සාජා සිට මස්කට් වෙත …
අපායට ගියත් කලින් යන්නට ඕනෑ යයි කියමනක් කණ්ඩා අසා තිබේ, එමෙන්ම හැකි සෑම අවස්ථාවකදීම එය අකුරටම පිළිපදින්නේ ඉන් අත්වන වාසි අත්දැකීමෙන් දන්නා නිසාය.
මස්කට් බලා යන ගමනේත් වැඩි වෙනසක් නැත, අපායටත් කලින් යන්නට උවමනා නම් රටතොට බලන්නට යන විනෝද ගමනකට එයිටත් කලින් පිටත් නොවන්නට කිසිම හේතුවක් නැත්තේය.
පාන්දර හතරට පමණ අප නිවසින් පිටත්වන වෙලාවේ පාරේ රථවාහන කිසිවක් නොවූ බැවින් සාජා හොල්මන් නගරයක සිරි ගත්තේය.
පාන්දරින් යන ගමන් ගැන ලොරි ටෝක් දුන්නද කණ්ඩා සහ හාමිනේගේ නිදිමතේ අඩුවක් නැත්තේය, “කල්බා – ඕමාන්” (Kalba – Oman) දේශ සීමාව වෙත ළඟා වන්නට තව පැය දෙකකට ආසන්න කාලයක් යන බැවින් උණුසුම් යමක් බොන්නට තිබුණෝතින් හොඳය.
එනිසා කල්බා වෙත යන අතරමග මලීහා පාරේ ඇති අපට හුරුපුරුදු ඉන්ධන පිරවුම් හලක වූ කැෆෙටේරියාවට ගොඩ වූයේ කෝපි එකක් බොන්නට සිතාය. නමුත් වාහනයෙන් පිටතට බට වහා වේගවත් සුළඟත් සමග ගත වෙලා ගත් කීරි ගැහෙන සීතල කණ්ඩා බලාපොරොත්තු වූ දෙයක් නොවේ.
කෝපි සහ අනෙකුත් අඩුම කුඩුම කිහිපයකුත් රැගෙන වාහනයට පැමිණි පසු උෂ්ණත්වමානය 14 °C ක තරම් පහතට බැස ඇති බව පෙන්නුම් කළේය.
සාජා මෙතරම් සිතල නම් මස්කට් කෙසේ වියහැකිදැයි යන විචිකිච්චාවක් අප හිතේ මතු වුණද, සෑහෙන තරම සීතලට ඔරොත්තුදෙන ඇඳුම් රැගෙන පැමිණි නිසා එය බාධාවක් නොවනු ඇතැයි හිත හදා ගත්තෙමු.
කණ්ඩා ඔටුවන්ගේ රටේ මෙතක් කල් සවාරි යද්දී මග සොයා ගැනීමට භාවිත කළේ ඉතා නිවැරදිව සජීවී මග සලකුණු (Navigation) ලබා දෙන “ගූගල් මැප්ස්” (Google Maps) මෘදුකාංගයයි.
නමුත් සාජා සිට ඕමාන්හි “ශිනාස්” (Shinas) වෙත ගමන් මග ඉල්ලූ විය ගූගල් දෙයියෝ අහක බැලූවේ ඇයිද කියා කණ්ඩාට තේරුණේ නැත, සිතියමක් ලෙස යායුතු මාර්ගය පෙන්වූවත් එමගින් මග සලකුණු ලබා දෙන්නේ නැති බව කණ්ඩා වටහා ගත්තේය. ඇතැම් විට ඒ යායුතු ගමනාන්තය රටක දේශ සීමාව පනිනා නිසා විය හැක.
වාසනාවට ඕමානය වෙත ගමන ඇරඹීමට පෙර සතියේ GPS මාර්ගයෙන් මග සලකුණු සපයන පද්ධතියක් හෙවත් සැට්නැව් උපාංගයක් (SatNav) අප වාහනයට සවි කල හෙයින් ගමන ගැන බයක් සැකක් නැත.
අප කල්බා දේශ සීමාව වෙත ළඟා වන විට පෙරවරු 6:00 ට කිට්ටු කර තිබෙන්නට ඇත, සුපුරුදු පරිදි “අසලාම් අලෙයිකුම්” (As-Salaam-Alaikum) යනුවෙන් අරාබි බසින් සුබ පැතූ අප දේශසීමා මුරපොලෙහි වූ ආගමන විගමන නිලධාරියා වෙත ගමන් බලපත්ර ඉදිරිපත් කළෙමු.
නිදි මතේම “වාලයිකුම් සලාම්” (Wa-Alaikum-Salaam) යනුවෙන් පෙරළා මිමිණූ ඔහු තරමක් වෙලා ගමන් බලපත්ර පෙරළමින් පරික්ෂා කර අපෙන් විමසා සිටියේ වාහනය ඕමාන් වෙත ගෙනයාමට බැංකුවෙන් විරුද්ධත්වයක් නොමැති බවට සහතික කරනා ලියවිල්ලක් (NOC – No Objection Certificate) අප වෙත තිබෙනවාද යන්නයි.
අප සතුව එවන් ලියවිල්ලක් නොමැති බවත් ඒ පිළිබඳව කලින් දින බැංකුවෙන් විමසූ කල එවැනි ලියවිල්ලක් අනවශ්ය බව ඔවුන් පැවසූ බවටත් පොඩි පහේ “පිනෝ කියෝ” කතාවක් ඇද බෑවේ වාසනාව උරගා බලන්නටය**
** චතුරට ගල් පැලෙන කෙබර කෙළින්නට පුළුවන් නම් අප වැන්නන් කාටවත් අහිතක් නොවන බොරුවක් ඉඳහිට හීනියට කියුවාට කම් නැතැයි සිතමි 🙂
නමුත් අවාසනාවට එය ඵල දැරුවේ නැත, “හත්තා” (Hatta) දේශ සීමා මුරපොල වෙත යන මෙන් පවසා පිටවීමේ සීල් ගැසූ කොළයක් දී අපව ආපසු හරවා එවන ලද්දෙන් එතනින් පිටත් වූ අප හත්තා බලා පිටත් වීමු.
මෙවන් දෙයක් සිදු විය හැකි යයි කලින් අපේක්ෂා කළ නිසා අප පුදුමයට පත් නොවුණත් හත්තා දේශ සීමා මුරපොලිනුත් අප හරවා යවයිදෝ යන චකිතය දෙදෙනා තුළම විය.
කල්බා සිට හත්තා වෙත කිලෝමීටර 70 ක පමණ දුරක් ඇත්තේය, වැඩි දුරක් නොවුනද කඳු පල්ලම් සහ දඟර ගැහෙන වංගු සහිත මාර්ගය නිසා කණ්ඩා හාමිනේට පුරුදු පරිදි වංගු කෙළින් කරන්නට බැරිය, එනිසා අපට හත්තා වෙත ළඟා වීමට තවත් කාල වෙළාවක් ගතවෙනු ඇත.
යම් කිසි හේතුවක් නිසාවෙන් හත්තා සීමාවෙන්ද ඕමාන් වෙත ඇතුළු වීමට නොහැකි උවහොත් ඇති එකම පිළියම එදිනම දහවල සාජා හෝ ඩුබායි සිට මස්කට් බලා යන බස් රථයකට හෝ ගුවන් යානයකට ගොඩවීම පමණි.
