ඒ කාලෙකට කලින් මා කුඩා කාලයේ පටන් තදින් හිත ගත්තු අසහාය මිනිසෙක් ගැන ඉදිරිපත් වුණු රූපවාහිනී වැඩසටහනක නම. එහෙම කොටු වෙච්චි නැති, කොටු කරන්න හැදුවත් බැරි වෙච්චි මිනිස්සු ඉන්නේ කීයෙන් කී දෙනාද ? මේ ලිපියටත් එහෙම නම දාන්න හිතුනෙ අද වෙනකම් මේ කියන “මනුස්සයා” ගැන මම අහපු හොඳම අර්ථ දැක්වීම නිසා.(ඒ වැඩ සටහනේ ලින්ක් එක පහලින් ඇති )
පහුගිය සති කිහිපයේම ප්රේම් ගැන හොඳ නොහොඳ දෙකම අහන්න ලැබුනත් අද උදේ පාන්දරම පටන් ගත්තෙ මහ මුස්පේත්තු විදිහට, හේතුව පාන්දර ඇස් පොඩිකරමින් තේක බොන ගමන් දවසට කියවපු මුල්ම ලිපියෙන් ආයෙත් මතක් කරා ප්රේම් කියන යෝධයෙක් වගේ පුංචි මිනිහව කලාවට කැමති ලක්ෂ ගාණක් මිනිස්සුන්ගෙන් සදහටම උදුරා ගත්තු දවස කියල.
අපි කුඩා කාලෙ ශනිදා ආයුබෝවන් වැඩ සටහන බලන දවස් වල රූප පෙට්ටියේ එහා කොනේ හිටපු ප්රේම් අංකල් අනිත් උදවියට වඩා වෙනස් කියල එදත් දැනුන, හයක් හතරක් තේරෙන්නෙ නැති කාලෙත් ඒ මනුස්සය තුළ අමුතු ලෙන්ගතුකමක් දැක්ක.
දැනට අවුරුදු විසි නමයකට කලින් කරුමක්කාර දවසක (1989 අගෝස්තු 1 වෙනිද) කණ්ඩගෙ දෙමව්පියන් අහල පහළ උදවිය ළඟ ඥාතියෙක් නැති උනාටත් වැඩියෙන් තවත් මිනිසෙක් වෙනුවෙන් දුක් උනා, අම්මගෙ ඇස් වල නම් කඳුළුත් තිබුණ අද වගේ මතකයි.
ඒ ගැන වැඩි තේරුමක් නොතිබුණත් ඉන් පස්සෙ ආපහු කවදාවත් වෙනදා වගේ ශනිදා ආයුබෝවන් වැඩ සටහන හිතට වදින විදිහට නැති බව වගේම අමුතු හිස් බවක් එදා හිටපු අවුරුදු අටක කොලුවෙකුටත් තේරුණා.
නමුත් ශනිදා ආයුබෝවන් වලින් එහාට ගිහින් පහු කාලෙක අදුර ගත්තු විදිහට වරක්වත් හැබැහින් නොදැක්කත් මගේ කියවීම අනුව ප්රේම් කියන්නෙ මිනිස්සුන්ට අයිති කන බොන නාඩි වැටෙන ඇඟ පුරා කාලාව පිරිච්ච සුන්දර මිනිහෙක්.
දැන් දවස් කිහිපයක් ඉඳන් හැම තැනම වගේ ප්රේම් ගැන ගුණ වැයීම් සහ ප්රේම් ගැන මතකයන් අයිති කරගන්න හදන උත්සාහ, මම ඒකෙ කොහෙත්ම වැරද්දක් දකින්නේ නැහැ. මොකද ප්රේම් හැම දෙනාටම අයිති මිනිසෙක්.
කලාව බල්ලට යවන බාල දේවල්ම මාකට් වෙන වර්තමානයේ මෙහෙම හරි ප්රේම් වගේ අයිති කරගන්න වටිනා වස්තුවක් ගැන කතා බහට ලක් වෙන එක කොයිතරම් දෙයක්ද, ඉතිං තරහ අරන් මොකටද ?
අද ප්රේම් හිටියනම් ඒ මනුස්සය අතින් තව කොයිතරම් නම් නිර්මාණ බිහි වෙන්න තිබුණද කියල හිතෙනකොට හීල්ලෙනවා 😦
මේ යන රැල්ලත් එක්ක ප්රේම් වගේ උදවිය අයෙත් එන්නෙ නැහැ කියල මතක් වෙනකොට දුකයි නමුත් අපේ පරම්පරාව ඉන්නකං වත් අඩු ගානේ ප්රේම් ගැන මතකය තියේවි, මේ ප්රේම් වෙනුවෙන් මගේ ආචාරය.
