බුරන ස්ටේසම සහ දැවැන්තයෙක් හමුවීම !
ලිච්ෆිල්ඩ් (Lichfield) සිට නගරාන්තර දුම්රියකින් ලන්ඩන් යුස්ටන් (London Euston) වෙත පැමිණි අප ඉන් අනතුරුව “ටියුබ්” (Tube) හෝ “අන්ඩග්රවුන්ඩ්” (Underground) ලෙස හඳුන්වන නගරය ඇතුලත දිවෙන මෙට්රෝ දුම්රියකට ගොඩවීමු.
විනාඩි 30 – 40 ක ගමනක අවසානයේ දුම්රිය පොළ කිහිපයකින් මාරු වී ගමනාන්තය වෙත ලඟා වෙද්දී අප මිතුරියගේ සැමියා අප එන මග බලා සිටි බැවින් අපගේ දුම්රිය ගමන එතෙකින් නිමා විය.
සතියක් පුරා සුද්දාගේ කෑම බීම වලින් හෙම්බත්ව සිටි අප දෙදෙනා හට කටට රහට ලංකාවේ කෑම වේලක රස බලන්නට ලැබුණේ හාමිනේගේ මිතුරිය වන උස එකීත් ඇගේ මවටත් පින්සිදු වන්නටය. ඒ ගැන ඔවුන් නොසෑහෙන මහන්සියක් ගෙන තිබුණු බව කොකියාම බැරිය.
ආගත්තුක සත්කාරයට ලැදි මේ උදවියගේ නිවසේ රැය පහන් කළ අපි පසුවදා දෙවන වරටත් බ්රිතාන්ය කෞතුකාගාරයට ගොඩ වදින්නට තීරණය පසුගිය වර කළේ චීන ආක්රමණයක් නිසා අතපසු වූ ප්රදර්ශන ගැලරි කිහිපය දැක බලා ගැනීමටය, වෙනදාට තනියම කෞතුකාගාර බඩ ගාන අපගේ පාළු මකන්නට මෙවර හාමිනේගේ මිතුරිය වන උස එකීද එක් වූවාය.
කණ්ඩා කෙසේ වෙතත් ගෑල්ළමයින් දෙදෙනා (හෙවත්ඇන්ටිලා 🙂 ) කෞතුකාගාරය නැරඹීමටත් වඩා ආගිය තොරතුරු කතා බහට (OPDP) වැඩි වෙලාවක් වෙන් කරන බව පෙනුණත් ඉන් කණ්ඩාට වැඩි නිදහසක් ලැබුණු බව කියන්නට ඕනෑය. එනිසා ඒ සම්බන්ධයෙන් කණ්ඩාගේ කිසිඳු මැසිවිල්ලක් නැත 🙂
කලින් වර සංචාරයේදී අප මුහුණ දුන් චීන වසංගතය මෙවර කෞතුකාගාරයේ දක්නට නොවූ බව කියන්නේ අප්රමාණ සතුටිනි, එනිසා ඉතා නිවී සැනසිල්ලේ ඇමරිකානු රෝම, ග්රීක සහ අප්රිකානු ප්රදර්ශන කුටි හිතේ හැටියට නැරඹීමට අපට ඉඩ කඩ ලැබුණි.
බ්රිතාන්ය කෞතුකාගාරය නැරඹු ඇතැම් දෙනා නිතර පවසන දෙයක් වන්නේ වෙනත් රටවල් වලින් කොල්ල කා ගත් පුරා වස්තූන් නැවතත් නියම අයිතිකරුවන් වෙත ලබා දීමට සිදු උවහොත් කෞතුකාගාරය මුළුමනින්ම පාහේ හිස් වනු ඇති බවය. ඒ ඔවුන්ගේ ඉතිහාසයට වඩා වෙනත් රටවල සහ පැරණි ශිෂ්ඨාචාරයන්ගේ කෞතුක වස්තු ප්රදර්ශනය සඳහා විශාල ඉඩක් ලබා දීම නිසයි.
කණ්ඩා බ්රිතාන්ය යටත් විජිත සමයේ සිදු වුණු පුරාවස්තු මංකොල්ලය සම්බන්ධයෙන් තරමක් එකඟ උවත් වර්තමානයේ ඇතැම් මැද පෙරදිග, අප්රිකාව පුරා විසිරුණු වැදගත් පුරා විද්යාත්මකව ස්ථානයන්ට අත්ව ඇති ඉරණම ගැන සැලකූ විට මේ මංකොල්ලය වක්රව හෝ ඍජුව පුරා වස්තූන්ගේ ආරක්ෂාවට හේතු වී ඇති බව පිළිගන්නට මැළි වන්නේද නැත.