එසේ උවහොත් රස්තියාදුවට අමතරව කණ්ඩා හාමිනේ විසින් වාහනයට පටවා ගත් ලොරි භාගයක පමණ බඩු වලින් අඩකට වඩා නැවතත් ගෙදර දමා යන්නට වනවා පමණක් නොව ඕමානයේ රවුම් ගසන්නට මස්කට් වලින් තවත් වාහනයක්ද කුලියට ගන්නට සිදු වන්නේය.
නමුත් විනෝද ගමන ගැන බොහෝ බලාපොරොත්තු තබාගෙන සිටිනා නිසා වෙනදාට මෙවැනි අකරතැබ්බයන් වලට මුහුණ පෑ විට “චව් චව්” ගාන හාමිනේගෙන්ද මෙදා පොටේ වැඩි කරදරයක් නැත්තේය, එනිසා එන පොටකට මුහුණ දීමට බලාගෙන ඉදිරියට යාම මිසක වෙනත් ගැටළුවක් නැත.
හත්තා දේශ සීමාවේ එක්සත් අරාබි එමීර් රාජ්යයට අයත් මුරපොළේදී අපට පෙර මෙන් කරදරයකට මුහුණ දීමට සිදු වූයේ නැත, නියමිත ගාස්තු ගෙවූ පසු ගමන් බලපත්රයන්හි රටින් පිටවීමේ මුද්රා තබන ලදී (Exit Charges and Stamps).
වෙනදා ගුවන් තොටුපොළේදී මුහුණ දෙන ආගමන විගමන නිලධාරීන්ගේ පුළුටු මුහුණු සහ නොසැලකිලිමත් භාවය මෙහිදී දක්නට නොලැබුණත් සුපුරුදු පරිදි කාගේවත් මුහුණක සිනහවක් ඇඳී තිබුණේද නැත.
එක්සත් අරාබි එමීර් රාජ්යයේ දේශසීමා මුරපොළ පසු කල පසු ඕමාන මුරපොළ වෙත යා යුතුය, එහිදී බොභෝ විට සිදු වන්නේ ගමන් බලපත්ර පිරික්සීමයි නමුත් අහඹු ලෙස තෝරා ගන්නා වාහන රට තුළට ඇතුළු වීමට පෙර පරික්ෂාවට ලක් කරනු ලැබේ.
ඔවුන් අනෙකුත් වාහන සියල්ලන් මග හැර අපගේ වාහනයම පරික්ෂාවට තෝරා ගනු ලැබුවේ අපගේ වාසනාවේ තරම නිසා විය යුතුය. නමුත් කාල වෙලාව ගත වනවාට වඩා තිබුණු ලොකුම කරදරය මේ ආරක්ෂක නිලධාරින් හට ඉංග්රීසි බැරිකමය. එය ඔවුන්ගේ ප්රශ්න වලට පිළිතුරුදීම සහ අදහස් හුවමාරු කර ගැනීම ඉතා අපහසු කාරියක් බවට පත් කළේය.
නමුත් මේ ඕමාන ජාතික නිලධාරින් සියලු දෙනා ඉතා තරුණ අය වූ අතර නිතරම සිනා මුසු මුහුණින් සිටිනා ප්රියමනාප පුද්ගලයෝය, එක්සත් අරාබි එමීර් රාජ්යය සහ ඕමානය අසල්වැසියෝ උවද මේ දෙරටේ වැසියන්ගේ හැසිරීමේ රටාව සහ ආකල්පයන් අතිශය වෙනස් බව නොකියාම බැරිය.
අප වාහනට පරික්ෂා කිරීමට පැමිණි ආරක්ෂක නිලධාරියා අවුරුදු 20 – 22 ක තරුණ හාදයෙකි, වාහනයේ පිටුපස දොර හැර දුන්නාට අමතරව ඔහු කියනා කිසිම දෙයක් මා හට හෝ මා කියනා කිසිම දෙයක් ඔහුටත් නොතේරුණ බව කණ්ඩාට ඉර හඳ සේ විශ්වාසය 🙂 🙂
උඩින් පල්ලෙන් වාහනේයේ ඇති බෑග් මල්ලක් දෙකක් පිටතින් ඔබා බැලුවාට වඩා යමක් ඔහුගෙන් සිදු වූයේ නැත. නමුත් වාහයේ වූ ප්රථමාධාර පෙට්ටිය ගැන විශේෂ උනන්දුවක් පෙන්වමින් ඒ ගැන ඇසූ ප්රශ්න සියල්ල කණ්ඩාට අන්ඩර දෙමළයක්ම විය.
එබැවින් කරන්නට තිබුණු එකම දෙය හෙවත් මේ හාදයාට කැමති දෙයක් කරගන්නට කියා ප්රථමාධාර පෙට්ටිය විවෘත කර දී කණ්ඩා පසෙකට වූයේය.
සීරුවට ප්රථමාධාර පෙට්ටිය ඇවිස්සූ මේ හාදයා එතුළින් සුළු තුවාල සඳහා අලවන පැලැස්තර කාඩ් පතක් එළියට ගත්තේ මත් කුඩු පාර්සලයක් සොයා ගත්තාටත් වඩා සතුටකින් සහ උනන්දුවෙනි.
එය පෙන්වමින් මොන මොනවදෝ ඔටු භාෂාවෙන් විමසුවත් සුපුරුදු පරිදි මට ඒ අණ්ඩරය නොතේරුණ නිසා ඔළුව වැනුවා මිස කිසිත් නොකිව්වෙමි. මට කාරණය තේරුණේ මේ හාදයා තම ඇඟිල්ලක වූ ඇසට නොපෙනෙන තරමේ තුවාලයක් පෙන්වූ විටය.
මේ හාදයා මෙපමණ වේලා දඟලා ඇත්තේ අපෙන් පැලැස්තර කැබැල්ලක් ඉල්ලා ගන්නටය, තුවාලයේ තරම දුටු මා හට පණ යන්න හිනා ආවත් ඉතා අමාරුවෙන් තද කරගෙන සිටියෙමි 🙂 🙂 🙂
මෙපමණ වෙලා මේ මනුස්සයා කරන්නේ මොනවාද කියා පිරික්සන්නට තවත් නිලධාරියෙක් පැමිණියේ ඔය කියනා අතරය, කොලුවා ඔහුටද තම තුවාලය පෙන්වූ කළ ඔහු මහා හඬින් හිනා වෙමින් මොනවාදෝ කියූවෙන් ලැජ්ජාවෙන් රතු වූ කොලුවා ඔහුට බැන වැදී එළවා දැම්මේය.
නමුත් ඉන් නොනැවතුණු දෙවැනි හාදයා මදක් එහායින් සිටි තවත් නිලධාරීන් කිහිපදෙනකු සමගින් බඩ අල්ලාගෙන සිනහවෙමින් කොලුවාව බයිට් එකට ගත්තේය …
“ශුක්රාන්” යයි මා හට ස්තුති කල ඔහු පැලස්තරය අලවා ගන්නා අතර ඇඟිල්ලට සිදුවුයේ කුමක්දැයි මා විමසුවත් එය නොවැටහුනු කොලුවා ඇඹරෙමින් අරාබි බසින් මොනවදෝ මිමිනුවේ අපට යන්නට බව ඉවෙන් මෙන් වටහා ගත් අප එහි තවත් නොරැඳී එන්නට ආවේය.
මුර පොළ පසු කර කිලෝමීටර දෙකක පමණ දුරක් ඕමානය තුළට ගමන් කළත් වීසා කවුන්ටරයක් පෙනෙන තෙක් මානයක නැත, වීසා නැතිව නන්නාඳුනන රටකට ඇතුළුවීම හිරේ විලංගුවේ වැටෙනා කාරණාවකි.