ප්රේම් ගැන වැඩි විස්තර : http://www.premakeerthidealwis.com
පසු ලිපි :
මට තේරුම් ගන්න බැරි සම්භාව්ය දේට වඩා තේරෙන සරල දේ ඇඟටම පත්තියන් වෙන නිසාදෝ මේ තමයි ප්රේම්ගෙ නිර්මාණ වලින් මම කැමතිම එක. තම තමන්ගෙ ක්ෂේත්ර වල පතාක යෝධයින් තුන් කට්ටුවක් එකතු වෙලා හැදුණු “කුණ්ඩුමණී” ප්රේම් ගැන මතක් වෙන වාරයක් ගානේ අදටත් නොදැනීම මිමිනෙනව.
~ කණ්ඩා
කුණ්ඩුමනී …
මන්නාරම් පිටි වැල්ලේ
මදටිය වැල් ඔංචිල්ලේ
කොණ්ඩෙ කඩං
හඳට අඬං සිංදු කියන්නී…
කුණ්ඩුමණී
කුණ්ඩුමණී කුණ්ඩුමණී
කුණ්ඩුමණී කුණ්ඩුමණී
නැහැයෙ කරාබුව දෙකනේ
කඩුක්කන් දමා සියොළඟ
මොට්ටක්කිළියෙන් හැඩ කොට
වසා ඉඟ නමා
උලුඳු කොටා තල වේලා
තල් පත මත ගිනි අවුවේ ලා…
කුණ්ඩුමණී
කුණ්ඩුමණී කුණ්ඩුමණී
කුණ්ඩුමණී කුණ්ඩුමණී
සෙම්බු තාලි උකුළෙ හොවා
ආඬි ළිඳෙන් දිය ඇදලා
ලූණු පාත්තියට දමා විඩාපත් වෙලා
හැන්දෑවට කෝවිල් ගොස්
පොල් ගහලා නළලේ අළු ගා…
කුණ්ඩුමණී
කුණ්ඩුමණී කුණ්ඩුමණී
කුණ්ඩුමණී කුණ්ඩුමණී
ගොම ඉහලා හැදූ ගෙබිම
පිච්ච මලින් සරසාලා
කෙසෙල් ගස් දෙකක්
දොරකොඩ සිටුවා තබලා
කොම්බු කතම් මෘදංග නද
මුළු ගමටම හඬවා දීලා…
කුණ්ඩුමණී
කුණ්ඩුමණී කුණ්ඩුමණී
කුණ්ඩුමණී කුණ්ඩුමණී
සණ්ඩු කරල බැණුම් අහල
හැංගි හැංගි බැන්ද ප්රේමෙ
මහ රාජා ආ කල ගෙට
තිරික්කළෙන් බැසලා
කුණ්ඩුමනී යන පෙරහැර
බලා හිඳීමි කීකරු වීලා…
කුණ්ඩුමණී
කුණ්ඩුමණී කුණ්ඩුමණී
කුණ්ඩුමණී කුණ්ඩුමණී
පද රචනය: ප්රේමකීර්ති ද අල්විස්
තනුව හා සංගීතය: වික්ටර් රත්නායක
ගායනය: ෆ්රෙඩී සිල්වා
පින්තූර ඉස්සුවේ :
- https://www.newstrails.com/sri-lankan-stars-who-visited-the-uae-25-years-ago
- http://methinksatnation.blogspot.com/2014/08/notes-from-daughters-diary.html
- https://www.facebook.com/Premakeerthi-de-Alwis-158468857577449/
ජූලි 31, 2018 at 11:52 පෙ.ව.
පේ්රම් මගේ ලෝකයේ සදාතනික විරයා. ඔහුව මරාදැම්මා අහපු දවසේ ලෝකයම කඩාවැටුනා වාගේ. උඹ වාගේම මමත් බොහෝ දුක්වුනා. පේ්රම් මරානොදැමුවානම් අර්ථවත් ගීත පදරචනා කොපමණ ප්රමානයක් ලියන්න තිබුනාද මේ අවුරුදු විසි නමය ඇතුලේ.
සිරුරින් කුඩාවුවත් කලා ලෝවේ දැවැන්තයෙක්වු මගේ විරයාට නිවන් සුව පතමි.
කැමතියිLiked by 1 person
ජූලි 31, 2018 at 1:00 ප.ව.
කොයි අතින් බැලුවත් දරන්න බැරි පාඩුවක් බං, ප්රේම්ගෙ සමකාලීනයෝ අතර ගත්තත් මේ හා සරලව ලොකු දෙයක් කියන්න දක්ෂ මම දන්නා තරමින් අතලොස්සයි. ඒ වගේම මහ සරල විදිහට ජිවත් උණු චරිතයක්.
