෙකුත් දකින්නට සහ අතපත ගාන්නට ලැබුණත් එයින් සත් අවුරුද්දකට පසුව මා හට “කුකුරි” රස බලන්නට ලැබුණේ නේපාලයෙන් කිලෝමීටර් 7,000 කටත් එහා රැජිනගේ රටේදීය. මේ කියන්නේ භයංකර පිහි ඇනුමක් ගැන නොව මා එංගලන්තයේ පිටිසරබද පළාතක් වන බාත් හි (Bath) පිහිටි නේපාලි අවන්හලකදී රසවිඳින්නට යෙදුණු “කුකුරි” බීර ගැනය. (ඒ පිළිබඳ වැඩි විස්තර වෙනම ලිපියකින් ගෙන එන්නට බලාපොරොත්තු වන නිසා සෙස්ස පස්සටය)

Khukuri Knife and Beer

(නේපාලයේ එවරස්ට් කඳුවැටිය, කුකුරි බීර සහ කුකුරි පිහියක් )

අපගේ සංවාදයෙන් පසු මා ගැන සෑහීමකට පත් වුණු ආරක්ෂා භටයා නැවත කඳවුරේ තුළ ගමන් යාමේදී හැඳුනුම්පතක් සහිත සේවකයෙක් කැටුව යන ලෙසත් දැනට හැකි ඉක්මනින් නිදන කාමරය යන ලෙසත් අවවාද කළේය.

එහිදී නිදන කාමරයට යන පාර විමසා සිටි මා හට මග පෙන්වීමට තරම් කාරුණික වූ ඔහුට ස්තුති කර නැවතත් ගමන ඇරඹීමි. කණ්ඩාගේ වාසනාවේ තරම කෙතරම්ද යත් හිමිව තිබුණේ කඳවුරේ පිටත තාප්පය අද්දරට වන්නට පිහිටි අවසාන කාමර පේළියේ අග්ගිස්සේම පිහිටි කන්ටේනර් කුටි වලින් එකකි.

ඇෆ්ගනිස්ථානයේ පවත්වාගෙන යන විදේශීය ව්‍යාපාරික කඳවුරු බොහෝමයක් ස්ථිර ගොඩනැගිලි වලින් යුක්තව ගොඩ නැගූ ඒවා නොවේ. ඒ වෙනුවට කන්තෝරු කාමර, කුඩා ප්‍රමාණයේ ගබඩා සහ සේවකයන් වාසය කරනා කාමර තැනීම සඳහා කන්ටේනර් කුටි යොදා ගැනීම ඉතාමත් සුලභය.

රට තුළ පවතින අස්ථාවරත්වය, ඉක්මනින් කඳවුරු ස්ථානගත කිරීම සහ ඉවත් කිරීමට හැකිවීම මෙන්ම  සාපේක්ෂව ඉතා අඩු වියදමකින් යුක්ත වීම මෙයට බලපාන ප්‍රධාන හේතූන්ය.මෙහිදී ගබඩා සඳහා පාවිච්චියෙන් ඉවතලන කන්ටේනර් බහාලුම්ද වාසස්ථාන ඉදි කිරීමට ෆ්ලැට් පැක්ස් (Flat Packs) යනුවෙන් හඳුන්වන පහසුවෙන් ප්‍රවාහනය කළහැකි ලෙස සහ ඉක්මනින් ගොඩනැගිය හැකි සේ කොටස් වශයෙන්  අසුරා ඇති පෙරනිමවූ කුටිද භාවිතා වේ.

(ෆ්ලැට් පැක්ස් (Flat Packs) භාවිතයෙන් කන්ටේනර් කුටි ඉදි කරන ආකාරය)

මේ කන්ටේනර් කුටි තුළට ගිම්හාන කාලයේදී පිටත උණුසුම ඇතුළට නොඑන සේත්, සිසිර සමයේදී ඇතුළත උණුසුම පිටතට නොයන සේත් පරිවාරක ද්‍රව්‍ය (Insulation Materials) වලින් ආවරණය කර ඇත්තේය. එමෙන්ම සෑම කුටියක්ම වායුසමීකරණය කර ඇති නිසා පිටත උෂ්ණත්වය කුමක් උවත් සැපසේ සිටීමට ඒවායේ වසන්නන් හට අපහසු නැත.