දැනගෙන ගියොත් කතරගමය – නොදැන ගියොත් අතරමග යයි කතාවක් ඇත (මට නම් කතරගමත් ගො** පමණක් යන අතර මගක් පමණි 🙂 )
තවත් දුර ගොස් ආපසු හැරී එනවාට වඩා යන තැනක් නිසැකවම දැනගෙන යාම වටින්නේය, කණ්ඩාට මතක් වූයේ අපව පරික්ෂා කළ මුරපොල කිට්ටුවෙන් පොලිස් ස්ථානයක් තිබු බවය.
ඒ නිසා වහාම පාර දෙපස වෙන් කර ඇති වැලිගොඩ උඩින්ම “U” ටර්න් එකක් දමා ගත් අප නැවත මුරපොල වෙත කිට්ටුව තිබුණු පොලිස් ස්ථානය වෙත ගියෙමු.
මුරපොලෙහිදී මෙන් නොව ඉංග්රීසි කතාබහ කරනා උදවිය එහි සිටි බැවින් අදහස් හුවමාරු කර ගැනීමට කරදරයක් තිබුණේ නැත, ඉතා අචාරශීලීව ඔවුන් පැවසුවේ වීසා නිකුත් කරනා ස්ථානය ඇත්තේ තවත් කිලෝමීටර් 5 ක තරම රට තුළට වෙන්නට බවයි.
ඔවුනට ස්තුති කල අප නැවතත් පාරට බැස මද දුරක් යද්දී මාර්ගයට සමාන්තරව නොගැඹුරු හත්තා නිම්නය දිගේ කම්මැලි කමට ගලා බසිනා දිය පහරක සුන්දරත්වය විඳ ගන්නට අවස්ථාව ලැබුණේය. ඒ ක්ෂේම භූමි පුරා වතුර සපයන “ෆලාජ්” (Falaj) ඇරෙන්නට මැදපෙරදිග ස්වාභාවික දිය පහරක් දුටු පළමු වතාවය.
එක්සත් අරාබි එමීර් රාජ්යයේ “වාදි වුරයා” (Wadi Wurayah) හිත් මෙවැනිම දිය පහරක් මෙන්ම දිය නෑ හැකි පොකුණුද ඇති බව අසා තිබුණත් කණ්ඩා එය හැබැහින් දැක නැත්තේය.
වරක් “ඊද්” (Eid) නිවාඩුව සමයේ ලැබුණු ඉස්පාසුවෙන් එහි ගිය කණ්ඩා ඇතුළු මිතුරන්ට ආපසු හැරී එන්නට සිදු වූයේය. ඒ අවට දහස් ගණනින් කඳවුරු බැඳගත් පටාන්වරු බෙලිකපන චාරිත්රය ඉටු කිරීමෙන් අනතුරුව එළුවන් පලඟමින් බුදීමේ නිරතව සිටි හේතුවෙනි.
තැන තැන විසි කර දමනා ලද සිරිසඟබෝ බවට පත්වූ එළු ඔලූ, අඩක් කුණුවී දුර්ගන්ධය හමනා අතුනුබහන් අපවෙත ගෙන ආවේ පිළිකුලකි, ගෙරිමස් කෑවද එය බෙල්ලේ එල්ලාගෙන නොකෑම වැදගත්ය.
ඉතා සුන්දර පරිසරයක් ඇති මේ ප්රදේශය හඳුනා ගත නොහැකි තරම් අපවිත්රව තිබෙනු දුටු කණ්ඩා හට ඇති වූයේ දුකකටත් වඩා දැඩි තරහකි. සර්කස් වල නොයෙක් සතුන් හට මිනිසුන් කරනා වැඩ කරන්නට පුරුදු පුහුණු කළත් ඇතැම් සතුන් හට මිනිසුන් සේ හැසිරීමට ඉගැන්වීම අපහසුය.
ඇස් දහසකගේ (කාමුක) බැල්මන්ට යටත්ව ඉන්නට අපට කෙසේ වෙතත් කාන්තාවන් හට අනාරක්ෂිත මෙන්ම බලවත් අපහසු කාර්යයක් බැවින් එවර අප ආපසු හැරී ගොස් “ඩිබ්බා”(Dibba) හි මුහුදු වෙරළක කඳවුරු බැඳ රාත්රිය ගත කළෙමු.
පසු කලෙක මේ ප්රදේශය ආරක්ෂිත පාරිසරික කලාපයක් බවට කර ඇතුළු වීම තහනම් කල බැවින් ආපසු එහි යන්නට අවස්ථාවක්ද නැත්තේය.
ඕමානයේ කිලෝමීටර හදා ඇත්තේ රබර් වලින් විය යුතුය, මන්ද වීසා නිකුත් කරනා කන්තෝරුව පිහිටි “අල් වජාජා” (Al Wajajah) දේශ සීමා මුරපොල වෙත ලඟා වීමට කිලෝමිරට 7 – 8 කටත් වැඩි දුරක් ගමන් කරන්නට සිදු වූ නිසාය.
කිව්වා සේම යායුතු ගොඩනැගිල්ල සොයා ගැනීමට අපහසුවක් නොවුණු නිසා වාහනය එළියේ නවතා ඇතුළට ගිය අපට උදේ පාන්දර නිසාදෝ දිග පෝලිමකට මුහුණ දීමට සිදු වූයේ නැත, ඉන්නේ සූ .. ගා හතර පස් දෙනෙකු පමණි.
වීසා අයදුම්පත් දෙකක් සම්පුර්ණ කළ පසු අපගේ වාරය පැමිණෙන තෙක් කවුන්ටරය අසලට වී සිටිද්දී කණ්ඩාගේ නෙත ගැටුනේ පිටුපස බිත්තියක ඇලවූ ඕමානයේ වර්තමාන පාලකයා වන “සුල්තාන් කබූස්” ගේ (Sultan Qaboos) ජීවමාන ප්රමාණයේ ප්රතාපවත් පින්තුරයකි.
තද නිල් පැහැති ගාම්භීර මිලිටරි නිල ඇඳුමකින් සැරසුණු ඔහු ඉතා තියුණු නෙතින් වීසා අයදුම්කරුවන් දෙස ඇසිපිය නොහෙලා බලා සිටිනවා වැනිය.
වීසා කවුන්ටරයේ තරුණ ඕමානින් දෙදෙනෙකි, ඔවුන් පිටුපස තරමක් තලතුනා වයසේ ජේෂ්ඨ නිලධාරියෙක් සක්මන් කරන්නේය, අප ගමන් බලපත් ඉදිරිපත් කල පසු එය පරික්ෂා කිරීමෙන් අනතුරුව කවුන්ටරයේ සිටි තරුණයා තම ජේෂ්ඨයා වෙත පෙන්වා යමක් පැවසීය.
කණ්ඩා කල්පනා කළේ පාත් වන්නට යන මේ ගිනි ගෙඩිය කුමක්ද ? යන්නයි, අද දවස ඇතුළත එක මුරපොලකින් අපව හරවා ඒවා ඇති බැවින් තවත් එවන් කරදරයක් අපට අනවශ්යය.
අපගේ ගමන් බලපත් දුටු සැණින් කටේ සිට කන දක්වා දිග සිනහවක් මුහුණේ ඇඳගත් ඔහූ “ආආආ ශ්රි ලංකා නුවාරා එළියා, කුලම්බෝ, වෙල්කම් ! වෙල්කම් !” යයි වචන ලැයිස්තුවක් කියවාගෙන යන්නට වුයේ අප හොල්මන් කරමිනි.