මොනවා කරන්නද හොද මිනිස්සුන්ට ආයුෂ අඩුයි කියන එක ගම පළාත් වල තියන කියමනක්, ඒක සමහර විට ඇත්ත වෙන්න ඇති 😦
ඒ නිසා මාත් මේ ලෑස්ති වෙනවා කාලෙක ඉඳන්, උඹත් දැම්ම ලෑස්ති වෙයං අවුරුදු 100 ක් විතර ජීවත් වෙන්න 😀
කැමතියිකැමතියි
ජූලි 31, 2018 at 5:13 ප.ව.
1980 දශකයේ ඉපදුණු අපි ප්රේම් වගේ අයගේ නිර්මාණ අහන්න දකින්න වාසනාවන්ත වුණා වගේම අපිට යමක් කමක් තේරෙන කාලය වෙනකොට මේ අය ඇසුරු කරන්න නොලැබීම අවාසනාවක්. අදටත් අපි නිතර මුමුණන ගීත බොහෝමයක් ප්රේම කීර්ති සහ ඒ සමකාලීනයන්ගේ නිර්මාණ. ඇත්තටම ඒ නිර්මාණ තමයි අදකාලේ සමාජයේ හොයාගන්න අමාරු හදවතේ තෙතමනය කියන දේ අපිට හුරුකලේ.
ලංකාවෙන් දුරස් වෙලා ඉන්න අපිට ප්රේම්ව මතක් කරපු එකට උබට ස්තුතියි.
කැමතියිLiked by 1 person
ජූලි 31, 2018 at 5:30 ප.ව.
ස්තුතියි බණ්ඩෝ ගොඩ වැදුනට. ඔව් ඒක හැබෑව. එයිට පස්සෙ පරම්පරාවක දුකා, නිලාර් N කාසිම් වගේ කිහිප දෙනෙක් මතු උනාට ප්රේම්ට කිට්ටු කරන්න කවුරුවත් නැති එක අපේ කාලකණ්නි කමද මන්ද බං 😦
අනික එහෙම එවුන් හිටියත් ඉන් කී දෙනෙක් ටයර් මාල දාගෙන යන්නම යන්න ඇද්ද ?
කැමතියිකැමතියි
අගෝස්තු 1, 2018 at 9:23 පෙ.ව.
+++++++++++++++
කැමතියිLiked by 1 person
අගෝස්තු 1, 2018 at 9:38 පෙ.ව.
වැට ගහල නම් මදි, We want MORE !
කැමතියිකැමතියි
අගෝස්තු 3, 2018 at 8:30 පෙ.ව.
//නමුත් අපේ පරම්පරාව ඉන්නකං වත් අඩු ගානේ ප්රේම් ගැන මතකය තියේවි// නෑ මන් හිතන්නෙ ඔබෙන් පසු පරම්පරාවෙ එකෙක් වෙලත් මගේ කියවීමත් ඔබේ ප්රේම් ගැන කියවීම හා සමානයි. මිනිස්සු මැරෙයි ඒත් ප්රේම්ගේ පද තුළින් ප්රේම්ව විදින මිනිස්සු මේ ලෝකෙ අවසානයක් වෙනකම්ම ඉපදේවී. ගේය පද රචනාවලින් මන් හොල්මන් කළ පද රචකයා ඔහුයි. ඒ නිසා අසමසම යන යෙදුම ඔහුට වඩාත් සුදුසුයි. ඔහුගේ පෞද්ගලික ජීවිතයේ වූ අතිශය කර්කශ සිදුවීම් නිසාම ප්රේම්ගේ ගීත වල තියුණු බව වැඩි වුණා යැයි කියලයි මට හිතෙන්නෙ. මට වෙලාවකට හිතෙනවා මිනිහෙක්ගෙ ඔළුවට එච්චර ලස්සන පද එන්නෙ කොහොමද කියලා. ප්රේම් ගැන හිතීමත් වෙලාවකට උමතුවක්.
“සද දිය කර කිරි වතුරෙන්
ඒ දියරෙන් මුව දෝවා
නැලවිලි ගීයෙන් ගීයෙන්
මතකයි මා නැලවූවා
ජීවිතයෙන් ජීවිතයක් ගෙනදී
ඒ ජීවිතයට කිරි දි පණ දී
මා දැඩි කළ අම්මා”
මෙහෙම මිනිස්සුන්ට ලියවෙන්නෙ කොහොමද ? ඉතින් ප්රේම් කියන්නෙ ඇත්තටම උමතුවක්?
කැමතියිLiked by 1 person
අගෝස්තු 3, 2018 at 5:53 ප.ව.
වෙන දේ ගැන වරදිනකොට අවුල් උනාට මේ සම්බන්ධයෙන් මම වැරදි එක ගැන අප්රමාණ සතුටක් රොමා 🤗
කැමතියිකැමතියි