මා කන්ටේනර් කුටියේ දොර හරින්නට තැත් කරනවාත් සමගම ඇතුලතින් විවර වූ දොරින් වැනි වැනී එළියට ආවේ කරටි කැඩෙන්නට ගැසූ මිතුරෙක් වත්තන් කර ගත් නේපාල ජාතිකයෙක් දෙදෙනෙකි. කසිප්පු වලට සමාන සැර මත්පැන් ගඳක් ඔවුන් වෙතින් වහනය වූ අතරම මහ හඬින් සිනහ සී හින්දි බසින් ආචාර කළෝය, පෙරළා ඔවුන් හට ආචාර කළ මා ඔවුන් හට යන්නට දොර විවර කර පසෙකට වීමි.

ඔවුන් යන තැනක් හරි හැටි නොදැන බේබද්දාවත් රැගෙන අන්ධයෙක් කොරෙක්ට පාර කියන්නාක් මෙන් නන් දොඩවමින් කාමර කිහිපයකටම එබීමෙන් අනතුරුව අසල වූ තවත් කාමරයක් තුළට නොපෙනී යනු බලා සිටි මා අඩ අඳුරු කාමරයට ඇතුළු වුයෙමි.

සිගරට් දුමින් සහ තැන තැන විසිරුණු බීර සහ මත්පැන් බෝතල් වලින්ද පිරුණු එය නිදන කාමරයකට වඩා රාත්‍රී සමාජ ශාලාවක හෝ ගුබ්බෑයමක සිරි ගත්තේය. කාමරය තුළ වලාකුළු මෙන් පිරී තිබුණු දුම සහ අඩ අඳුරට නෙත් හුරු වූ පසු කාමරයේ තට්ටු ඇඳන් (Bunk Beds) කිහිපයක්ද  සහ මත්පැන් පානය කරමින් සිටි නේපාලි ජාතිකයන් කිහිප දෙනෙක්ද වූ බව වටහා ගත්තෙමි.

මහ රෑ දෙගොඩහරි ජාමයට වන්නට කට්ටිය සෙට් වෙලාය, ස්ටෙලාගේ බෝතල් අඩුම කුඩුම වලට ඉඩ දී රුපවාහිනිය කාමරයේ පැත්තක බිම වාඩිගෙනය. මාගේ වෙරි මීටරයට හසු වූ ආකාරයට එහි රැස්ව සිටින උදවිය සාජ්ජය පටන්ගෙන සෑහෙන වේලාවක් ගොස් ඇති බැව් පැහැදිලිය.

දන්නා හඳුනන මැජික් අරිෂ්ඨ කිහිප වර්ගයක්ම මේසය උඩ විරාජමානව වැජඹෙද්දී, ඔවුන් හට සහයෝගය දෙන්නට නමක් ගමක් රහිත අමුතු පැහැයක සගයන් කිහිප පොළක් ඒ වටා අරක්ගෙනය. කාමරය පුරා පැතිර තිබුණු සුවඳත් සමග ඒ මොනවාද යන්න ගැන වැඩි සැකයක් මා හට ඇති වූයේ නැත.

ඉන් එක නේපාල ජාතිකයෙක් මා වෙත පැමිණ අතට අත දී අචාර කරද්දී ඔහු අපට ආපන ශාලාවේදී හමු වූ අයෙක් බව හදුනා ගැනීමට අපහසු වුයේ නැත. හිස්ව තිබුණු තට්ටු ඇඳක උඩ තට්ටුව මා හට භාවිත කල හැකි බව කැඩුණු ඉංග්‍රීසි බසින් පැවසූ ඔහු පාවහන් යුගල ගලවා ගමන් මල්ල බිමින් තැබීමටවත් ඉඩක් නොදී ඔවුන්ගේ සාජ්ජයට එකතු වන ලෙස ආරාධනාවක්ද කළේය.

ඉක්මනින් ඇඟපත දොවාගෙන සැප නින්දකට වැටීමට තිබුණු අදහස කණ්ඩා කාමරයට ඇතුළු වනවාත් සමග ඉදිරි දොරින්ම පලා ගියේ මේ ආකාරයටය. දැඩි ලෙස විඩාවට පත්ව සිටි මා හට මේ පිළිබඳව මුලින්ම ඇති වූයේ තදබල තරහක් උවද ඒ ගැන කිසිවෙකුට පැමිණිල්ලක් කරන්නට සිත ඉඩ දුන්නේ නැත. එවැන්නකින් සිදු වන එකම දේ මේ අහිංසක මිනිසුන් බඩවියත රැක ගන්නා රස්සාවට තට්ටු වීම පමණක් බව මගේ සිත පැවසීය.