බලාගෙන යන විට ඔහු ඊයේ පෙරේදා සිරි ලංකාව වෙත සංචාරයකට ගිය පුද්ගලයෙකි, භාෂාවේ අඩුපාඩුකම් නිසා වැඩි අදහස් හුවමාරුවකට ඉඩකඩ ඇහිරුවත් කරදරයකින් තොරව ඉතා ඉක්මනින් වීසා ලැබුණු හෙයින් ඔවුන් හට මුව පුරා ස්තුති කර එළියට බැස්සේ සැහැල්ලු සිතකිනි.
අප සවාරියේ පළමු නැවතුම්පොළ වූ පැරණි ශිනාස් බලකොටුව (Shinas Fort) වෙත අප ලඟා වන විට උදෑසන අට පමණ වන්නට ඇත, මේ පළාතේ බොහෝ පෞරාණික ගොඩනැගිලි මෙන්ම මෙයත් පිහිටි ප්රදේශයේ සුලභව ඇති අමුද්රව්ය වන මැටි, ගල් සහ රටඉඳි ගස් භාවිතයෙන් ගොඩ නැගූවකි.
අවාසනාවකට බලකොටුව ඉබි යතුරු දමා වසා දමා තිබූ හෙයින් එතුළට ඇතුළු වීමට අවස්ථාවක් නොලද්දෙමු, ගොඩනැගිල්ල වටා රවුමක් ගසා පිටතින් පින්තූර කිහිපයක් රැගෙන සැනසීමට අපට සිදුවිය.
කිහිප වාරයක් සීතලේ එළියට බැස ඇවිද්ද නිසාදෝ සති කිහිපයක් තිස්සේ අප දෙදෙනා පෙළමින් තිබුණු කැස්ස සහ උගුරේ අමාරුව තවත් දරුණු අතර හැරීගෙන එන බවක් පෙන්නුම් කළේය.
දොස්තරවරුන්ටත් වඩා වෙද හෙදකම් දන්නා හාමිනේගේ පිහිටෙන් සහ කෙටි විවේකයකින් සියල්ල හොඳ අතට හැරුණොත් හොඳය, නැතහොත් සිදු වන්නේ සාජා සිට මස්කට් වෙත පැමිණ රෝහල්ගත වන්නටය.
ඒ සමගම කණ්ඩා හාමිනේගේ විඩා බර මුහුණ දුටු කළ කණ්ඩාට දුක සිතුණේය, එබැවින් ගමන් මග සහ නරඹන්නට ඇති තැන් වෙනස් කරනවාද යන දෙගිඩියාවක සිර විය.
~ මතු සම්බන්ධයි !
මාර්තු 23, 2017 at 9:04 පෙ.ව.
ඒ කියන්නෙ එහෙත් හීතලයි. ඔය ඔටුරටවල්ලොල එවුං ලංකාවෙ ඇවිදින්නත් එනවද?
කැමතියිLiked by 1 person
මාර්තු 23, 2017 at 10:13 පෙ.ව.
උං හීත කාලෙට තමයි උන්ගේ රටවල් වල ආතල් ගන්නේ මලේ … !
අවුරුද්ද මැද්දෑවේ මෙහෙ ලේ නටන ගානට ගිනියං වෙනකොට ඇති හැකි එවුන් ආසියාව, යුරෝපය වගේ රටවල සවාරි යනවා 🙂 🙂
එක ගමනක් අපි නුවර නැවතිච්චි හෝටලේ පිරිලා තිබ්බ ඔවුන්ගෙන්, අපේ රටට සල්ලි එනවා නම්, අපේ එවුන්ට රසාවල් ලැබෙනවා නම් එච්චරයි !
කැමතියිකැමතියි
මාර්තු 23, 2017 at 1:08 ප.ව.
//බිත්තියක ඇලවූ ඕමානයේ වර්තමාන පාලකයා වන “සුල්තාන් කබූස්” ගේ (Sultan Qaboos) ජීවමාන ප්රමාණයේ ප්රතාපවත් පින්තුරයකි.//
මෑන්ස් ගේ ෆේස් කට් එක ටිකක් අපේ වෘතීය බ්ලොග් කරුවෙකු ගේ වගේ නේ ද හිටන්?
කැමතියිLiked by 1 person
මාර්තු 23, 2017 at 1:15 ප.ව.
ටිකක් විතර හුරුයි තමා හැබැයි ඩිංගක් වෙන්න පාටයි, මිනිහ ඇවිල්ල රට ගොඩ ගත්ත හැබැවින්ම සොඳුරු ආඥාදායකයෙක් ! අපේ රජා වගේ බේරගත්තු රට උකස් තිබ්බෙ නැහැ 😁
කැමතියිකැමතියි
මාර්තු 23, 2017 at 2:39 ප.ව.
ඔය ලංකාවට එන ගොඩක් අයට සිංහල පුළුවන් වෙනවානේ… ඇති මිනිහාට මිනිහාගේ භාෂාව අමතක වුණේ නැතුවා….
කැමතියිLiked by 1 person
මාර්තු 23, 2017 at 2:54 ප.ව.
මේ අය දවස් කිහිපයකට විතරයිනෙ එන්නෙ එනිසා හැමෝටම එහෙමට කාලයක් ලැබෙනව අඩුයි කුරුටු 🙂
කැමතියිකැමතියි
මාර්තු 23, 2017 at 5:01 ප.ව.
//පාන්දරින් යන ගමන් ගැන ලොරි ටෝක් දුන්නද කණ්ඩා සහ හාමිනේගේ නිදිමතේ අඩුවක් නැත්තේය// මෙන්න මේ කෑල්ල නම් අපි කාටත් පොදුයි වගේ මට පේන්නේ 😀
කැමතියිLiked by 1 person
මාර්තු 23, 2017 at 5:38 ප.ව.
කුකුළා අතේ අරගෙන එළියට බැස්සේ නැති නම් නිකන් ගමන යැවෙන්නේ නැහැ නැහැ වගේ 😀
කැමතියිකැමතියි
මාර්තු 24, 2017 at 9:46 පෙ.ව.
+++++++
කැමතියිකැමතියි
මාර්තු 24, 2017 at 1:44 ප.ව.
හැලප මහතාගේ ලිපියේ අවසන් කොමෙන්ටුවේ “UAE වලදි උදව්වක් ඕනා නම් කියන්න, ෆුජේරා, ලිවා (Fujairah, Liwa) බලන්න බොහොම ලස්සන පැති ” කියලා.
බෙහෙවින්ම ස්තුතියි ඔබගේ මිත්රශීලී කාරුණික භාවයට. ඉඩකඩ ලැබුණ හැටියට සතියක හමාරක සීමිත කාලය තුල උපරිම වශයෙන් බලන්න තියෙන දේ බලාගෙන ගම රට බලා පිටත් වෙලත් දැන් ටික දවසක් වෙනවා.
මම කලින් සැලසුම් කළේ UAE සහ ඕමාන් ගොඩබිමින් ගොස් cover කරන්න. උපරිමයෙන් ට්රයි කලත් රියදුරෙකු සමග වාහනයක් සොයා ගැනීමට නොහැකිවුණා. ඉතිං ගමනේ original plan එක ටිකක් සංශෝධනය කරන්න වුණ. ඇත්තෙන්ම යාමට කලින් ඔබ මෙලෙස හමුවූවා නම් වාහනයක් සොයා දෙන්න; උදව් කරන්න කියලා ඉල්ලා සිටින්න තිබුණ.