එමෙන්ම මෙම විදේශීය පුරා වස්තූන්ගෙන් තොරව කෞතුකාගාරයක් පවත්වාගෙන යාමට අවශ්ය දේ වලින් අඩුවක් බ්රිතාන්යට නැත, අප වැනි ආසියාතිකයන්ට සාපේක්ෂව එවන් දෑ ආරක්ෂා කර ගැනීම සම්බන්ධයෙන් ඔවුන් බෙහෙවින් උනන්දු වන්නේය.
සංචාරයට අමතරව මෙදා පොටේ රැජින ආත්තම්මාගේ රටට ගොඩ බැහැපු ගමනේ එක් අරමුණක් වූයේ බ්ලොග් රචකයන් අතරින් මාගේ ප්රියතම ලේඛකයකු වන “බෝග්කරුවන් හැමෝම දන්නා නමුත් නොදන්නා” හාදයෙක් හමුවීමයි.
මෙතෙක් කිසිදා මුණ ගැසී නැති නොතිබුණත් ඔහුගේ ලිපි බොහෝමයක් මා හිතට ඉතා සමීපය, අවංකත්වය ගැබ් වුණු ලිපි තුළින් ඔහුගේ අත්දැකීම් නැවත විඳින්නට හැකි වීම පිළිබඳ ඇත්තේ දුකත් සතුටත් එක්වුණු අමුතුම සම්මිශ්රණයකි.
අපගේ හමුව යොදාගෙන තිබුණේද කෞතුකාගාරයට ගොඩ වැදුණු දිනයේම දවල් වරුවේය, හාමිනේ නම් කිවේ වෙනදා කෞතුකාගාරයකින් ඇදගෙන මිස පිටතට ගන්නට බැරි කණ්ඩා එදා සිටියේ කෞතුකාගාරයෙන් පිටවන තෙක් නොඉවසිල්ලෙන් සිටි බවය.
අලුත් මිතුරන් හඳුනා ගෙන “සෙට්” වෙන්නට යද්දී උනන්දුව කොහොමත් එහෙමය, අනික පොත්පත් බ්ලොග් යනාදිය කියවීම කිසිසේත් ප්රිය නොකරන මතට තිත හාමිනේට ඕවා තේරුම් බේරුම් කරන්නට බැරි නිසා හොඳම දේ කට පියා ගෙන ඉන්නා එකය.
අපගේ හමුව යොදා ගත්තේ අප නැවතී සිටි පෙදෙසට කිට්ටුව පිහිටි “බාකින්” (Barking) අන්ඩග්රවුන්ඩ් දුම්රියපොළහිදීය, නමේ හැටියටම තැන දරුණු නැත. අහල පහළ පේන තෙක්මානයක බලු රංචුවක් හෝ එවැනි සද්දයක්ද නැත. වෙන කවුරුවත් අපිට බුරාගෙන හපා කන්නට පැන්නේද නැත.
එනිසා මේ “බාකින්” එක බලු “බාකින්“ එකක් නොව “එම්බාකින්“(Embarking) වැනි තේරුමක් විය යුතු යයි කණ්ඩා සිතුවේය, නමුත් හදිසි නිගමන වලට පනින කණ්ඩා නැවතත් වැරදිය.
පසු විපරමකින් දැන ගත්තේ එය පුරාන “ඇන්ග්ලෝ–සැක්සන්”(Anglo-Saxon) බසින් බිඳී ලතින් බසට පැමිණි “බාකින්ගයි ” (Berchingae) යන පදයේ වත්මන් ස්වරුපය බවයි. එහි අරුත ගැන අදහස් කිහිපයක්ම ඇත, ඒ අතරින් වර්තමානයේ ළඟ පාතක එකදු “බර්ච්” ගසක් හෝ පෙනෙන්නට නොතිබුණත් ඉන් මා සිත් ගත්තේ “බර්ච් වදුලේ ජනපදය” (Settlement by the Birch trees) යන්නයි.
දුම්රියපොළෙන් කඩිමුඩියේ යනෙන මගීන් දෙස උනන්දුවෙන් බලා සිටි අප වෙත එන සිනාමුසු මුහුණින් යුතු තනි රිදී පැහැති කොණ්ඩයක් සහිත උස මහත මිනිසා කොහේදී හෝ දැක පුරුදු ඇති බව කණ්ඩාට දැනුනි. ඒ වෙන කවුරුවත් නොව ඔහුම බවද කණ්ඩාට නිසැකය, එනිසා දෙවරක් නොසිතා අතට අත දී ආචාර කළේ හද පිරි සතුටින්මය.