ලංකා විදුලිබල මණ්ඩලයේ රාජකාරි කරද්දී මේ හා සමානම පැමිණිල්ලක් කර සේවකයන් කිහිප දෙනෙකුගේ රැකියා අහිමි වීම නිසා ඇති වූ සිත් තැව්ල නිසාවෙන් තාත්තා තම රැකියාවට ආයුබෝවන් කියා ගෙදර ආ හැටි විස්තර කරමින් අම්මා කියූ අතීත කතන්දරයක්ද මෙයට බොහෝදුරට බලපාන්නට ඇතැයි ආපසු හැරී බලද්දී මට සිතේ.

If You Cant Beat em-Join Themකාට උවත් බැට දෙන්නට නොහැකි නම් ඔවුන් හා එකතු වන ලෙස ( If you can’t beat them, join them ! ) කියන ඉංග්‍රීසි කියමනක් මා අසා ඇත, එකල වැඩිමනක් මත්පැන් පානයෙන් වැළකී සිටියත් වැඩි දුර නොසිතා ඔවුන් හා එකතු වීමට තීරණය කළේමි.

මැජික් අරිෂ්ඨ මේසය වටකරගෙන තැබූ කුඩා අකුලන පුටු කිහිපයක් සහ තට්ටු ඇඳන්හි යට තට්ටුවේ වාඩි ගත් නේපාලි ජාතිකයන් කිහිපදෙනෙක් එබී බලනු දුටුවෙමි. බමන මතින් සිටියද ඒ සියලු දෙනා කුලෑටි ලෙස මා සමග සිනාසුන ආකාරයට මසිත වූ තරහ සැනෙකින් අතුරුදහන්ව ගියේය.

මේ  උදවිය අතරින් යම් පමණකට ඉංග්‍රීසි භාෂාව කතාබහ කළ හැකි අය සිටියේ දෙදෙනෙකු පමණකි, එනිසා අපගේ කතාබහ කැඩුණු ඉංග්‍රීසි සහ හින්දි යන දෙභාෂාවෙන්ම සිදු කරන්නට වීම මා හට එතෙක් තිබු වෙහෙස වෙනුවට විනෝදයක් ගෙන දුන්නේය.

රැස් වී සිටි කණ්ඩායම ගබඩා සහායකයන්, ආපනශාලා සේවකයන්, කෝකියන්, කාර්යාල සේවකයන් ආදී කඳවුර තුළ විවිධ රැකියාවන්හි නියුතු නේපාලි ජාතිකයන්ගේ සම්මිශ්‍රණයක් විය. මින් බොහෝ දෙනා සුපිරි කොම්පැනියේ අවුරුදු කිහිපයක් සේවය කළවුන් වූහ.

ඇෆ්ගනිස්ථානයේදීම සාදන අතින් රෝල් කරන ලද ෆිල්ටර් නොමැති සිගරට්ටු කිහිපයක් මාවෙත පිළිගැන්වූවද මා දුම් නොබොන බව පවසමින් මා එය කාරුණිකව ප්‍රතික්ෂේප කළෙමි.

මෙලෙස කණ්ඩායම දැන හඳුනා ගන්නා අතර ප්ලාස්ටික් කෝප්පයක දැමූ දෙහි යුෂ පැහැති මැජික් අරිෂ්ඨ වීදුරුවක් අතින් අත මාරු වී මා අතට ලැබුණේය. ඒ සමාගම ඉන් නාස් පුඩු දවන තරම් වහනය වන සැරත් සමගම මෙය පහසුවෙන් ගොඩ යා හැකි කර්තව්‍යයක් නොවන බව මා හට ඉඳුරාම පැහැදිලි විය.

මින් ගැලවීමට වෙනත් විදිහක් නොමැත මා වට පිට බැලුවේ බීම තනුක කර ගන්නට වෙනත් පානයක් එනම් ශැන්ඩි කරන්නට යමක් ඇත්තේද යන්නයි. අවාසනාවට සැර අඩු එකම දෙයකට තිබුණු බීරද අවසන්ය, හදිසියට වතුර බෝතලයක්වත් නැත. මේ නේපාලි ජාතිකයන් හට ශැන්ඩි පිළිබඳ වැඩි විශ්වාසයක් නැති ගානය, ඔවුන් බොන්නේ වෙනත් කිසිවක් උදෙසා නොව අමු අමුවේ වෙරි වෙන්නටමය.