හැබැයි ඩුබායි වල බැස්ස ගමන්ම අහම්බෙන් හමු වූ ලංකාවේ තරුණයෙකු සාධාරණ මුදලකට විශ්වාස වන්ත වාහනයක් කථා කර දීමට තරම් අප වාසනාවන්ත වූ බව; ඔහුට උපහාරයක් වශයෙනුත් සටහන් කිරීමට සිත්වුණා. කිසිදු පණ්ඩිත කමක් නොමැති තරුණ පකිස්තානු රියදුරු මහතා අපි කියන ඕනෑම තැනක කිසිදු කන්කෙදිරියකින් තොරව යාමට ඉදිරිපත් වීමත් අපේ වාසනාවම වුණා. මගේ කලින් plan එක ගැන කීවම; ඔවුත් සංචාරකයන් සමග කිහිප වතාවක් ඕමාන් ගොස් ඇති බව කීවා. මොහු කලින් හමුවුවානම්, අපට miss වුණ ඔබ සදහන් කල තැන් පමණක් නොව ඕමානයේ; මා බැලීමට සිතා සිටී බොහොමයක් තැන් cover කර ගන්නත් තිබුණ. 😦
ඒ කියන්නේ ඔබ ඉන්නේ සාජා. අපිටත් සාජා වල පැය කිහිපයක් ගත කරන්න ලැබුණ. එහි යන අතර අපේ රියදුරු තැන, බොහොමයක් ඩුබායිහි රාජකාරි කරන උදවිය පදිංචි වී සිටින්නේ සාජා වල බව කීවා. සාජාහිදී Fish Market, Blue Souk, Souq Al Arsa, Heritage Area එක පැත්තේ එහෙම කරක් ගැහැව්වා. හවස් ජාමේ ඩුබායි-සාජා මායිම කිට්ටුව desert සෆාරි එකක් ගියා.
මම හිතුවේ ඕබ Al Ain වලින් border cross කලා කියලනේ. ඒ නිසා තමා Al Ain වරුණේ අත ඇරලා දැම්මේ “හැලප කඩේ” ඇතුලේ. 😀 කාට හරි ප්රයෝජනවත් වේවි කියලා. (මම බොහොමයක් “tourist attractions” අල්ල ගන්නෙත් web ලිපි වලින් තමා.)
ඉක්මනිම්ම මස්කට් ලිපිය ලියා පළකිරීම ගැන මගේ විශේෂ ස්තුතිය!. ලිපිය කියවා ඒ පිළීබද මගේ කොමෙන්ටුව පසුවට. (Word Press වලත් කොමෙන්ටු කෑලි වලට කඩල දාන්න වේවිද මන්දා. 😀 )
කැමතියිLiked by 1 person
මාර්තු 25, 2017 at 11:08 පෙ.ව.
ඔව්, සජා නැවතී ඉන්න එක ඩුබායි ඉන්නවට වඩා පොකැට්ටුවට හිතකරයි 😀
ඔබතුමා කෙටි කාලයකදී සාජාහි බලන්නට හැකි විශේෂ තැන් සියල්ලම පාහේ බලල තියන්නව. විශේෂයෙන් “සූක් අල් අර්සා” සහ එහි ඇති එමිරාටි බිරියානි කඩය මගේ බෙහෙවින් සිත් ගත තැනක් !
මම මෙහෙ එන යහළු මිත්රාදීන්ට හැකි ලෙස උදව් උපකාර කරනව, මොකද සවාරියේ යන්න කැමති කෙනෙක් විදිහට යන තැනකදී Local Knowledge එක කොයි තරම් වැදගත්ද කියල දන්නා නිසා 😀
කැමතියිකැමතියි
මාර්තු 24, 2017 at 8:20 ප.ව.
ඉඩකඩ ලැබෙන විදිහට භූගත ජලය රැගෙන එන ” falaj systems” ගැනත් වැඩි තොරතුරු ටිකක් ලියන මෙන් ඉල්ලා සිටිමි.
වහින දවස් වල “වාදී ” (Wadi) වලට යන එක ඉතාමත්ම අනතුරුදායක (වතුර වැඩි වන නිසා) බව අසා තියෙනවා.
Boder Cross කරනකොට departure tax එකයි entry fee එකයි කීයක් වුනාද?
අර විදිහට border එකෙන් හරවලා එව්වාම මුළු ගමනම බකල් වෙනවා නේද? මටත් ඔය වගේ පොඩි අත්දැකීමක් තියෙනවා border එකක් cross කරන්න ගිහින්. ඒ adventure එකත් දැන් හිතෙන කොට රසවත් නිසා ඔන්න ඔහේ කොටලා දාන්නම්කෝ. 😀
දැන් අවුරුදු තුනකට හතරකට උඩදී Costa Rica ඉදලා Panama වලට යන්න ගියා. බැලුවම fly කරනවට වඩා මාර ලාබයි බස් එකක යන එක. අනික රට තොට එහෙමත් හොදින් බලා කියාගෙන යන්න හොද චාන්ස් එකනේ.
ටිකක් සොයල බලනකොට, බස් කොම්පැනි දෙකකින් බස් යනවා Costa Rica ඉදලා Panama වලට.
https://www.ticketbuscr.com/international-buses/
මම තේරුවේ “Tica Bus” (“ටිකා බුස්” කියලා තමා එහේ කට්ටිය කියන්නේ.) එක තමා යන්නේ පැනමා සිටි එකට. කොස්තරිකා වල අගනුවර වෙච්ච San Jose (“සැන් හුසේ” කියලා තමා ඒ අය කියන්නේ) බස් terminal එකේ ඉදලා පැනමාවේ අගනුවර වන Panama City වල Albrook කියන ප්රනධාන බස් terminal එකට යන්න පැය 17 ක් විතර යනවා. කොන්දොස්තර හා ඩ්රමවර් මාරුවෙන් මාරුවට එක දිගට එලවනවා. හැමදාම බස් දෙකක් පිටත් වෙනවා එකක් දවල් 12 ට අනික රෑ 12 ට.
මම තේරුවේ දවල් 12.00 ට යන එක. මොකද එලිය තියෙන පළමු පැය හය වට පිට බලා බලා ගිහින් කළුවර වැටුනම ටිකක් නිදාගෙන, පැනමාවට එනකොට උදේ 5.00 විතර වෙන හන්ද එතනත් අවුලක් නැති නිසා. passport copy යවලා paypalpayment එකක් කලාම ticket book කරගන්න පුළුවන් online. ඒ අය dummy tickets email කරනවා. හැබැයි සීට් select කර ගන්න බැහැ call කරලවත්.
බස් එක ඇතුලේ toilet එකක් එහෙමත් තියෙනවා. (trip adviser එකේ තිබුන පිටි පස්ස සීට් වල වාඩි වුනොත් අර වැසිකිලියේ ගද එනවා. එක නිසා පුළුවන් තරම් ඉස්සරහ සීට් එකක් ගන්න බලන්න කියලා.) අපි හිටපු හෝටලේ ඉදලා එයාලගේම shuttle එකක් ගත්ත නිසා ඒ අය අපිව bus terminal එක ලගට එක්ක ගියේ 12.00 ට විනාඩි විස්සක් විතර තියෙද්දී. යනකොට ඉතුරු වෙලා තිබුනේ අන්තිම සීට් දෙක තුන විතරයි. හැබැයි හිතන් හිටිය තරම් අප්ර්සන්න ගතියක් නම් ගමන පුරාවටම දැනුනේ නැහැ වැසිකිලිය ලග තිබුන කියලා. (සමහර විට නාසය ටික ටික අනුවර්තනය වෙන්න ඇති.)