මේ වෙනකෙක් නොව “අරූගේ අඩවියේ“ අකුරු අමුණන “අරූ“ ය, නමින් අරුණ පෙරේරා වන ඔහු “අවුල්වන්නට පෙර” අහවර කරන්නට ගත් ලියමන අවුලට පත්ව ලිවීමෙන් ඈත්ව සිටීම ගැන ඇත්තේ දැඩි කණගාටුවක්මුත් ඔහුව මුණ ගැසීමට අවස්ථාවක් ලැබීම භාග්යයක් ලෙස සලකමි.
එදා මිතුරිය සමග නිවස වෙත ගොස් අල්ලාප සල්ලාපයේ යෙදීමට හාමිනේ නොඉවසිල්ලෙන් සිටියත් කණ්ඩා “අරූ“ එන තෙක් “මුං“ ව රඳවා ගත්තේ මුංට අරූ ද, අරූට මුංද හඳුන්වා දීමට තිබුණු ආසාව නිසාමය. අචාර සමාචාරයෙන් පසු අප නඩය මද වෙලාවක් පිලිසඳරේ යෙදෙන විට මට සිහි වුයේ දැන හැඳිනුම් කමක් නැතත් අපගේ මිතුරියත් අරූගේ ගමේම ඇත්තියක් බවය.
සිරි ලංකාවෙන් ගව් ගණනක් ඈත සත් සමුදුරෙන් එහා නුහුරු රටකදී දෙල්කඳකට දෙල්කඳක් හමුවීමට ඇති සම්භාවිතාවය කෙතරම්ද යයි මම නොදනිමි, නමුත් එය අතිශය අහඹු සිදුවීමක් බව අමුතුවෙන් නොකිවමනාය.
අලුත් මිත්රයා වන මූට “අරූ“ කියන්නට හිත දෙන්නේ නැතිය, එනිසා නිසි ගෞරවය දී අරුණ අයියා කියා ඇමතීම වඩාත් සුදුසු යයි කණ්ඩා කල් තියාම තීරණය කළ බැවින් ආමන්ත්රණය එසේම විය. නමුත් වැඩි විස්තර කතා බහේදී ඔහු හෙළි කළේ තරුණ වයසේ උදවිය ඔහුව හඳුනන්නේ “මචං අන්කල්” කියා නිසා කොහොම ඇමතුවත් වැරද්දක් නැති බවය, නමුත් “මචං අන්කල්” ට වඩා“අරූ” යන නම වඩාත් ගැලපෙන්නේ යයි මා පුද්ගලිකව සිතමි.
අපේ හමුවීම මීටත් වඩා රසවත් වෙන්නට තිබුණේ පිස්සු කෙළින්නටම උපන් හාදයෙක් විය යුතු ටික්කාවත් අල්ලා ගන්නට පුළුවන් උනා නම්ය, ආරංචියේ හැටියට උගේ බොගේ ලියන කතන්දර වලට වඩා ටික්කා දැන් වෙනස්ය, ඒක කිව්වේ ඌ නිසා වැඩිය විශ්වාස ගන්නටත් බැරිය.
ටික්කා දැන් ලොකු ළමයෙක්ය, හොඳටෝම හැදිලාය ඒ ගැන අපිට අප්රමාණ සන්තෝසය 😀 😀 😀
කරුමයට ටික්කාව අපේ සංගමයට ඇද ගන්නට නොලැබුණත් නැවත හෙට දවසක එවන් අවස්ථාවක් උදා වේ යයි සිතමි, එමෙන්ම හමු වීමට නොහැකි උනත් දැඩි කාර්යබහුලත්වය මැද කිහිප විටක්ම මා ඇමතීම ගැන ටික්කාට ස්තුතිවන්ත වෙමි.
ගැහැණු ළමයින් දෙදෙනා හට නිවෙස කරා යාමට සමුදුන් අප බාකින් දුම්රියපොළ අසලම වූ පබ් එකකට වැදුනේ තිබහ නිවාගැනීමටත් සහ කතා බහ කරන්නටය. එහි නමත් අපුරුය “ද බාකින් ඩෝග්” (The Barking Dog) හෙවත් බුරන බල්ලාය, ඒ නම තබන්නට ඇත්තේ “බුරන බල්ලෝ සපා නොකයි” යන පදනමෙන්ද විය යුතුය 🙂
බීර සහ පේල් ඒල් එකකින් උගුර තෙමා ගන්නා අතර මා සන්ධ්යා වරුවට වෙනත් කිසි වැඩක් යොදාගෙන නොමැති බව දැනගත් අරූගේ ප්ලෑන වුයේ තව කිහිපදෙනෙකු සමගින් සෙට් වෙන්නටය.