පටන් ගත් දෙය අහවර කල යුතු නිසා හැමදාමත් රැජිනගේ පසුපස යනවා වෙනුවට නේපාලි බසින් චියර්ස් කියන ආකාරය අසා දැන ගත්තෙන් “ශුබ්කාම්නා” යයි සුභ පතා එක උගුරට ගිල දැමුවෙමි. මා එතෙක් විවිධ මත්පැන් රස බලා ඇතත් මේ ගැන විස්තර කල හැකි පහසුම ආකාරය නම් පෙට්‍රල් මිශ්‍ර කළ පල් වූ පළතුරු යුෂ බීමකටය.

මුලින්ම මාගේ නාස්පුඩු සහ ඇස් වලින් ගින්දර පිටවනවා මෙන් දැනුණි ඉන් අනතුරුව ඉහ මොළ රත් වී උගුර කට පිච්චීගෙන බඩට ගිය ගිනිවතුර මුළු බඩම ගිනියම් කරද්දී වාසනාවට අවන්හලෙන් ගෙනැවිත් තිබුණු කටගැස්ම කිහිපයක්ම මා හනික ගිල දැමුවේ බඩ දැවිල්ල නවත්වා ගැනීමටමය. බඩට හලා ගත් දේ ආපසු නොදමා සිටීමට නොසෑහෙන උත්සාහයක් ගැනීමට සිදු වූ බව කණ්ඩාට අද මෙන් මතකය.

නේපාලියන් මේ පළතුරු යුෂවලින් පෙරූ මත්පැන් ගිල දමන්නේ වතුර බොනවාටත් වඩා පහසුවෙනි, එනිසා මා මුහුණ දුන් අපහසුව නේපාලි ජාතික හට මහත් විනෝදයක්ම වූ නමුත් මා සාදයට එකතු වීම ඔවුන් හට එයටත් වැඩි සතුටක් ගෙන ආවේය. ඉන් පසුව පිටතට ගිය එක් නේපාලියෙක් පළතුරු බීම බෝතල් දෙකක් සමග නැවත පැමිණියේ මා ගැන අවධානයෙන් සිටි නිසාම විය යුතුය.

මෙම අරිෂ්ඨ හැඳින්වීමට හදන අකාරය, ස්ථානය, දේශය, ගුණ-අගුණ, අමුද්‍රව්‍ය, අනුව දෙස්-විදෙස් නම් බොහොමයකි. වෙල් ෆැන්ටා, කසියා, බොකු දිරාස්, මූන් ෂයින්, හිල් බිලී පොප්, කචල් ෆැන්ටා ආදී එකී මෙකි නොකී අටෝරාසියක් තිබුණත් මේ සියල්ලට පොදු සාධක කිහිපයක් ඇත. හැමවිටම නීතියට පිටින් පැවතීම, ඉහළ නැටුම් තෙල් ප්‍රතිශතය, තැපෑලෙන් වැදීම මෙන්ම පසුවදා ඇහැරෙද්දී නිසැකවම තමන් සතුව ඔළුවක් ඇති බව දැන ගැනීමට හැකි වීම ඒ තර ප්‍රධානය.

පළමු වඩියට අනතුරුව පානය කළ හැම වඩියකටම වැඩියෙන් පලතුරු යුෂ මිශ්‍ර කර ගත් නිසා අපහසුවෙන් උවද කබරයා නොදමා ජාම බේරා ගැනීමට මා සමත් වූ බැව් කියන්නට සතුටුය, මොනවා බිව්වත් බොන තැන කබරයා දැමීම තරම් වස විලි ලැජ්ජාවක් තවත් නැත. එසේ නොවන්නේ නම් කල යුතුව ඇති එකම නම්බුකාර දේ කවුරු කොපමණ පෙරැත්ත කළත් නොබී සිටින එකමය.

දෙකක් දා ගන්නා  අතර මග මා හට මතක් වූයේ මේ අරුම පුදුම පානයෙන් සන්තර්පණය වන උදවිය බොරැල්ල පසු කරන විට මරදාන සිටින වුන් ඒ පිලිබඳ දැන ගන්නා බවය, හෙට උදේ පාන්දර කන්තෝරුවේ කිසිවෙක් මේ පිලිබඳ අවධානයෙන් නොසිටියොත් හොඳය.