බස් එකේ හිටිය සියලු දෙනාම කතා කලේ spanish වලින්. අපි විතරයි ඉන්දියන් පෙනුමක් තියෙන උදවියකට වගේ හිටියේ. බස් එක හරියටම 12.00 ට පිටත්වුනා. හය – හය හමාර විතර වෙනකොට border එක ලගට ආවා. කට්ටියටම බඩුත් අරන් බහින්න කීවා. හරි හමන් instructions මොනාවත් නැහැ මොනවද ඊලගට කරන්නේ කියලා. කට්ටිය පිටිපස්සේ වැටුන අපි කොස්තරිකා border controll එකට ගිහින් exit fee එක ගෙවලා passport එකට seal එක එහෙම ගහගෙන මීටර් 150 ක් විතර දුරින් තියෙන panama imigration එකට ගියා.
එතන තමා නියම අවුල. සෙනග මහ ගොඩයි ….. ඊලගට යන්න ඕනෑ කොතනටද … කරන්න ඕනෑ මොකක්ක්ද … අහන්න කෙනෙක්වත් අඩු ගන්නේ ඊතලයක් වත් ගහල නැහැ. අපිත් බස් එකේ ආපු අය පස්සේ අරමුණක් නැතිව වැටුණ. තැනකදී කාමරයක් ඇතුලට එක්ක යනවා …. බෑග් අරින්න කියනවා …. ආය වහන්න කියනවා sniffer dogs අරන් කැරකෙනවා. එක කෙලියයි.
කොහෙමින් කොහොම හරි පැය එක හමාරකට වගේ පස්සේ passport control එකට යන්න පුළුවන් වුණා. මම ලග තිබුන passport එක්ක අදාල ලියකියවිලි (return air ticket, hotel transfer voucher, hotel voucher, airport voucher, passport photocopies) සියල්ලම ඉදිරිපත්කලා. man මගෙන් දැන් ඉල්ලනවා credit card information. මම credit card එක දුන්නම කියනවා කෝ bank letter එක කියලා. මොකක්ද බොලේ ඒ කියලා අහපුවම කියනනවා මේ card එකේ අවම වශයෙන් $500 ක available funds තියෙනවා කියා බැංකුවෙන් ලියුමක් තියෙන්න ඕනෑලු. මම කීවා, අවංකවම ඕබ දැන් මේ කියනකල් මම bank letter එක ගැන දන්නේ නැහේ…. හැබැයි ම ලග pre-arrange hotel transfer එකක් තියෙනවා ඉන්න හෝටලේට ඉන්නකල් අදාල සියලුම ගාස්තු ගෙවලා තියෙනවා. හෝටලේ සිට ආපසු එන්න tranfer එක තියෙනවා. return air ticket එක තියෙනවා. $ 500 ක් තරම්ම නැති වුනත් යම් මුදලක් අතෙත් තියෙනවා. අනික මේ credit card ඕනෑවටත් වඩා available funds තියෙනවා. කියලා man; bank letter කියලා දෙපාරක් විතර කියලා අපේ කොළ ටිකයි passport ටිකයි පැත්තකට තල්ලු කරලා මට එහා පැත්තේ ඉන්න කෙනාගේ ඒවා ගත්ත.
දැන් මොකෝ කරන්නේ. මේ යකා අතින් passport එකක් වත් එහෙමෙහෙ වුනොත් මොන දෙය්යන්ට කියන්නනද. මොඅරමුනක් නැතිව මම එකටම ඇහැ ගහගෙන ඉන්නකොට අනිත් පැත්තේ හිටපු officer Spanish වලින් මොනවද කීවා. අර මනුස්සයා මට පස්සේ ගත්ත passport ලියකියවිලි අනිත් පැත්තෙන් තියලා ඕනෑවට එපාවට වගේ අපේ passport වලට සීල් ගහලා මගේ දිහා බලන්නෙත් නැතිව කවුන්ටරේ උඩට විසි කලා. 😀
කැමතියිLiked by 1 person
මාර්තු 25, 2017 at 11:33 පෙ.ව.
ෆලාජ් ගැන “අලෙයින් පැත්තේ ගහපු රස්තියාදු වල විස්තර එක්කම දාන්නම් 🙂
ඔබ තුමාගේ ගමන් විස්තරය බොහොම රසවත් එකක්, කොමෙන්ටුවකට වඩා බ්ලොග් එකක වෙනම ලිපියක් ලියන්න තරම් වැදගත්. එක කියවපුවම මටත් ඒ ගමන ගියා වගේ දැනුණ.
ඔබතුමාට බ්ලොග් එකක් තියනවද ? කැමතියි ඔබ ලියන දේ කියවන්න.
මම දන්නා විදිහට ඔබ පැවසූ කොස්ටරීකා වගේම ඒ අවට ඇති මෙක්සිකෝ, ෆ්ලොරිඩා කීස්, කියුබාව සහ බටහිර ඉන්දීය දූපත් මුහුදුබඩ සංචාරයකට කියාපු ප්රදේශ.
එයිට අමතරව යෝසෙමිටි, ග්රෑන්ඩ් කැන්යන්, ස්මිසෝනියන් වගේ තැන් මගේ හීනයක්, ඒ හීනය කවද හැබෑ වෙයිද දන්නේ නැහැ .
ට්රම්පයිය හා කිව්වොත් ඒ පැත්තේ ගොහින් එන්න අදහසක් තියනවා 😀
කැමතියිකැමතියි
මාර්තු 26, 2017 at 7:11 පෙ.ව.
අගෙයි. ඉතුරු විස්තර ටිකත් දාමු බලන්න.
කැමතියිLiked by 1 person
මාර්තු 26, 2017 at 7:28 පෙ.ව.
ස්තුතියි ප්රසන්න !
කැමතියිකැමතියි
මාර්තු 27, 2017 at 7:27 ප.ව.
//ෆලාජ් ගැන “අලෙයින් පැත්තේ ගහපු රස්තියාදු වල විස්තර එක්කම දාන්නම් :)//
නියමයි !…. හරිම සතුටුයි. ඒ පිලිබද වැඩි තොරතුරක් දැන ගැනීමට ලැබෙනු ඇතැයි බලාපොරොත්තු වෙනවා.
අනේ මට බ්ලොග් එකක් නම් නැහැ.
හැබැයි කාලයක් තිස්සේ අපේ අයගේ බ්ලොග්ස් අසාවෙන් කියවනවා වගේම ඉඩ ලැබෙන විදිහට, සිත්ගත් ලිපි වලට කොමෙන්ටුත් කොටනවා.
ඉතින් ඔබගේ සිහින සංචාර ඉක්මනින්ම යථාර්ථයක් වී අපටත් ඒ පිලිබද තොරතුරු, ඔබේ “කොලම ” හරහා කියවීමට ලැබේවා යැයි පතනමි.
ඔබ “ග්රෑන්ඩ් කැනියන්” කියන කොට මතක් වුනේ …… මා අපගේ ග්රෑන්ඩ් කැනියන් ගමන සැලසුම් කලෙත් “සමකය වටේ” බ්ලොග් එකේ පළවූ “ග්රෑන්ඩ් කැනියන් ” සංචාරක ලිපියකට ස්තුති වන්නටය. Yesomite නම් යන්න ලැබිලා නැහැ. ග්රෑන්ඩ් කැනියන් – “සවුත් රීම්” ආසන්නයේ වන Sedona Red Rock Park (Arizona) වගේම Nevada වල Las Vegas කිට්ටුව පිහිටා ඇති Valley of Fire park, Red Rock Canyon park වගේ තැන් වල ස්වභාවිකවම නිර්මාණය වී ඇති විවිධ වර්ණ සහ හැඩයන්ගෙන් හෙබි සුවිසල් පාෂාණමය රූරටා වලටත් ඔබ කැමති වේවි.