අරූට මිතුරන්ගෙන් කිසි අඩු පාඩුවක් නැති බව මට නිසැකය, එනිසා “බුරන බල්ලාට“ සමු දී ඔහුගේ මිතුරෙකුගේ ව්යාපාරක ස්ථානයකට ගොඩ වැදුණේ ඕනෑම දෙයක් තනියෙන් රස විඳිනවාට වඩා මිතුරන් සමග කිරීම සතුටක් දනවන නිසාය.
කෙටි කාලයකට උව දැන හඳුනා ගන්නට ලැබුණු අරූගේ සහ ඔහුගේ මිතුරු සංගමය මා දැඩි සේ රස වින්දෙමි. සතුටු සාමීචියට මෙන්ම සඳ තරණයට තමන්ගේ තැන අපේ තැන ලෙස භාවිත කරන්නට ඉඩ දුන් නම සඳහන් නොකරන මිතුරාටද අනපේක්ෂිත ලෙස රස කතා වැලක් අත්හැරිය රොහාන්වද ලෙහෙසියෙන් අමතක වන්නේ නැත.
අනුමත වීමෙන් පසු අප දෙදෙනා එදා කෑම කන්නට ගිය කින්ග්ස්බරි හංදියේ Mo’s නිසැකවම මගේ ජාතියේ කඩයක් බව කියන්නය ඕනෑය. එය පුහු පඩ නැති කටට රසට කන්නට හැකි තැනක් වීම ගැන මා බොහොම සතුටු වෙමි. තරු පහේ කඩ වලට වඩා වැඩකරන පන්තියේ උදවියට සලකන මෙවන් තැන් කණ්ඩා වඩාත් ප්රිය කරන්නේය.
රහදිවට නොදැනෙන සුද්දගේ කඩචෝරු ඇරෙන්න අපේ කඩයකින් කට සැරට රස බැටළු මස් කරියක් සමග කාලයකට පසුව ආප්ප සහ පරාටා ගිලින්නට ලැබීම ඉස්තරම්ය, ඩයට් ප්ලෑන් සහ හෙල්ත් චෙක් පසෙක තබා කැලරි කැරලි ගැසෙන්නට වෙනදාටත් වඩා බඩ පැලෙන්නට අඹරුවේ ඇඟ රත් කළ “පේල් ඒල්” සහබීර (Pale Ale & Stout) සමග නොම්මර එකට කෑමත් ගැලපුන හන්දාමය.
ලබන සැරේ අපේ හාමිනේවත් ඇන්ට අරූ සහ නෝනා මහත්මයා (අරකි කියන්නට හිත හදා ගන්නට බැරිය) සමග Mo ව හමුවෙන්නට යන්ට බලාපොරොත්තුවක් ඇත. එතෙක් කල් ඉවසන්නට සිදුවන මුත් හොඳ දේ වෙනුවෙන් ඉවසිමෙහි ගැටළුවක් නැත.
~ මතු සම්බන්ධයි !
ප.ලි. :
අරූ හමුව ගැන හදිසියේම ලියන්නට සිත් වූයේ, එක්තරා හොරෙක්, මංකොල්ල කරුවෙක්, මං පහරන්නෙක්, දේශප්රේමියෙක් තැබූ සටහනක් නිසාය. ඒ සටහන අරූ සහ මුන් සමග ගෙවුණු සොඳුරු හෝරා කිහිපයක් ගැනය. ඒ ලියමන කණ්ඩාගේ හිතට ගෙනාවේ සතුටකි නමුත් හිතට තියන එකම දුක කණ්ඩාටත් එතනට ප්ලග් වීමට ඉඩ නොලැබීමය.
අප හමු වූ සති අන්තයට පසුව සති අන්තයේ හාමිනේව Mo’s වෙත උස්සන් එන්නට ලොකු උවමණාවක් තිබුණද ඒ වැඩේ ගැස්සුනේ කලින් දින හවස එන ගමනේදී ලන්ඩන් නුවර “මොනියුමෙන්ට්“(Monument) අන්ඩග්රවුන්ඩ් නැවතුම් පොළේදී හාමිනේ විසින් දමන්නට යෙදුණු “මොනියුමෙන්ටල්“ කබරයා පාරක් නිසාය.
පෙර ලිපි :
හිරු නොබසිනා දූපතේ සවාරිය ~ I කොටස ~ රැජින ආත්තම්මා වෙත ආදරයෙන් ලියමි !
හිරු නොබසිනා දූපතේ සවාරිය ~ II කොටස ~ A380ය සහ සුද්දගේ ජර්මන් බෝම්බ !