නොයෙක් ලේබල් සහිත වෛවාරණ බෝතල් තිබුණත් වැඩි වෙලා යන්නට මත්තෙන් ඒ සියල්ලෙහිම අන්තර්ගතය මා කලින් රස බලන්නට යෙදුණු නේපාලි කසිප්පුම බව තහවුරු කර ගතිමි. මේ සියල්ල කඳවුර තුළ ආරක්ෂාව සපයන සහ සෝදිසි කිරීම වල නියැලෙන ආරක්ෂක භටයින් නොදැනුවත්ව සිදු වනවා යයි සිතීමට අපහසුය. අනිවාර්යයෙන් නේපාලි ජාතික ආරක්ෂක භටයන්ගේ සහය මේ සඳහා තම රටවාසීන් හට හිමි වන බව පැහැදිලිය.

මේ බීම නිපදවන ආකාරය පිළිබඳ මා ඔවුන්ගෙන් විමසු විට බලාපොරොත්තු වූ පරිදිම ඔවුන් කියා සිටියේ ඒවා පළතුරු යුෂ පල් කිරීමෙන් කඳවුර තුළම නිපදවන බවයි. ඇති තරම් පළතුරු යුෂ ආපන ශාලාවෙන් ලබා ගැනීමට ඉඩ කඩ තිබුණු නිසාත් නේපාලි ජාතිකයන් කිහිපදෙනෙක්ම ආපනශාලාවේ සේවයේ නියුතු නිසාත් ඒ වෙනුවෙන් අමුතු කරදර වන්නට කාරියක් නැත.

එමෙන්ම මෙහි ඇති සැර ගන්ධය සහ අමිරසට හේතුව නැවත පෙරීමක් හෙවත් ආසවනයක් සිදු නොවන නිසා බව මා හට වැටහුණි. මෙය තලු මරමින් රසට බොන දෙයක් නොව නාසය වසාගෙන දිව නොතෙමෙන්නට උගුරට හලා ගන්නා ජාතියකි.

තම පවුල් වලින් ඈත්ව ඇෆ්ගනිස්ථානයේ වාසය කරනා බොහොමයක් විදේශීය සේවකයන්ගේ දිවිය සැප පහසු නැත. මුදල් ඉපයීම අතින් වැඩදායක උවත් මුදල් යනු ජීවිතය නොවේ. කාලය ගෙවා දැමීම සඳහා ඇති විනෝදාංශද සීමිතය. එනිසා කන බොන උදවිය නිතර දෙවේලේ හැන්දෑ වරුවට සෙට් වීම හෙවත් සාජ්ජයන් දැමීම සුලභය, මානුෂිකව බලන කල ඒ ගැන ඔවුන් හට වරදක් කියන්නට නොහැකිය.

පසුව දැන ගත් ආකාරයට මේ කඳවුරු තුළ බෝකුදිරාස් වලට නේපාලියන් ප්‍රසිද්ධියක් උසුලන්නා සේම කිතුනු මලයාළියන් හෙවත් කේරළ වැසියන් පළතුරු වයින් නිපදවීමට හපන්ය. එනිසා මේ උදවියට පින් සිද්ධ වන්නට මැජික් අරිෂ්ඨ සඳහා තහනම් පැනවූ කඳවුරු වල පවා තිබහ නිවා ගන්නට අපහසුවක් නැත්තේය 😀

ශැන්ඩි ලෙස පළතුරු යුෂ ලැබුණු නමුත් තරමක අපහසුවෙන් වඩි කිහිපයක්ම හිස් කිරීමෙන් අනතුරුව නේපාලියන්ට ස්තුති කළ මා එතනින් නැගිට්ටේ ඇඟ පත සෝදාගෙන පැය කිහිපයක හෝ නින්දක් ලැබීමට අත්‍යවශ්‍ය නිසාය. කටගැස්මට පින්සිදුවන්නට බඩ දඟලන ගතිය තරමක් අඩු උවද මේ මැජික් අරිෂ්ඨය වදින්නේ තැපෑලෙන් බව වැටහුණේ නැගිටිද්දී දැනුණු හිස බමන ගතිය නිසාය.

මා හට ලැබී තිබුණේ සමුහ නිදන කාමරයක් බැවින් එහි කාමරයටම යාබදව නානකාමර සහ වැසිකිළි පහසුකම් නැත, ඒ සඳහා වෙනම නානකාමර සහ වැසිකිළි පද්ධතියක් කාමර වලට පිටතින් සාදා ඇත. නාන කාමර පිහිටා ඇති තැන නේපාලියන්ගෙන් අසා දැන ගත් මම අවශ්‍ය ඇඳුම් කැඩුම් කිහිපයක් ගෙන නැවතත් එළියට බැස්සෙමි.