Yesomite සහ Las Vegas අතර අමුතුම පරිසර තත්වයනගෙන් සමන්විත California වල Death Valley උද්යානය අවස්ථාවක් ලදහොත් කිසි විටක මග නොහැරිය යුතු ස්ථානයකි. උතුරු ඇමෙරිකාවේ වියලීම සහ කර්කශ-උණුසුම්ම දේශගුණයක් පවතින “ඩෙත් වැලි” වල, පෘතුවියේ බටහිර අර්ධගෝලයේ පහත්ම ස්ථානයද පිහටා ඇත. මෙය මුහුදු මට්ට්මේ සිට අඩි 282 පහතින් වන අතර උද්යානය පුරාම වගේ දක්නට ලැබෙන මිටියාවත් සහ කඳු මවන්නාවූ විව්ධාකාර නෙත් කළු එහෙත් තරමක් ආගන්තුක පරිසර රටාවන්, අප වෙනත් ග්රහලොවකට රැගෙන ගියා සේය.
ග්රෑන්ඩ් කැනියන් ආ දිනක අනිවාර්යෙන්ම දැකගත යුතු තවත් අපුරු නිර්මාණයක් වන්නේ; Arizona / Nevada බෝඩරයේ ඇති “Hoover Dam” ව්යාපෘතිය. ග්රෑන්ඩ් කැනියන් හරහා ගලා බසින කොලරාඩෝ ගංගාව වාර්ෂිකව ගොඩගැලීමෙන් පහත් බිම් වලට සිදුවන විනාශය පාලනය කිරීමත්, වියලි-කර්කෂ කැලිෆෝනියා හා ඇරිසෝනා වල ඇති වගා බිම් වලට වසර මුළුල්ලේ ස්ථාවර ජලසම්පාදනයක් ලබාගැනීමත් ජලවිදුලිය නිෂ්පාදනයත් අරමුණ කොට, නවසිය විසි ගනන් වල අවසානයේ සිට රටේ පැවතී ආර්ථික අවපාතයත් හේතු කොට ඉදිකරන ලද සුවිසල් බැම්ම සහ ජලාශය මා දැක ඇති විශිෂ්ට ඉංජිනේරුමය නිර්මාණ අතුරින් ඉදිරියෙන්ම ඇත.
ඔබ “ස්මිසෝනියන්” ලෙස සදහන් කලේ https://www.si.edu/visit ද?
ඔබ “මුහුදුබඩ සංචාරයක්” යන්නෙන් අදහස් කලේ “Cruise Ship” එකකින් යන්නාවූ සංචාරයක් පිළිබදවද ?
විසිරී ඇති කුඩා බටහිර ඉන්දීය දුපත් කිහිපයක එකවර සංචාරය කිරීමට ඇති හොදම ක්රමය තමා Caribbean Cruise එකක් ගැනීම. නමුත් එක් රටක ගතකිරීමට ලැබෙන කාලය ඉතා සීමිත වීම එහි මා දකින අඩුපාඩුවකි. එබැවින් ගොඩ බසින රටවල ඇති තමා කැමතිම වැදගත්ම යැයි සිතෙන tourist attraction එකක් හෝ දෙකක් කලින්ම target කරගෙන පළමුව නරඹා සහ පසුව කාලය ඉතිරිවුවහොත් වැඩිදුරටත් දෙවනු යමක් සදහා පෙරසැලසුම් සකස් කරගෙන ගියේනම් දුපතෙන් දුපතට වෙනස් ඇවතුම් පැවතුම් / ජීවන රටා / භූවිෂමතා …. වැනි දේ ගැන අදහසක් ලබාගැනීමට; ලැබෙන සීමිත කාලය ප්රමාණවත්.
මැක්සිකෝ, කියුබාව (ඔබාමා ගිහින් ආවට පස්සේ, දැන් කියුබා වලටත් cruise ships යනවා) වගේ ලොකු රටක යනවා නම් කෲස් ගමනක් තෝරා ගන්න එපා. හේතුව ඒ රටවල දින කිහිපයකදිවත් දැකලා ඉවර කර ගැනීමට නොහැකි දේ තිබීමයි.
මෙක්සිකෝ යනවනම් “Yucatan Peninsula” Cancun තෝරාගන්න. කැන්කූන් වල සංචාරකයන්ට විශේෂ ආරක්ෂාවක් තිබීමත්, ඉපැරණි මායා ශිෂ්ටාචාරයට අයත් නටබුන් ඇති Chichen Itza, Coba, Ek’ Balam, Tulum වැනි සුවිශේෂී ලෝක උරුම සංචාරක ආකර්ෂණ වෙත ඉතා පහසුවෙන් ලඟා වීමට ඇති පහසුවත්; ආසන්නයේ පිහිටුවා ඇති “Xcaret”, “Xel-Ha” වැනි සිත්ගන්නා theme parks තිබීමත්; ලගන්නා මුහුදු වෙරළ තීර බොහොමයක් තිබීමත් එයට හේතුව.
කියුබාවේ කොහේ ගියත් දක්නට ලැබෙන සැම සියලු දේම – ඕනෑම කෙනෙකුට, තමා නැවතත් එකදාස් නවසිය බර ගනන් වලට ගියා වගේ හැගීමක් ඇති වෙනවා කියලා මට හොදටම විස්වාසයි. ඒ තරටම වෙනස් !
කියුබා යනවනම් දින දෙක තුනක් වගේ “Havana” සහ තව දින කිහිපයක් ස්පාඤ්ඤ හා ප්රංශ ආභාෂයෙන් ඉතා පිළිවෙලකට ඉදිකොට ඇති ආකර්ෂණීය පැරණි “Cienfuegos” නගරය තෝරාගන්න පුලුවන්නම් වඩා වටිනවා. එහිදී ඉතා පහසුවෙන් අවට ඇති කුඩා නගරවල සැරිසැරීමෙන් ඓතිහාසික (ඉතා පැරණි මෙන්ම විප්ලවයට පෙර හා පසු ආදී) දේ මෙන්ම රට-තොට, ජනජීවිතය වැනි දේ පිලිබදව සැහීමකට පත්විය හැකි තරමේ අදහසක් ගතහැකි වීම එයට හේතුවයි.
කියුබා යන කෙනෙකු අනිවාර්යෙන්ම යායුතු තවත් සුවිශේෂී තැනක් මට හැගෙන්නේ යටත් විජිත පැරණි නගරයක් වන Trinidad. https://en.wikipedia.org/wiki/Trinidad,_Cuba ජීවමාන කෞතුකාගාරයක් වන මෙම නගරය යුනෙස්කෝ ලෝක උරුමයක් ලෙස නම් කොට අනාගත පරපුර වෙනුවෙන් සුරැකීම අගය කල යුත්තකි. එහි පවතින එදා ඉදිකොට තිබු අජීවී දේ පමණක්ම නොව වර්තමානයේ එහි ජීවත් වන සාමාන්ය වැසියන් මෙන්ම එහි දක්නට ලැබෙන සතා සිව්පාවන්ද මෙම සජීවී කෞතුකාගාරයේ ප්රදර්ශක භාණ්ඩය.
සමාවන්න. ලියාගෙන යනකොට, අතීත රසවත් සිද්ධි මතක්වූ නිසා මෙන්ම මනසින් එහි සරන්නට වූ හෙයින්, නොදැනිම සෑහෙන්න දිගට ලියවුණා. 🙂
ස්තුතියි!