හිරු නොබසිනා දූපතේ සවාරිය ~ III කොටස ~ බ්රමී නුවර සහ ලිච්ෆීල්ඩ්
හිරු නොබසිනා දූපතේ සවාරිය ~ IV කොටස ~ පෙන්ඩොලීනෝ, අණ්ඩග්රවුන්ඩ් සහ බෝම්බ
නොවැම්බර් 27, 2017 at 7:57 පෙ.ව.
දැන් ඔක්කොටම වැඩිය ඕනෑකම තියෙන්නේ “මොනියුමෙන්ටල්“ කබරයා පාර ගැන අහන්න…
කැමතියිLiked by 1 person
නොවැම්බර් 27, 2017 at 8:06 පෙ.ව.
ගෘහස්ථ වාරණ මණ්ඩලයේ (Domestic Censorship Board) පොරෝ පහරට හසුව “මොනියු මෙන්ටල් කබරයා” පරලොව සැපත් වූ බව සංවේගයෙන් දැනුම් දෙමු
~ ශෝකයට පත් කණ්ඩා සහ පාඨක කැල !
කැමතියිකැමතියි
නොවැම්බර් 27, 2017 at 8:04 පෙ.ව.
මචන් අන්කල්……. මොනියුමේන්ටල් කබරයා……හහහහහහා……… මරු
කැමතියිLiked by 1 person
නොවැම්බර් 27, 2017 at 8:22 පෙ.ව.
මචං අංකල් එක්කනං අවුරුද්දක් හරි කතාබහ කරන්න දේවල් තිබ්බ, “මොනියුමෙන්ටල් කබරයා” ? 🤔 මට එහෙම එකක් මතක නැහැනෙ 🤗
කැමතියිකැමතියි
නොවැම්බර් 29, 2017 at 8:38 පෙ.ව.
කණ්ඩා බයවෙලා ඔවට තමයි ගුහස්ත හින්සනය කියන්නෙ. 🙂 😉
කැමතියිLiked by 1 person
නොවැම්බර් 29, 2017 at 8:55 පෙ.ව.
පිස්සුද මං බය නෑ … ( හාමිනේ ළග පාත නති නිසා 😁 )
කැමතියිකැමතියි
නොවැම්බර් 27, 2017 at 10:58 පෙ.ව.
මූ අරූ එක්ක හිටියට පස්සෙ මොනියුමෙන්ටල් කබරය දැම්මෙ කවුද කියල සැකයක් ඇති වෙනව. හැක්..
කැමතියිLiked by 1 person
නොවැම්බර් 27, 2017 at 2:16 ප.ව.
හෙක් … හෙක් … O/L කාලයෙන් මෙහා කබරයා දමා නැත. ඒ මම පොර නිසාවත්, ගැලුමක් උනත් බොන්න පුළුවන් නිසාවත් නෙමෙයි. පදම එනකොට නවත්තන්න ඉගෙන ගැනීම නිසා 😀
ඒ නිසා මේ කබරයා මට කොහෙත්ම අයිති නැත !!!
කැමතියිකැමතියි
නොවැම්බර් 27, 2017 at 12:44 ප.ව.
කන්ඩො මම ඉවර වෙනකම් කියෙව්වා. හුඟ කාලෙකට පස්සේ බ්ලොග් එකට රිංගුවේ.
කැමතියිLiked by 1 person
නොවැම්බර් 27, 2017 at 2:30 ප.ව.
ළමයි ඉස්කෝලෙ දාන විදිහ කිව්වා විතරයි හේන එහෙම් පිටිම්ම කානාටුවට ඇරල, මොකෝ පහුගිය ටිකේ සද්දයක් නැතුව හිටියෙ ?
කැමතියිකැමතියි
නොවැම්බර් 27, 2017 at 2:47 ප.ව.
ලෝකෙ පුරා ගෙනා දේවල් බීඑම් එකේ. ලෝකල් ඒවා ගොඩක් තියෙන්නේ Museum of London නේ.
කොහොමත් ඒ රටේ කොහෙ ගියත් ලඟ මියුසියම් එකක්
කැමතියිLiked by 1 person
නොවැම්බර් 27, 2017 at 2:50 ප.ව.
වෙන එකක් තියා මේකකුත් තියනවා ලීඩ්ස් කාසල් එකේ
http://www.bbc.com/culture/story/20170920-the-worlds-only-dog-collar-museum-in-leeds-england
කැමතියිLiked by 1 person
නොවැම්බර් 27, 2017 at 3:12 ප.ව.
ලීඩ්ස් බළකොටුවට තවම ගිහින් නැහැ, බොහොම ලස්සන තැනක් !
මීළඟ වතාවේ වෙලාවක් ලැබුණොත් ලීඩ්ස් වගේම, ඇවිදින ජොනී මහත්තයලෑ දිහාවෙ ගිහින් එන්න ඕන 😀
කැමතියිකැමතියි
නොවැම්බර් 27, 2017 at 3:05 ප.ව.