හිස බමන නමුත් තවමත් කෙළින් ඇවිදිය හැකි මට්ටමක සිටි නිසා මා මුලින්ම බැලුවේ අහල පහළ ආරක්ෂක භටයන් සිටීද යන්නයි. තවත් වරක් හැඳුනුම් පතත් නොමැතිව ආරක්ෂක භටයන්ට හසු වී කරදරයේ වැටීමට කිසිඳු අදහසක් මා තුල නොවීය, එසේ උවහොත් මා බීමතින් කියනා ඕනෑම නිදහසට කාරණයක් බීරි අලින්ට වීණා වැයීමක් වනු ඇත.

ළඟ පාතක කිසිවෙක් පෙනෙන්නට නොවූයෙන් මදක් ඈතින් පිහිටි නාන කාමරයට ඇරියස් පඩි ගන්නට ක්‍රීඩා අමාතයංශයට දුවන සුසන්තිකා මෙන් වැඩි සද්දයක් නැතිව අඩියට දෙකට ගොඩ වැදුනෙමි.

මහ රෑ ජාමයේ නිසා නාන කාමර පාළු සොහොන් පිටියක සිරි ගත් අතර අහල පහළ බල්ලෙක්වත් පෙනෙන්නට නැත, වැඩි දුර නොසිතාම උපන් ඇඳුමෙන් මා නාන කුටියකට රිංගා ගත් බව මතකය. කණ්ඩා හට පොදු ස්ථානයක එවන් නිදහසක් ලැබුණේ බොහෝ කාලයකට පසුවය.

පාසලේ වක්පොලු ක්‍රීඩාවෙන් අනතුරුව මිතුරන් සමග පාසල් ක්‍රීඩා පිටියේ ලකුණු පුවරුව යට තට්ටුවේ තිබුණු නාන කුටියෙන්ද පසු කලෙක එය වසා දැමූ පසුව නේවාසිකාගාරය භාර ගුරුතුමා හෙවත් රෝබාට හොරෙන් නාන කාමරයට රිංගා උපන් ඇඳුමෙන් වෙහෙස යනතුරු ඇති පදම නා කියා ගත් කාලයවන් නිදහසක් ආපසු ලැබෙතැයි සිතිය නොහැක 😦

කඳවුරේ කාමර දහයකින් පමණ සමන්විත නාන කාමර පද්ධතියේ උණුවතුර පහසුකම් තිබීම වාසනාවකි. දැඩි සේ විඩාවට පත් වූ මොහොතක උණුවතුර ස්නානයක් යනු කාන්තාරයක වතුර නැතිව මැරෙන්නට යන මිනිසෙකුට වතුර හමුවීම තරම්ම සතුටට පත්විය හැකි කාරණයකි. හදිසියට නා ගන්නට පැමිණියත් ඇවිත් තියෙන්නේ සබන් කෑල්ලක් පවා නැතිවය.

ඌරන්ට මොන සෞඛ්‍යයද කියන්නා සේ එය ලෙහෙසියෙන් අමතක කර දැමූ මා, වෙරි බසින තෙක් ජල කරාමයට ඔළුව අල්ලාගෙන සිටියත් තත්වය එන්න එන්නම දරුණුවට හැරෙන ගානය. නේපාලියන්ට සහ බෝකුදිරාස් වලට පින්දෙමින් ඔලුව කැරකිල්ල යනතුරු සිටීම හැරෙන්නට වෙන කරන්නට දෙයක්ද නොමැත.

නාන කාමරයට වී කොපමණ වෙලාවක් ගත කළාද යන්න ගැන මතකයක් කණ්ඩාට නැත, බමන මත එන්න එන්නම වැඩි වන පාටය. කෙසේ හෝ ආපසු කාමරයට පැමිණෙන විටත් කිහිපදෙනෙක් මේසය වටා සිටි බව තවමත් යාන්තමට මතකය. ඔවුන් හට සුබ රාත්‍රියක් පතා මා තට්ටු ඇඳ උඩට නැග ගත්තේ කෙසේද කියා හෝ නින්ද ගියේ කොයි වෙළේද කියා මතකයක් අදටත් මා හට නැත  😀

ඒ නේපාලි මැජික් අරිෂ්ඨයේ විශ්වකර්ම බල මහිමයයි !!!

~ මතු සම්බන්ධයි !

මා දුටු ඇෆ්ගනිස්ථානය ~ VII කොටස ~ කාබුල්හි සුපිරි කඳවුර !

Advertisements