කැමතියිLiked by 1 person
මාර්තු 28, 2017 at 4:55 පෙ.ව.
මම සංචාරය කරන්න බොහොම කැමතියි … ඔබ මේ ලියන විස්තර කොමෙන්ටුවක් පමණක් විදිහට තබන එක අපරාධයක් … 😦
මේ දැනුම කොමෙන්ට් කියවන දෙතුන් දෙනෙකුට වඩා වැඩි දෙනෙක් එක්ක බෙදා හදා ගන්න ඕන වටිනා දේවල් !
ඔබතුමා කැමතිද බ්ලොග් එකක පටන් ගන්න ? මම කැමතියි හැකි හැම උපකාරයක්ම කරන්න 🙂
( මම බ්ලොග් ලියන්න පටන් ගන්නකොට අනෙක් උදවිය මට උදව් කළා – I would like to pay it forward )
එයට අකමැති නම් ඔබේ නම ගම දුන්නොතින් මම කැමතියි මෙයට තවත් විස්තර ඇතුලත් කර ලිපියක් විදිහට දමන්න.
// ඔබ ” ස්මිසෝනියන් ” ලෙස සදහන් කලේ https://www.si.edu/visit ද? // – ඔව්, මම කෞතුකාගාර පිස්සෙක් “ස්මිසෝනියන්” සහ “ලුව්” යන එක පොඩි කාලේ ඉඳල හීනයක්
//ඔබ “මුහුදුබඩ සංචාරයක්” යන්නෙන් අදහස් කලේ “Cruise Ship” එකකින් යන්නාවූ සංචාරයක් පිළිබදවද? // – ඔව් නමුත් ඔබ කියූ කරුණ සහ එක තැනකට බොහෝ කාලයක් කොටු සිටීම මට එතරම් දිරවන දෙයක් නෙමෙයි, එනිසා තවම ඒ ගැන තීරණයක් නැහැ 🙂
කැමතියිකැමතියි
මාර්තු 30, 2017 at 4:25 ප.ව.
ඇත්තෙන්ම මමත් කැමතියි මා ලැබූ අත්දැකීම්, ඒ සදහා උනන්දුවක් ඇති අය හා සමග බෙදාහද ගැනීමට. ඒ නිසාමයි ටිකක් දීර්ඝව කොමෙන්ටු ලියන්න හිතුවේ ඔබ වැනි සංචාරක ලිපි ලියවෙන බ්ලොග් වල.
// ඔබතුමා කැමතිද බ්ලොග් එකක පටන් ගන්න ? මම කැමතියි හැකි හැම උපකාරයක්ම කරන්න :)//
ස්තුතියි !! ඔබට මගේ ආචාරය …….!
මම හිතන්නේ බ්ලොග් එකක් ලියන එක සැම කෙනෙකුටම කරන්න පුළුවන් කාරියක් නෙමේ. හොදින්, සරලව මෙන්ම නිවැරදිව භාෂාව හැසිරවීම ….. නිතර ලිපි සම්පාදනය ….. විවිධත්වයකින් යුතු ලිපි සම්පාදනය …. වැනි ඉතා වැදගත් රීති සමග සලකා බැලීමේදී; මා සිටින්නේ ඔබලාට වඩා ගව් ගණනක් පසු පසින්. 🙂
කුමන හෝ ගමනක් යාමට කලින් ඒ සම්බන්ධයෙන් බොහෝ කරුණු අන්තර්ජාලය, පුස්තකාල පොත්, පුවත් පත් ලිපි ආදියෙන් සොයා බලා දැනුවත් වීම මගේ සාමාන්ය පුරුද්ද. දැන් කල්පනා කරලා බලනකොට ටික කලකට ඉහත අසාවෙන් සොයා කියා ගත් දේ බොහොමයක් සම්පුර්ණයෙම්ම වගේ අමතක වෙලා. අඩුම වශයෙන් කටු සටහනක් වත් තියා ගත්තා නම් වටිනවා නේදැයි කියලා හිතෙනවා.
කෙසේවෙතත් “elakiri.com” වගේ තැනකට ලිපියක් දෙකක් සම්පාදනය කිරීමේ අදහසක් තියෙනවා. එසේ ලිපියක් ලියා පළකළහොත් මා ඔබට අදාළ link එක ලැබෙන්න සලස්වන්නම්.
මේ ඒක නෙමේ “ජුමේරා” වල “Al Wasl Road” එකේ තියෙන ඉරාන ඉස්පිරිතාලෙ දැක්කා. ඒක බාහිර පෙනුම (Persian architecture) හරිම ලස්සනයි. ඉරානයේ ඇති අයිතිහාසික දේ පිළිබදවත් ඔවුන්ගේ ළගන්නා ගෘහනිර්මාණ ශිල්පය පිළිබද ලියවුණ ලිපි කාලයකට කලින් කියවූ බව මතකයි.
ඇප්ගනිස්ථානය වගේ තැන් වලත් ගිහින් අත්දැකීම් තියෙන ඔබට අදහසක් නැද්ද ළග තියෙන ඉරානය පැත්තේ ටිකක් ඇවිදලා එන්න…. 🙂
කැමතියිLiked by 1 person
මාර්තු 30, 2017 at 5:52 ප.ව.
ඩුබායි වල නිර්මාණ ශිල්පය පැත්තෙන් ගත්තහම බලන්න දේ ඒමට තියනවා.
මම භාෂා විශාරදයෙක් නෙමෙයි නමුත් ඔබගේ රචනා ශෛලිය බ්ලොග් එකකට හොඳටම හොඳයි. මම නම් කියන්නේ බ්ලොග් එකක් පටන් ගන්න කාලේ හරි 😀
ඔබ කැමති ඕනෑම සයිට් එකකට ඔබේ ලිපි දාන්න නමුත් ඒ දාන දෙවල් වල එකතුවක් විදිහට බ්ලොග් එකක් කරන්න, පසු කාලයකදී ඒක බොහොම වටිනවා.
මම ගමනක් යන්න සුදානම් කරනකොට ගූගල් ඩ්රයිව් (Google Drive) එකේ ඒ සඳහා ෆෝල්ඩර් එකක් හදල යන්න ඕන තැන් වල විස්තර, මැප්ස් විය හියදම් හැම දේම එකතු කරනවා ගූගල් ඩොක්ස් (Google Docs) පාවිච්චි කරලා.
අනික මේ හැම දේම ඔන් ලයින් හින්ද මට ලෝකේ ඕනෑම තැනකින් බලන්නත් පුළුවන්, මේක තමයි ට්රිප් ප්ලෑනින්ග් මෙතඩ් එක
මේ ක්රමයට පින් සිද්ධ වෙන්න මගෙන් විස්තර ඉල්ලපු බොහෝ දෙනෙකුට විස්තර දෙන්න කරදරයක් වෙලා නැහැ 🙂
ඉරානය කියන්නේ බොහොම බලන්න දේවල් තියන සුන්දර රටක්.
නමුත් කාන්තාවන්ට ඇවිදින්න එතරම් හොඳ තැනක් නෙමෙයි, බිරිඳට මාත් එක්ක යන්න බැරි නිසා එතරම් උනන්දු උණේ නැහැ.
ඇෆ්ගනිස්ථානයේ පැරණි ගොඩනැගිලි වලත් පර්සියන් ලක්ෂණ තියනවා, නමුත් ඒ බොහොමයක් විනාශ වෙලා ගිහිල්ල. 😦
කැමතියිකැමතියි