ඔව් පළමු වතාවෙ ලන්ඩන් කෞතුකාගාරෙ බලන්න ගියා, Great Fire Of London, London Bridge, Tower Bridge වගේම තේම්ස් ගඟ ගැනත් බොහොම විස්තර තිබුණ. නමුත් මට හිතුන ඒ කෞතුකාගාරයට දීල තියන තැන මදිදෝ කියල. මැඩම් ටුසොඩ් වැක්ස් ගැලරි, ඩන්ජන් වගේ තොරොම්බල් දේවල් වලට වැඩිය මියුසියම් එකකට රිංගන එක ඔළුවට හොඳයි.
කිව්වත් වගේ නගරයක් නගරයක් වගේම සමහර පොඩි ගම්මාන වලත් විවිධ මියුසියම් තියනවා, අන්තිමට නැවතුණු ලිච්ෆීල්ඩ් අවටත් තුන හතරක්ම තිබුණ.
කැමතියිකැමතියි
නොවැම්බර් 27, 2017 at 6:31 ප.ව.
සැහෙන්න කලකට පස්සේ කියවන්න ආවේ.
අරූගේ අඩවියත් කාලෙකට පෙර කියවුවා, දැන් අප්ඩේට් වෙන්නැති නිසා ලඟදි ගියේ නැහැ.
කෞතුකාගාර විස්තරේ හිතට ඇල්ලුවා. පෙන විදිහට, වැඩිය කම්මැලි කමක් හිතට දැනෙන්නේ නැති විදිහට ඩිසයින් කරලා තියෙන හැඩයි.
අපේ තියෙන්නේ දුවිලි පිරුනු, මකුළු දැල් බැඳුනු, එක සැරයක් ගියොත් ආයේ ඇති කියල හිතෙන කව්තුකාගාර නේ.
ඒ අතින් සුද්දට බැන්නට, උ පරෙස්සමෙන් බලාකිය හරි ගන්නවා. අපි එහෙමව්වත් කරන්නේ නැහැනේ.
බෙදාගත්තට ස්තුතියි
ලසන්ත.
කැමතියිLiked by 1 person
නොවැම්බර් 27, 2017 at 6:57 ප.ව.
අරෑට පෙස්සමක් ගහන්න. 👍
ඇයි අපේ අයත් පුරා වස්තු බලා ගන්නව , අප්පොච්ච කඩු වගයක් ගෙදර අරං ගියා කියන්නෙ වැඩි පරිස්සමට. අන්න කැපවීම 😁
කැමතියිකැමතියි
නොවැම්බර් 27, 2017 at 10:25 ප.ව.
ඌට කිව්වෙ නැද්ද ආපහු ලියන්න කියලා? ඔය ලංඩං වල ඉන්න සෙට් එක කොහොමත් කා ගැනීමම තමයි. පේන්නැද්ද අර කහසල්ලි සරදයි ලෝටස් අජිත් උන්නැහැයි කාගෙන දෙන්නම තට්ටෙ. මා හිතේ තේමිස් ගඟේ වතුර බීල වෙන්ටැ.
හාමිනා කෙල්ල කබරයෙක් දැමීම පිළිබඳ අපගේ සතුට. වෙරළු, අඹ අච්චාරු, නිකං අච්චාරු, ඇඹුල් ඇඹිලිය, නාරං, පිචොක්, දෙහි. දොඩං, කාමරංගා, ගොරකා, ලුණු දෙහි, බැට්ටි ඇසිඩ් ආදී ඕනෑම ඇඹුල් කෑමක් කියහං.
බෝතලේක දාලා රිජිපෝ් පෙට්ටියක අහුරලා යකඩ ඇනේකුයි අඟුරු කෑල්ලකු යි අමුණලා ඒ පැත්තෙ එන ප්ලේන් එහෙක කොන්දොස්තර අතේ එවන්නං. බාපු ගාං තොටුපොලට ඇහිල්ල ගනිං.
කැමතියිLiked by 1 person
නොවැම්බර් 28, 2017 at 1:35 ප.ව.
මොකෝ නැත්තෙ, වැදපු නැති ටික විතරයි 😁 බොලා ඔක්කොම ආපහු කියන්නලා.
උඹට හාමිනේ කියන්නෙය කිව්ව … නෑ එක්කො ඕන නෑ 🤣
කැමතියිකැමතියි
දෙසැම්බර් 4, 2017 at 1:42 පෙ.ව.
කොහෙද සුරන්ගයෝ මම සරදයි කා ගන්නේ. සරදගේ පොතත් එලි දක්වන දවසේ මමනේ කොන්දොස්තර වැඩේ කලේ. 🙂
කැමතියිLiked by 1 person
නොවැම්බර් 28, 2017 at 9:12 ප.ව.
කියෙව්වෙමි. කණ්ඩාගේ හමුවීම මට කිසිදා අමතක නොවේ. එදා මරු දවසක්!!!!!!!!!!!!!!!!
කැමතියිLiked by 1 person
නොවැම්බර් 28, 2017 at 9:42 ප.ව.
උඹට මතකද සුඩානි ටැක්සි ඩ්රයිවර් එක්ක මිනිත්තු කිහිපයක චැට් එක. අපි නොහිතනා පලාත්වලත් උඹ ඉඳලා තියෙනවා. උඹ හොඳ අත්දැකීම් තියෙන ටොප් ඉළන්දාරියෙක්. ආපහු හමුවෙමු.
කැමතියිLiked by 1 person
නොවැම්බර් 28, 2017 at 9:54 ප.ව.
ඔව් අපි මෝස් වලට කන්න යද්දි නේද ? 🙂 , හැමෝගෙම ජීවිත වල කොයිතරම් පැති තියනවද 🙂 ආපහු අනිවාර්යයෙන් හම්බ වෙමු !
කැමතියිකැමතියි
නොවැම්බර් 28, 2017 at 9:59 ප.ව.
මෝයි යන්න ඉස්සෙල්ලා වෙම්බ්ලි ස්ටේඩියම් එකෙන් බැහැලා අපි සෙට් වෙච්ච තැනට යන වෙලාවේ.
කැමතියිLiked by 1 person
නොවැම්බර් 29, 2017 at 8:54 පෙ.ව.
අරෑගෙ මතකෙ අපිටත් තිබුන නම් ? 🤗
කැමතියිකැමතියි
දෙසැම්බර් 4, 2017 at 1:42 පෙ.ව.
අපිට කතා කරේ නැත්තේ බය වෙන්න ඇති නේහ් වැඩිය බොයි කියල
කැමතියිLiked by 1 person
දෙසැම්බර් 5, 2017 at 10:31 පෙ.ව.
අජිත්ගෙ කන්ටැක්ට් විස්තර එවන්න, අනිත් පාර සුද්දගේ රටේ ඉන්න දෙතුන් දෙනාවම එකට හමු වෙන්න කැමතියි.
කැමතියිකැමතියි
නොවැම්බර් 28, 2017 at 9:50 ප.ව.
ඔව් එදා හොඳ දවසක්, ආපහු ඒවගේ හමුවෙලා කතා බහට අවස්ථාවක් ලැබෙයි කියල හිතනව 🍺🍺🍺
කැමතියිකැමතියි
නොවැම්බර් 30, 2017 at 7:59 පෙ.ව.
/// කණ්ඩා බ්රිතාන්ය යටත් විජිත සමයේ සිදු වුණු පුරාවස්තු මංකොල්ලය සම්බන්ධයෙන් තරමක් එකඟ උවත් වර්තමානයේ ඇතැම් මැද පෙරදිග, අප්රිකාව පුරා විසිරුණු වැදගත් පුරා විද්යාත්මකව ස්ථානයන්ට අත්ව ඇති ඉරණම ගැන සැලකූ විට මේ මංකොල්ලය වක්රව හෝ ඍජුව පුරා වස්තූන්ගේ ආරක්ෂාවට හේතු වී ඇති බව පිළිගන්නට මැළි වන්නේද නැත. ///
මමනම් කියන්නේ එහෙම විනාස නොකරන රටවල් වලට ඒ ඒ රට වලට අයිති දේවල් නැවත ලබා දිය යුතු බවයි…
උන්ට ලැජ්ජ නැද්ද මන්ද ඒවා ප්රසිද්ධියේ පෙන්න පෙන්න තියාගෙන ඉන්න…
මට ඔය රිළා සුද්දො පෙන්නන්න බැරි එක හේතුවක් තමයි උන් කරපු මංකොල්ලයන්…
ඒවා ද්රව්යමය, මිනිස්, සංස්කෘතික, සමාජයීය කියන හැම පරාසයටම විහිදෙනවා…
මොකක්හරි අවැඩක් වෙච්ච ගමන් අපේ මැටි මෝල්ලු “තොපේ 2500 මහලොකු අහවල් එකක් ගැන කියෙව්වට මෙහෙමයි වෙන්නේ ඇරෙහෙමයි වෙන්නේ” කිය කිය බැන්නට ඔය යුරෝපෙන් ආපු උන් නිසා අපේ මිනිස්සු මොන තරමක් පිරිහුණාද කියල පොඩ්ඩක් හරි තේරුම් ගන්න රොබට් නොක්ස් ගේ පොත කියෙව්වම ඇති…
මමනම් කියන්නේ කලින් අවුරුදු 2000 තිබ්බ සමාජීය වටිනාකම් සහ හොඳ දේ අති බහුතරයක් අවසන් අවුරුදු 500 නිසා
ඛාදනයට ලක් උනා කියලයි…
/// මේ වෙනකෙක් නොව “අරූගේ අඩවියේ“ අකුරු අමුණන “අරූ“ ය, නමින් අරුණ පෙරේරා වන ඔහු “අවුල්වන්නට පෙර” අහවර කරන්නට ගත් ලියමන අවුලට පත්ව ලිවීමෙන් ඈත්ව සිටීම ගැන ඇත්තේ දැඩි කණගාටුවක්මුත් ඔහුව මුණ ගැසීමට අවස්ථාවක් ලැබීම භාග්යයක් ලෙස සලකමි. ///
මමත් එහෙම සළකනවා…
පොඩි අවුලකට තිබ්බේ අපි සෙනග ගොඩක් නිසා අරූ අයියා එක්ක වැඩිමනක් කතාබහ කරන්න ලැබිච්ච නැති එක තමයි…
ඒ වගේම අරූගේ අඩවිය නැවතත් පණ ගහල එයි කියන බලාපොරොත්තුවත් හිතේ තියෙනවා…
කැමතියිLiked by 1 person
දෙසැම්බර් 5, 2017 at 10:53 පෙ.ව.
සමහරක් කෞතුක වස්තු ආපසු දීල තියනවා, අපේ ඔටුන්නයි සිංහාසනය ඊට නිදසුන්. නමුත් තව දහස් ගණන් දේවල් තවමත් බලෙන් තියාගෙන ඉන්නවා 🙂
මම හිතන්නෙ අපේ රට යුරෝපීය ආක්රමණ නිසා ලැබුණු හොඳ දේවල් නැතුවමත් නෙමෙයි. අපිට ආදරේකින් නොවුණත් ඇති කරපු අධ්යාපන ක්රමය (පස්සේ කාලෙකදී අනා ගත්තත්), මාර්ග පද්ධතිය වගේම සිවිල් සේවා පද්ධතිය ඒවායෙන් කිහිපයක්.
ඒ වගේම වැඩවසම් ක්රමයේ බිඳවැටීම නිසා තමයි අපි අද හිටියට වඩා නිදහසේ ජිවත් වෙන්නෙ. හැබැයි එකෙන් කියන්නේ නැහැ අපේ ජිවිත දැන් සංකීර්ණ නැති බව හෝ පරිපුර්ණ බව.
කිව්වත් වගේ යුරෝපීයයන් නිසා සංස්කෘතියේ අනන්යතාවයට වෙච්චි වෙනස නම් මකන්න බැරි දෙයක්, ඒකෙම අනිත් පැත්ත තමයි අපි ඔය කතා බහ කරන හැම දේම කාලයත් එක්ක හොඳට හෝ නරකට වෙනස් වෙන එක වළක්වන්නත් බැහැ කියන එක.
කැමතියිකැමතියි
දෙසැම්බර් 5, 2017 at 6:25 පෙ.ව.
කන්ඩ බ්රදර්! මගෙ වම් අත ආයේ ෆක් උනා, මේ සැරේ ගොඩක් අමාරුයි. පණ්ඩිත වැඩක් කලා. තනි අතින් ඇඟිලි වලින් ටයිප් කරන්නේ,, මගේ drug එක ක්රිස්ටල් මෙත් එක එක්ක මැරිලින් මැන්සන් ලයිව් ඉන් කොන්සර්ට් ගැන ලියන්නං සනීප උන ගමන්..
කැමතියිLiked by 1 person
දෙසැම්බර් 5, 2017 at 10:58 පෙ.ව.
ටික්කො තරහ වෙන්න එපා කිව්වට, අනේ මන්ද බං උඹ කියන දේවල් වලට අඬන්නද ? හිනා වෙන්නද ? කොහොම උත්තර ලියන්නද කියල තේරෙන්නේ නැහැ 😀
මොකද ඉස්සර නම් අත මොනවා හරි උනා කිව්වහම අහන පළමුවෙනි ප්රශ්නෙ මොකද්ද කියල උඹ දන්නවනෙ 😉
මොනවා උනත් උඹේ අත ඉක්මනට හොඳ වෙලා ආපහු ලියන්න අවස්ථාව ලැබෙන්න කියල ප්රාර්ථනා කරනවා !
කැමතියිLiked by 1 person